Ga-la-ti 2

1Hadơi nữn dơlãp sa plôh pàq thũt, hlãq vloh tơgùq nao pãq Je-ru-sa-lem gãm sì Ba-na-ba, dơlãp tũq kung va gãm Tit nao sigỡuq. 2Tũq nữn, tui kaya pabôh tơviãq yơu nữn, hlãq tơgùq nao pãq đỡn sì pơto akhàt ga pơnõq nhũ Pơnuaĩq siàp nữn hlãq akhàt vrơi pa-thơu di khrãh dơgrữq vual vơla lơniãu, nữn tui yơu pơnẽq ngãq krơi drơi sì mơnuĩh tiẽng dơnãi jãc rgơi, huaĩq làiq mĩn pơnẽq nữn sì drơi dòq ãn đuaĩq hẽla song đuaĩq dơlãp kaya ôh kuơ. 3Bôh làiq yơu nữn, gãm sì Tit, mơnuĩh nao sigỡuq sì hlãq, la mơnuĩh Gơ-rec, kung ôh kađòc pagùq pơ-èp iỡuq ãt adãt sìq kalìq. 4Sì vruãq nữn la kơyua mưng dơgrữq pơnõq adơi sơai ngãq lor ngãq dơđỡuq, la dơgrữq mơnuĩh pa-plẽt tơma pioh iãq diò kaya lơnang lơnai pơnõq hlãq hũ, la lơnang lơnai nữn pơnõq hlãq hũ dơlãp Yàc Dõc Pơ-tlah Je-su, pioh ga pơnõq nhũ pơlih mãq pơnõq hlãq ngãq halỗt, 5yơu nữn pơnõq hlãq kung song ôh va tơviãq kaya ãt di anãq pơnõq nhũ dơlãp sa tũq lơwah halơi nữn, pioh pơnuaĩq tơpãq Pơnuaĩq Siàp hũ miẽt pơlih dòq gơjãp sì pơnõq adơi sơai. 6Dòq mưng vơnãh dơgrữq mơnuĩh ngãq yơu hũ la tiẽng dơnai halơi nữn (bôh làiq hlơu dih pơnõq nhũ hũ iãq la ki ngãm, nữn ôh ngãq jỡc kaya krơi hagĩq pơweh sì hlãq; Yàc Pô Lơngĩq ôh iãq kơnãl gah lơniãu anàq mơnuĩh) — viãq, dơgrữq mơnuĩh hũ mơ-àc mơyàc nữn ôh pơtãl wỡq kaya hagĩq ga hlãq ôh. 7Nữn pa-vlữq wỡq, tũq kơnãl thơu làiq hlãq song hũ pơjao vruãq akhàt vrơi pa-thơu Pơnuaĩq Siàp ga mơnuĩh ka-ôh ãt sìq kalìq, kung drưh yơu Pier la pioh akhàt ga mơnuĩh ãt sìq kalìq 8(kơyua Pitao ngãq vruãq dơlãp Pier pioh ngãq vruãq gơnuar pơđar pơweh ga mơnuĩh ãt sìq kalìq, kung ngãq vruãq dơlãp hlãq pơweh ga mơnuĩh ia lơniãu), 9sì hadơi sì tũq thơu pãc jỡc kaya anĩt song hũ vrơi ga hlãq, nữn Ja-kơ, Se-pha, sì Jãng, dơgrữq mơnuĩh drưh yơu la dơgrữq kayơu gỡc, song vrơi tơngãn hơnuãq ngãq salơnuãq sigỡuq sì Ba-na-ba gãm sì hlãq, pioh pơnõq hlãq nữn pơweh trôh dơgrữq vual vơla lơniãu, dòq pơnõq nhũ nữn pơweh sì dơgrữq mơnuĩh ãt sìq kalìq, 10mĩn hakơi làiq pơnõq hlãq iỡuq sơdor trôh mơnuĩh rơbah, la kaya nữn hlãq kung song tluỡiq gơhuar ngãq tơviãq.

