2 Kô-rin-tô 8

1Pa-thơu pơnõq adơi sơai, pơnõq hlãq ưng ràc tơviãq ga pơnõq adơi sơai thơu mưng kaya anĩt Yàc Pô Lơngĩq hũ vrơi ga dơgrữq Sàc Pơjũm Sơđah pãq lơgar Ma-se-đoan, 2nữn la dơlãp kaya rũc rài kơyua mưng kaya lòc tơrãq viãq mưng kaya mãq pakỡuq, kaya sơh sơr dơlah dơlai sì kaya rơbah ka-sõt rơbah ờq lơ-pa pơnõq nhũ hũ song vãq sơrè tơviãq jỡc kaya mơda gơnãp mưng hatai lơnang lơnai drơi hũ. 3Kơyua hlãq ngãq chưng làiq pơnõq nhũ song vuh jĩn tui prãn pơnõq nhũ, sì kơyua mưng hatai ưng pioh, vloh dòq ngãq tơpa rlao tui prãn drơi, 4pơnõq nhũ song avih prãn aneh-athar lakơu, lakơu pơnõq hlãq vrơi ga pơnõq nhũ hũ kaya anĩt sì kung hũ vơnah dơlãp gơnuar vruãq ngãq dõc dơgrữq mơnuĩh pơđar prõng nĩ. 5Sì ôh mĩn ngãq tui dơgrữq pơnẽq pơnõq hlãq song chơkhãq chàc, nữn halơu avih pơnõq nhũ song pioh rùp drơi duh vruãq Yàc, vloh duh vruãq gãm pơnõq hlãq, gơnang di hatai ưng Yàc Pô Lơngĩq hũ. 6Yơu nữn, pơnõq hlãq hũ pơto pasũl Tit, tồq nhũ song pơdòq ngãq vruãq ngãq siàp nĩ yơu halơi, nữn kung yơu nữn, nhũ kung pơlih ngãq wil tãl vruãq ngãq siàp nữn dơlãp pơnõq adơi sơai yơu nữn. 7Bôh làiq yơu nữn, yơu pơnõq adơi sơai song tơpa rlao dơlãp dơgrữq kaya, mưng voh tui, mưng pơnuaĩq đơp, mưng kaya pãc thơu, mưng hatai tluỡiq gơhual ngãq avih hatai, sì mưng kaya khiãng duman mưng pơnõq hlãq hũ dòq dơlãp pơnõq adơi sơai, tồq ga pơnõq adơi sơai kung tơpa rlao dơlãp dơgrữq vruãq ngãq siàp nĩ. 8Ôh iỡuq hlãq đơp tui mưng gơnuar pơđar, nữn la mưng hatai tluỡiq gơhual dơgrữq mơnuĩh tơmo hũ, pioh lòc iãq kaya tơpãq siàp mưng kaya khiãng duman pơnõq adơi sơai hũ. 9Kơyua adơi sơai iãq thơu kaya anĩt Yàc pơnõq drơi hũ, la Yàc Dõc Pơ-tlah Je-su, nữn kơyua mưng pơnõq adơi sơai, bôh làiq la mơda gơnãp, nữn Pitrai tơviãq jỡc rơbah, tồq gơnang mưng kaya rơbah Pitrai hũ, nữn pơnõq adơi sơai tơviãq jỡc mơda gơnãp.

10Sì yơu nữn hlãq đơp tơviãq pơnuaĩq sơnơng drơi hũ mưng vruãq ngãq nĩ, kơyua mưng vruãq nĩ hũ kuơ ga pơnõq adơi sơai, la dơgrữq mơnuĩh ôh mĩn song pơdòq ngãq vruãq nĩ mưng sa thũt halơu, nữn dòq chơkhãq khiãng ngãq tơviãq wỡq. 11Yơu nữn tũq nĩ, adơi sơai iỡuq ngãq ga wil tãl vẽq dơgrữq vruãq ãn ngãq, luơi ga hatai chơkhãq khiãng pơnõq adơi sơai hũ rơchãc lơĩh yơu halơi, nữn adơi sơai kung ngãq ga wil tãl yơu nữn mưng dơgrữq kaya hagĩq drơi hũ. 12Kơyua mơyah làiq drơi mãq hatai siàp nữn ngãq, nữn siàp hatai tui yơu dơgrữq kaya drơi hũ, nữn juơi tui kaya drơi ôh hũ.

