Ga-la-ti 3

1Ơ, dơgrữq mơnuĩh Ga-la-ti gơla pơtòq! Asơi song jũh proh pơnõq adơi sơai, dơlãp tũq pãq anãq mơta pơnõq adơi sơai, Yàc Dõc Pơ-tlah Je-su ãt pỡc đĩn pãq dlòc kayơu pỡc song hũ ràc tơviãq sa vĩq nĩq nũn? 2Hlãq mĩn ưng duah tơnĩa kaya nĩ mưng pơnõq adơi sơai: Pơnõq adơi sơai ròq tồq mãq hũ Yàc Vơngãq Sơđah kơyua mưng vruãq ngãq drơi tui voh-va hẽla mưng kaya hmỡq tui dơlãp voh tui? 3Pơnõq adơi sơai gơla pơtòq yơu nữn yơh? Tũq song pơdòq gơnang mưng Yàc Vơngãq Sơđah, iỡuq mĩn tũq nĩ pơnõq adơi sơai ãn ròq ngãq wil tãl gơnang mưng rơlo rùp? 4Iỡuq mĩn pơnõq adơi sơai song ãt lũ kaya dleh dlàr nữn ôh hũ kuơ hagĩq? — Mơyah làiq viãq yơu nữn, nữn viãq la ôh kuơ! 5Yơu nữn, Pitao vrơi Yàc Vơngãq Sơđah ga pơnõq adơi sơai sì ngãq tơviãq dơgrữq vruãq gơnuar chơnuãq di khrãh pơnõq adơi sơai, nữn la kơyua mưng vruãq ngãq tui voh-va, hẽla kơyua mưng kaya hmỡq tui dơlãp voh tui? 6Yơu A-bra-ham “chàc gơnang di Yàc Pô Lơngĩq sì nữn la kaya pioh ung hũ angãn la tơpãq dãng,” 7nữn yơh iỡuq thơu pãc làiq dơgrữq mơnuĩh halơi hũ voh tui, nữn la anàq A-bra-ham hũ. 8Nữn tũq thơu hlơu làiq Yàc Pô Lơngĩq angãn mơnuĩh lơniãu la tơpãq dãng kơyua mưng voh tui, nữn Srãq Sơđah song ràc tơviãq Pơnuaĩq Siàp halơu ga A-bra-ham làiq: “Dơgrữq pơjẽh vual vơla ròq hũ lơngai mưng anàq.” 9Yơu nữn, mơnuĩh halơi hũ voh tui nữn hũ lơngai sigỡuq sì A-bra-ham, la mơnuĩh hũ voh tui. 10Thơu hadùp aràc gơnang mưng vruãq ngãq tui voh-va nữn dòq gah ala pơnuaĩq sơtãp lơmah; kơyua hũ pơnuaĩq wãq làiq: “Đang mang sì sơtãp lơmah dơgrữq mơnuĩh tui ôh gơjãp hatai sì dơgrữq pơnuaĩq hũ wãq dơlãp sơrãq voh-va pioh ngãq tui nhũ.” 11Nữn nĩq nũn làiq ôh hũ mơnuĩh halơi gơnang di voh-va hũ angãn tơpãq dãng di anãq Yàc Pô Lơngĩq, kơyua “Mơnuĩh tơpãq dãng ròq hadiuq kơyua mưng voh tui.” 12Dòq voh-va nữn ôh tơviãq mưng voh tui, nữn “Mơnuĩh ngãq dơgrữq vruãq voh-va hũ ròq hadiuq gơnang di nhũ.” 13Yàc Dõc Pơ-tlah song dơvuh sơlih pơnõq drơi tlah mưng kaya sơtãp lơmah voh-va hũ tũq song ãt sơtãp lơmah ala ga pơnõq drơi — kơyua hũ pơnuaĩq wãq: “Đang mang sì sơtãp lơmah mơnuĩh halơi kađòc ơteh pãq dlòc kayơu pỡc” — 14Pioh kaya lơngai siàp A-bra-ham hũ trôh vrơi ga mơnuĩh ia lơniãu dơlãp Yàc Dõc Pơ-tlah Je-su, tồq ga pơnõq drơi pơlih tồq mãq hũ pơnuaĩq hẽ grưh mưng Yàc Vơngãq Sơđah gơnang mưng voh tui.

