2 Kô-rin-tô 7

1Kơyua nữn, ơ pơnõq adơi sơai anĩt duman, kơyua pơnõq drơi hũ dơgrữq pơnuaĩq hẽ grưh nữn, yơu nữn pơnõq drơi iỡuq rao sơchih avih dơgrữq kaya tasỡuq nrãc dơlãp rùp phàp drơi sì gah suàt vơngãq, tũq ngãq pa-sơdua tơviãq jỡc wil tãl dơlãp kaya duh huaĩq di Yàc Pô Lơngĩq.

2Iỡuq pioh luơi sa anĩh ga pơnõq hlãq! Pơnõq hlãq ôh-ka ngãq iãh sa aràc halơi; pơnõq hlãq song ôh-ka ngãq sa aràc halơi dơvlữq hatai, pơnõq hlãq ka-ôh ka-nơ di sa aràc halơi. 3Hlãq ôh đơp pioh pơweh trôh pa vruãq ngãq dlàiq pơnõq adơi sơai; kơyua hlãq song đơp hlơu vloh làiq pơnõq adơi sơai dòq dơlãp hatai pơnõq hlãq, tồq ga pơnõq drơi hadiuq sigỡuq sì mơtai sigỡuq. 4Kaya pãc gơnang hlãq hũ dơlãp pơnõq adơi sơai nữn lũ viãq; kaya pa-prõc rùp hlãq hũ mưng pơnõq adơi sơai nữn prõng viãq. Hlãq song hũ vãq sơrè kaya paluơ padờp. Hlãq hũ vãq sơrè kaya uỗt sơh nĩ dơlãp dơgrữq kaya rũc rài pơnõq hlãq hũ.

5Vloh tũq hlãq nao trôh pãq lơgar Ma-se-đoan, rơlo rùp pơnõq hlãq song ôh hũ padơi dleh sa asĩt halơi. Pa-vlữq wỡq, pơnõq hlãq kađòc mãq pakỡuq tãl dơgrữq pơnẽq — gah lơniãu nữn lũ kaya mơvlah mơsôh, dơlãp hatai nữn ka-ồq huaĩq. 6Bôh làiq yơu nữn, Yàc Pô Lơngĩq, Pitao paluơ padờp mơnuĩh dơvlữq hatai, song paluơ padờp pơnõq hlãq mưng vruãq Tit trôh anĩh savĩq dadu lơngai, 7nữn ôh iỡuq mĩn kơyua mưng vruãq nhũ trôh pãq đì, nữn dòq gãm kaya paluơ padờp nữn nhũ song hũ paluơ padờp dơlãp pơnõq adơi sơai, dơlãp tũq akhàt vrơi ga pơnõq hlãq thơu mưng kaya chơkhãq chàc pơnõq adơi sơai hũ, kaya sia chõq pơnõq adơi sơai hũ, hatai tluỡiq gơhual pơnõq adơi sơai hũ kơyua mưng hlãq, yơu nữn hlãq uỗt sơh brõq pơtãl rlao wỡq.

8Nữn vloh mơyah làiq dơlãp sơrãq pơyua nĩ nữn hlãq ngãq ga pơnõq adơi sơai ka-ồq ka-iãp, nữn hlãq ôh iãq pơlai ôh. Mơyah làiq hlãq iãq pơlai wỡq (hlãq iãq bôh làiq sơrãq pơyua nữn song ngãq ga pơnõq adơi sơai ka-ồq ka-iãp, nữn mĩn dơlãp sa asĩt tũq), 9nữn tũq nĩ, hlãq uỗt sơh, ôh iỡuq kơyua pơnõq adơi sơai song ãt ka-ồq ka-iãp, nữn kơyua song ãt ka-ồq ka-iãp ngãq ga adơi sơai pơweh trôh pa kaya mơvai tlàq dlàiq. Kơyua pơnõq adơi sơai song ãt ka-ồq ka-iãp tui hatai ưng Yàc Pô Lơngĩq hũ, tồq ga pơnõq adơi sơai ôh kađòc lơhiãq dơlãp avih dơgrữq kaya halơi kơyua mưng pơnõq hlãq. 10Kơyua kaya ka-ồq ka-iãp tui hatai ưng Yàc Pô Lơngĩq pajỡc tơviãq kaya mơvai tlàq dlàiq pioh pơweh trôh pa kaya dõc pơ-tlah nữn ôh iãq pơlai. Dòq kaya ka-ồq ka-iãp tui dun kơyua nữn ròq va trôh kaya mơtai. 11Iỡuq iãq pơwih, kaya ka-ồq ka-iãp tui hatai Yàc Pô Lơngĩq, nữn song va trôh ga pơnõq adơi sơai hatai tluỡiq gơhual lũ ôh thơu hadùp: hũ kaya dõc jơga yơu halơi, kaya ơnõc mơvai yơu halơi, kaya duh huaĩq yơu halơi, kaya chơkhãq chàc yơu halơi, hatai sơkuãq mơ-ôh yơu halơi, vruãq ngãq dlàiq yơu halơi! Dơlãp dơgrữq kaya, pơnõq adơi sơai song vrơi pa-thơu rùp phuỗt drơi la tơpãq siàp mưng dơgrữq vruãq nĩ. 12Kơyua yơu nữn, bôh làiq hlãq song wãq sơrãq pơyua ga pơnõq adơi sơai, nữn ôh iỡuq kơyua mưng mơnuĩh song ngãq pơyãq sỗq suẽl, hẽla kơyua mưng mơnuĩh song ngãq iãh, nữn la kơyua mưng hatai tluỡiq gơhual pơnõq adơi sơai hũ, la kaya ala mơta ga pơnõq hlãq, song hũ vrơi pa-thơu ga pơnõq adơi sơai di anãq Yàc Pô Lơngĩq. 13Gơnang mưng kaya nĩ, nữn pơnõq hlãq hũ paluơ padờp.

Vơnah tơmo, lơniãu vruãq rùp phuỗt pơnõq hlãq hũ paluơ padờp, pơnõq hlãq song hũ uỗt sơh brõq rlao mưng kaya sơh sơr Tit hũ, kơyua avih tãl aràc adơi sơai song ngãq vơngãq hatai nhũ hũ padơi dleh. 14Kơyua mơyah làiq hlãq hũ pa-prõc rùp mưng kaya hagĩq sì nhũ mưng pơnõq adơi sơai, nữn hlãq song ôh mơlơu ơlah, nữn yơu dơgrữq kaya pơnõq hlãq song đơp sì pơnõq adơi sơai dơlãp kaya tơpãq viãq, nữn pơnuaĩq pa-prõc rùp pơnõq hlãq hũ kung vrơi pa-thơu kaya tơpãq siàp yơu nữn di anãq Tit. 15Sì hatai anĩt duman nhũ hũ pioh ga pơnõq adơi sơai nữn dơlah dơlai rlao wỡq, dơlãp tũq sơdor wỡq kaya pãc sãp mưng avih dơgrữq pơnõq adơi sơai hũ, vloh yơu nữn pơnõq adơi sơai song tồq ròq nhũ mưng hatai tơtơh huaĩq sì tơtơh drơi. 16Hlãq uỗt sơh kơyua song pãc gơnang di pơnõq adơi sơai dơlãp avih dơgrữq vruãq.