Ga-la-ti 4

1Nữn hlãq ưng đơp làiq tãl trôh tũq halơi mơnuĩh hũ vơnah patui la dòq lơđeh tìt, nữn mơnuĩh nữn ôh krơi yơu sa aràc mơnuĩh halỗt, bôh làiq mơnuĩh nữn la pô apãt avih dơgrữq kaya mơnã drơi hũ. 2Pa-vlữq wỡq, mơnuĩh nữn dòq pãq ala dơgrữq mơnuĩh gơnuar dõc jơga sì dơgrữq mơnuĩh apãt akõq tãl trôh tũq song ngãq gơnĩt hlơu mưng mơnuĩh ama hũ. 3Kung yơu nữn, dơlãp tũq pơnõq drơi dòq la lơđeh tìt, pơnõq drơi kađòc ngãq halỗt ga dơgrữq vruãq kaya lơđãp ngãq dun kơyua hũ. 4Nữn tũq harơi wil tãl song trôh, Yàc Pô Lơngĩq song pơđar Anàq Pitrai, tũq đeh tơviãq mưng sa aràc mơnuĩh kamơi, đeh tơviãq pãq ala gơnuar voh-va, 5pioh Pitrai dơvuh sơlih dơgrữq mơnuĩh dòq pãq ala gơnuar voh-va, tồq ga pơnõq drơi pơlih tồq mãq hũ gơnuar ngãq anàq ròc. 6Vơnah tơmo, kơyua pơnõq adơi sơai la anàq, yơu nữn Yàc Pô Lơngĩq song pơđar Yàc Vơngãq Sơđah Anàq Pitrai hũ tơma dơlãp hatai pơnõq drơi, iơu prõng làiq: “A-ba, la Ama.” 7Kơyua nữn, pơnõq adơi sơai ôh dòq la mơnuĩh halỗt mơnãq tơra, nữn la anàq, nữn mơyah làiq la anàq, nữn kung la mơnuĩh hũ vơnah patui gơnang di Yàc Pô Lơngĩq.

8Nữn hlơu thrơi, tũq ka-ôh thơu Yàc Pô Lơngĩq, pơnõq adơi sơai song kađòc ngãq halỗt mơnãq ga dơgrữq kaya nữn mưng rơlo rùp ôh iỡuq la vơngãq yàc hagĩq ôh. 9Dòq tũq nĩ nữn song iãq thơu Yàc Pô Lơngĩq, nữn iỡuq rlao wỡq la song hũ Yàc Pô Lơngĩq thơu trôh, nữn ngãq hayơu pơnõq adơi sơai vloh gơlàiq mai wỡq sì dơgrữq vruãq kaya lơđãp ngãq rơlo rùp lơduh lơmuỡn sì ôh jỡc chãq, hayơu pơnõq adơi sơai ưng gơlàiq mai wỡq ưng ngãq halỗt mơnãq ga pơnõq nhũ pơtãl sa bãc tơra wỡq yơh? 10Pơnõq adơi sơai miẽt dòq iãq mưng harơi, vlàt, vlàt yuãq sì thũt! 11Hlãq ka-ồq mơ-ôh viãq ga pơnõq adơi sơai, huaĩq làiq yơu halơi hlãq song ngãq vruãq dleh dlàr savĩq ôh kuơ di khrãh pơnõq adơi sơai.