11Nữn tũq Se-pha nao trôh An-ti-ôt nữn hlãq ròq gơrlah sãp mư di anãq ung kơyua ung đang mang kađòc gơrloh pơkhè. 12Kơyua hlơu sì tũq dơgrữq mơnuĩh mưng Ja-kơ trôh, ung song bõc sigỡuq sì dơgrữq mơnuĩh ia lơniãu. Nữn tũq pơnõq nhũ trôh, ung song kadũn tơviãq sì pa-chơlah rùp drơi dòq krơi, kơyua huaĩq dơgrữq mơnuĩh pơweh sì tơpuôl hũ ãt sìq kalìq. 13Sì dơgrữq mơnuĩh Ju-đa tơmo kung pa-tơma tơpuôl ngãq nao vlữq lor tui yơu ung, nữn gãm Ba-na-ba kung kađòc pa-gơla ngãq tui kaya lơđãp ngãq vruãq vlữq lor pơnõq nhũ hũ. 14Nữn dơlãp tũq hlãq bôh làiq pơnõq nhũ ôh ngãq nao tui tơpãq yơu pơnuaĩq tơpãq kaya Pơnuaĩq Siàp hũ, hlãq song đơp sì Se-pha di anãq dơgrữq mơnuĩh: “Mơyah làiq sơai, la mơnuĩh Ju-đa, hadiuq yơu mơnuĩh ia lơniãu nữn ôh drưh yơu mơnuĩh Ju-đa, nữn ngãq hayơu sơai pơlih hũ gơnuar pagùq pơ-èp mơnuĩh ia lơniãu iỡuq hadiuq drưh yơu mơnuĩh Ju-đa?” 15Pơnõq hlãq la mơnuĩh Ju-đa mưng tũq đẽh tơviãq, nữn ôh iỡuq mơnuĩh dlàiq tơviãq mưng mơnuĩh gah ia lơniãu; 16nữn kơyua thơu làiq ôh sa aràc mơnuĩh halơi hũ angãn tơpãq dãng gơnang mưng vruãq ngãq tui voh-va, lơniãu nữn la gơnang mưng voh tui dơlãp Yàc Dõc Pơ-tlah Je-su, yơu nữn pơnõq hlãq song pioh hatai chàc gơnang dơlãp Yàc Dõc Pơ-tlah Je-su, pioh pơnõq hlãq hũ angãn tơpãq dãng gơnang mưng voh tui dơlãp Yàc Dõc Pơ-tlah nữn ôh iỡuq gơnang mưng vruãq ngãq tui voh-va. Kơyua dơgrữq rơlo rùp ròq ôh tũq halơi hũ angãn la tơpãq dãng kơyua mưng vruãq ngãq tui voh-va. 17Nữn mơyah làiq, ãn tũq duah pơnẽq hũ angãn tơpãq dãng dơlãp Yàc Dõc Pơ-tlah, mĩn rùp phuỗt pơnõq hlãq kung kađòc iãq bôh la mơnuĩh hũ dlàiq, nữn ơdah làiq Yàc Dõc Pơ-tlah la mơnuĩh duh vruãq ga dlàiq dơnũh yơh? Kaya nữn la ôh tũq halơi hũ! 18Kơyua mơyah làiq hlãq vỡq padỡc wỡq dơgrữq kaya nữn drơi song pa-lơhiãq, nữn hlãq ngãq chưng drơi làiq la mơnuĩh sỗq adãt adia. 19Kơyua pa-thơu mưng voh-va, hlãq song mơtai pơweh sì voh-va, pioh hlãq pơlih hadiuq ga Yàc Pô Lơngĩq. Hlãq song kađòc pỡc đĩn tơma kayơu pỡc sigỡuq sì Yàc Dõc Pơ-tlah, 20bôh làiq hlãq ôh dòq hadiuq tơra, nữn la Yàc Dõc Pơ-tlah hadiuq dơlãp hlãq. Dòq rài hadiuq nữn tũq nĩ hlãq ãn hadiuq dơlãp rơlo rùp, nữn hlãq hadiuq dơlãp voh tui dơlãp Anàq Yàc Pô Lơngĩq, Pitao song anĩt duman hlãq sì tlàq rùp phuỗt Pitrai ala ga hlãq. 21Hlãq ôh kơh tlàq kaya anĩt Yàc Pô Lơngĩq ôh, kơyua mơyah làiq kaya tơpãq dãng la kơyua mưng voh-va, nữn yơh Yàc Dõc Pơ-tlah ãt mơtai sa vĩq ôh kuơ!