15Ơ pơnõq adơi sơai, hlãq đơp tui pơnẽq anàq mơnuĩh. Bôh làiq yơu halơi, ôh hũ mơnuĩh halơi pơlih pa-lơhiãq hẽla pơtãl kaya halơi tơma dơlãp kaya hẽ grưh song hũ anàq mơnuĩh padỡc tơviãq. 16Vơnah tơmo, dơgrữq pơnuaĩq hẽ grưh nữn song hũ đơp sì A-bra-ham sì vrơi ga anàq tơcho ung hũ. Pơnuaĩq nữn ôh đơp, “Sì vrơi ga dơgrữq anàq tơcho” yơu nữn akhàt vrơi ga lũ mơnuĩh, nữn la, “sì vrơi ga anàq tơcho anàq hũ,” yơu nữn akhàt vrơi mĩn sa aràc mơnuĩh, sì nữn la Yàc Dõc Pơ-tlah. 17Nữn mưng pơnuaĩq hlãq ưng đơp nữn la: Dơlãp tũq song pabôh tơviãq hadơi pàq rơtôh tlơu plôh thũt, voh-va ôh pa-lơhiãq pơnuaĩq hẽ grưh song hũ mưng Yàc Pô Lơngĩq padỡc tơgùq hlơu nữn ôh ngãq pioh tlàq luơi pơnuaĩq hẽ grưh. 18Kơyua mơyah làiq apôh hama trôh mưng voh-va, nữn apôh hama nữn ôh dòq la kơyua mưng pơnuaĩq hẽ grưh. Nữn Yàc Pô Lơngĩq song vrơi kaya anĩt ga A-bra-ham pa-thơu mưng pơnuaĩq hẽ grưh. 19Yơu nữn, voh-va pioh ngãq hagĩq? Voh-va song hũ pơtãl tơma kơyua mưng dơgrữq kaya sỗq dlàiq, hadơi sì tũq hũ vrơi mưng dơgrữq mơnuĩh gơnrơh ròq gãt tơpa tơngãn sa aràc mơnuĩh khrãh lơwah, tãl trôh tũq halơi mơnuĩh patui pơjẽh pơtiàt trôh, nữn pơnuaĩq hẽ grưh song hũ padỡc tơgùq ga mơnuĩh pơtui nữn. 20Nữn mơnuĩh di khrãh sì ôh iỡuq dòq di khrãh sa sơgah, sì Yàc Pô Lơngĩq nữn hũ mĩn sa. 21Yơu nữn, voh-va đơp jơdrãq wỡq sì pơnuaĩq hẽ grưh nữn yơh? Kaya nữn la ôh tũq halơi yơu nữn jỡc! Kơyua mơyah làiq voh-va hũ alĩn vrơi nữn pơlih va mai kaya hadiuq, nữn viãq làiq kaya tơpãq dãng ròq trôh kơyua mưng voh-va. 22Nữn Sơrãq Sơđah song padỡuq rơmiãq avih dơgrữq kaya dòq pãq ala dlàiq dơnũh pioh kơyua mưng voh tui dơlãp Yàc Dõc Pơ-tlah Je-su, pơnuaĩq hẽ grưh pơlih hũ jỡc vrơi ga dơgrữq mơnuĩh hũ hatai pãc-tui.

23Bôh làiq, hlơu sì tũq voh tui nữn ka-ôh trôh, pơnõq drơi mĩn kađòc mãq krỡq pãq ala gơnuar voh-va, tũq kađòc krỡq tãl trôh tũq voh tui hũ ràc tơviãq. 24Tơviãq jỡc, voh-va song tơviãq jỡc mơnuĩh pơto-va pơnõq drơi hũ pơweh pa Yàc Dõc Pơ-tlah, pioh pơnõq drơi pơlih hũ angãn tơpãq dãng kơyua mưng voh tui. 25Nữn hadơi sì tũq voh tui trôh, pơnõq drơi ôh dòq gah ala gơnuar mơnuĩh pơto-va tơra. 26Kơyua avih tãl aràc pơnõq adơi sơai la anàq Yàc Pô Lơngĩq hũ gơnang mưng voh tui dơlãp Yàc Dõc Pơ-tlah Je-su. 27Kơyua mơyah làiq dơgrữq mơnuĩh halơi song ãt ngãq bãp-tem dơlãp Yàc Dõc Pơ-tlah nữn kung chồq mãq Yàc Dõc Pơ-tlah. 28Ôh dòq hatai pa-chơlah Ju-đa hẽla Gơ-rec krơi, ôh dòq hatai pa-chơlah mơnuĩh halỗt hẽla lơnang lơnai krơi, ôh dòq hatai pa-chơlah lakơi hẽla kamơi krơi, kơyua avih tãl aràc pơnõq adơi sơai kung la mĩn sa dơlãp Yàc Dõc Pơ-tlah Je-su. 29Nữn mơyah làiq pơnõq adơi sơai pơweh pa Yàc Dõc Pơ-tlah, nữn pơnõq adơi sơai la anàq tơcho A-bra-ham hũ, la dơgrữq mơnuĩh hũ vơnah patui tui yơu pơnuaĩq hẽ grưh.