12Ơ pơnõq adơi sơai, hlãq lakơu pơnõq adơi sơai iỡuq tơviãq jỡc drưh yơu hlãq, kơyua hlãq kung drưh yơu pơnõq adơi sơai. Pơnõq adơi sơai ôh ngãq kaya sơnẽq sỗq ga hlãq sa asĩt halơi. 13Pơnõq adơi sơai thơu làiq pa-thơu mưng kaya lơduh lơmuỡn dơlãp rùp phàp nĩ, hlãq song akhàt vrơi pa-thơu Pơnuaĩq Siàp ga pơnõq adơi sơai bãc tũq chơmrờp. 14Sigỡuq sì kaya pa-lòc pãq dlòc pơnõq adơi sơai dơlãp kaya wãc rơsi rùp phàp hlãq, pơnõq adơi sơai ròq ôh tũq halơi iãq ôh srãp, kung ôh kơmlah tlàq, pa-vlữq wỡq, pơnõq adơi sơai, vloh tồq ròq hlãq yơu mơnuĩh gơnrơh Yàc Pô Lơngĩq hũ, yơu Yàc Dõc Pơ-tlah Je-su. 15Yơu nữn, kaya sơh sơr nữn pơnõq adơi sơai hũ dòq pãq halơi? Kơyua hlãq ngãq chưng ga pơnõq adơi sơai làiq, mơyah làiq pơlih jỡc, pơnõq adơi sơai kung song alẽc mơta drơi hũ, nữn alĩn vrơi ga hlãq. 16Yơu nữn la, hlãq song tơviãq jỡc mơnuĩh jơdrãq sì pơnõq adơi sơai hũ kơyua đơp pơnuaĩq tơpãq viãq ga pơnõq adơi sơai yơh? 17Dơgrữq mơnuĩh nữn tluỡiq gơhuar sì pơnõq adơi sơai, ôh iỡuq hũ hatai siàp, nữn pơnõq nhũ ưng pa-chơlah pơnõq adơi sơai tơviãq krơi, tồq ga pơnõq adơi sơai tluỡiq gơhuar sì pơnõq nhũ. 18Nữn ãt tluỡiq gơhuar dơgrữq tũq ga kaya siàp nữn la siàp, nữn ôh iỡuq mĩn tũq hlãq hũ mơta sigỡuq sì pơnõq adơi sơai. 19Ơ pơnõq anàq kơu hũ, kơyua mưng pơnõq anàq nữn kơu ãt kaya pơđìq pơđua jẽq đeh sa bãc tơra tãl trôh tũq Yàc Dõc Pơ-tlah hũ tơviãq jỡc sẽq rùp dơlãp pơnõq anàq — 20vơnah tơmo, kơu chơkhãq chàc ưng dòq jẽq sigỡuq sì pơnõq anàq mư tũq nĩ sì pa-sơdua sãp đơp kơu hũ, kơyua kơu ãn dòq dỡq dỡng kơđa mưng pơnõq anàq.

21Nĩ dơgrữq mơnuĩh ưng dòq gah ala voh-va, iỡuq vrơi ga kơu thơu, pơnõq adơi sơai ôh pa hmỡq voh-va pơto pơđar yơh? 22Kơyua hũ pơnuaĩq wãq làiq A-bra-ham hũ dua aràc anàq lakơi, sa aràc la mưng mơnuĩh kamơi ngãq halỗt, sì sa aràc la mưng mơnuĩh kamơi lanơng lơnai. 23Bôh làiq yơu nữn, anàq mưng mơnuĩh kamơi halỗt hũ đeh tơviãq tui rơlo rùp, dòq anàq mưng mơnuĩh kamơi lanơng lơnai hũ đeh tơviãq kơyua mưng pơnuaĩq hẽ grưh. 24Dơgrữq vruãq nĩ nữn hũ đơp trôh yơu sa pơnuaĩq pa-mơyơu, kơyua dua aràc mơnuĩh kamơi nữn la dua pơnuaĩq hẽ grưh. Sa pơnuaĩq hẽ grưh pãq chỡq Si-nai, đeh anàq tơviãq pioh ngãq halỗt. Nữn la A-ga. 25A-ga la chỡq Si-nai pãq A-ra-bi, sì ôh krơi yơu palơi Je-ru-sa-lem tũq nĩ, kơyua palơi nữn sigỡuq sì anàq tơcho drơi ãn dòq ngãq halỗt. 26Nữn Je-ru-sa-lem pãq dlòc lơngĩq nữn lơnang lơnai, sì nữn la ami pơnõq drơi hũ. 27Kơyua hũ pơnuaĩq wãq:

“Iỡuq uỗt sơh, ơ mơnuĩh kamơi kơtuãl, la mơnuĩh kamơi ôh đeh anàq;

Iỡuq mãq sãp priãu tơgùq sì driãu prong sơh sơr, ơ mơnuĩh ôh pơđìq pơđua kơyua đeh anàq;

Kơyua anàq tơcho mơnuĩh kamơi kađòc tlàq luơi hũ lũ rlao sì anàq tơcho mơnuĩh kamơi hũ vơsàc.”

28Pa-thơu pơnõq adơi sơai, drưh yơu Y-sac, pơnõq adơi sơai la anàq pơnuaĩq hẽ grưh hũ. 29Bôh làiq yơu nữn, yơu tũq rài sơđãq, anàq hũ pajỡc tơviãq tui rơlo rùp mãq pakỡuq anàq pajỡc tơviãq tui Yàc Vơngãq Sơđah yơu halơi, nữn tũq nĩ kung yơu nữn mĩn. 30Nữn Sơrãq Sơđah đơp hagĩq? “Iỡuq pơtiãuq mơnuĩh kamơi halỗt gãm sì anàq nhũ hũ. Kơyua anàq mơnuĩh kamơi halỗt viãq nhũ ròq ôh hũ vơnah patui sigỡuq sì anàq mơnuĩh kamơi lanơng lơnai hũ.” 31Kơyua yơu nữn, pa-thơu pơnõq adơi sơai, pơnõq drơi ôh iỡuq la anàq mơnuĩh kamơi halỗt hũ, nữn la anàq mơnuĩh kamơi lanơng lơnai hũ.