13Viãq, ôh iỡuq luơi ga pơnõq adơi sơai siẽuq rơbah pioh dõc dơgrữq mơnuĩh tơmo, nữn hlãq ưng hũ kaya kor gỡuq. 14Tui yơu tũq nĩ, pơnõq adơi sơai song hũ dơlah dơlai, lakơu dõc vrơi ga dơgrữq mơnuĩh nữn dơlãp tũq kađòc siẽuq rơbah, tồq ga dơgrữq mơnuĩh nữn hũ dơlah dơlai kung pơlih dõc vrơi ga pơnõq adơi sơai dơlãp tũq kađòc siẽuq, nữn ngãq hayơu ga hũ kor gỡuq, 15drưh yơu song hũ pơnuaĩq wãq:

“Mơnuĩh hũ lũ ôh lơveh,

mơnuĩh hũ tơkìq kung ôh siẽuq.”

16Nữn ỡn ngai Yàc Pô Lơngĩq, Pitao song vrơi dơlãp hatai Tit hũ sa kaya khiãng anĩt tluỡiq gơhuar sigỡuq sì pơnõq adơi sơai. 17Kơyua nhũ nữn bôh làiq song tồq mãq pơnuaĩq pa-sơdor pơnõq hlãq hũ, nữn kơyua mưng hatai tluỡiq gơhual viãq, nhũ song hũ hatai ưng nao trôh pãp pơnõq adơi sơai. 18Vơnah tơmo, pơnõq hlãq song pơđar sa aràc adơi sơai wỡq tồq nao sigỡuq sì nhũ, nữn tiẽng dơnai mơnuĩh nĩ hũ dơlãp Pơnuaĩq Siàp ràc vãq avih dơgrữq sàc pơjũm sơđah; 19nữn ôh mĩn hũ yơu nữn, nữn nhũ dòq hũ dơgrữq Sàc Pơjũm Sơđah duỡt ruãh pioh nao sigỡuq sì pơnõq hlãq, tồq ngãq tơviãq dơgrữq vruãq siàp nĩ, la vruãq nữn pơnõq hlãq ãn ngãq nĩ la pioh ngãq gơhluh angãn Yàc, sì ràc tơviãq hatai tluỡiq gơhual pơnõq hlãq hũ; 20tũq pơnõq hlãq thơu gơrhia yơu nữn, pioh ôh hũ asơi gơrloh pơkhè pơnõq hlãq jỡc mưng vruãq pơnõq hlãq apãt angui lũ jĩn pơgòp nĩ. 21Pơnõq hlãq iãq pơwih halơu ưng ngãq vruãq siàp, ôh iỡuq mĩn di anãq Yàc, nữn gãm di anãq dơgrữq aràc mơnuĩh wỡq.

22Lơniãu nữn, pơnõq hlãq song pơđar sa aràc mơnuĩh adơi sơai tơmo kung la adơi sơai pơnõq hlãq hũ nao sigỡuq sì pơnõq nhũ, nữn la mơnuĩh nữn pơnõq hlãq song lòc iãq dơlãp lũ dơgrữq vơnah, kơyua hũ hatai tluỡiq gơhual, nữn tũq nĩ brõq pơtãl kaya tluỡiq gơhual rlao kơyua hatai pãc gơnang prõng dơlãp pơnõq adơi sơai. 23Mơyah làiq pơweh sì Tit, nhũ la mơnuĩh ngãq vruãq sì hlãq kung la ban mơyơu ngãq vruãq sigỡuq pioh dõc pơnõq adơi sơai. Dòq mơyah làiq pơweh mưng dơgrữq adơi sơai dih, pơnõq nhũ la mơnuĩh ãt pơđar mưng dơgrữq Sàc Pơjũm Sơđah hũ, sì dơgrữq mơnuĩh ngãq gơhluh angãn Yàc Dõc Pơ-tlah. 24Kơyua yơu nữn, dơlãp tũq vrơi pa-thơu sì pơnõq nhũ mưng kaya khiãng duman pơnõq adơi sơai hũ sì kung yơu kaya pa-prõc rùp pơnõq hlãq hũ mưng pơnõq adơi sơai pioh ràc tơviãq di anãq sàc pơjũm sơđah thơu.