2 Kô-rin-tô 6

1Vơnah tơmo, la mơnuĩh ãn ngãq vruãq sigỡuq sì Pitrai, pơnõq hlãq kung rãn lakơu pơnõq adơi sơai juơi tồq mãq kaya anĩt Yàc Pô Lơngĩq savĩq ôh kuơ — 2kơyua Pitrai đơp làiq:

“Dơlãp tũq hũ tũq lơwah, kơu song hmỡq sì tồq pơnuaĩq anàq,

sì dơlãp harơi dõc pơ-tlah, kơu song dõc suãq anàq.”

“Nĩ, tũq nĩ la hũ tũq lơwah. Nĩ, tũq nĩ la harơi dõc pơ-tlah.” —

3pơnõq hlãq ôh ngãq sơnẽq sỗq dơlãp dơgrữq kaya halơi nữn, tồq gơnuar vruãq pơnõq hlãq ôh kađòc iãq tiẽng dơnai iãh, 4pa-vlữq wỡq, dơlãp dơgrữq kaya, pơnõq hlãq vrơi pa-thơu rùp phuỗt drơi yơu dơgrữq mơnuĩh halỗt mơnãq Yàc Pô Lơngĩq hũ: dơlãp kaya ãt-ỡl prõng viãq, dơlãp kaya rũc rài lũ viãq, dơlãp kaya dleh dlàr, dơlãp kaya siẽuq rơbah, 5tũq ãt atòc poh, tũq kađòc krỡq jam, dơlãp vruãq ngãq salũng sơlãng, dơlãp vruãq ngãq dleh dlàr, dơlãp dơgrữq mơlãp ôh pìq jỡc, tũq ãt kaya ờq lơ-pa, 6dơlãp kaya sơđah sơchih, dơlãp kaya pãc thơu, dơlãp kaya ãt-ỡl, dơlãp kaya lơmuỡn siàp, dơlãp Yàc vơngãq sơđah, dơlãp kaya anĩt duman tơpãq viãq, 7dơlãp pơnuaĩq tơpãq viãq, dơlãp gơnuar chơnuãq Yàc Pô Lơngĩq hũ; mưng dơgrữq kaya mơsôh tơpãq rĩng dơlãp tơngãn hơnuãq sì tơngãn iãu, 8tũq hũ mơ-àc mơyàc gãm sì siẽq siẽl, hũ va tiẽng dơnãi iãh gãm sì hũ tiẽng dơnãi siàp; iãq yơu mơnuĩh pơgàt pa-gơla, nữn vloh tơpãq hatai; 9iãq yơu mơnuĩh ôh thơu trôh, nữn vloh hũ lũ mơnuĩh thơu; iãq yơu jẽq mơtai, nữn — nĩ! — mĩn dòq hadiuq; iãq yơu ãt kaya ngãq dlàiq, nữn vloh ôh kađòc pa-mơtai; 10iãq yơu ka-ồq ka-iãp, nữn hũ kaya uỗt sơh gãm; iãq yơu ka-sõt rơbah, nữn vloh ngãq ga lũ mơnuĩh tơviãq jỡc mơda; iãq yơu ôh hũ kaya hagĩq, nữn vloh hũ angui tãl dơgrữq kaya.

11Ơ pơnõq adơi sơai mơnuĩh pãq palơi Kô-rin-tô, mơvah pơnõq hlãq song pơh tơviãq pơweh sì pơnõq adơi sơai; sì hatai pơnõq hlãq song pơh tơviãq lơnang lơnai. 12Ôh iỡuq pơnõq adơi sơai kađòc ngãq pơyãq kơyua mưng pơnõq hlãq, nữn pơnõq adơi adơi sơai vloh kađòc ngãq pơyãq kơyua mưng dơlãp tũc hatai drơi; 13yơu nữn pơnõq hlãq ngãq pơyãq yơu halơi nữn pơnõq adơi sơai ngãq pơyãq sì pơnõq hlãq yơu nữn — hlãq đơp yơu đơp sì lơđeh tìt — pơnõq adơi sơai kung iỡuq pơh tũc hatai drơi tơviãq lơnang lơnai.

14Juơi gơlãp yãu sigỡuq sì mơnuĩh ôh pãc-tui. Kơyua kaya tơpãq dãng sì kaya iãh mơsãc nhũ ngãq salơnuãq sigỡuq jỡc mĩn? Hẽla kaya sơdah sì kaya sồp kơnãm nhũ ngãq salơnuãq sigỡuq yơu hayơu? 15Yàc Dõc Pơ-tlah sì Be-li-an sa hatai ngãq salơnuãq sigỡuq yơu hayơu? Hẽla mơnuĩh pãc-tui hũ vơnah halơi ngãq salơnuãq sigỡuq sì mơnuĩh ôh pãc-tui? 16Sàc duh talơvãt Yàc Pô Lơngĩq hũ sigỡuq sì rùp rãp hũ kaya hagĩq pioh ngãq salơnuãq? Kơyua pơnõq drơi la sàc duh talơvãt Yàc Pô Lơngĩq gãm hadiuq, drưh yơu Yàc Pô Lơngĩq song đơp:

“Kơu ròq dòq dơlãp pơnõq nhũ sì nao mai dơlãp pơnõq nhũ;

Kơu ròq la Yàc Pô Lơngĩq pơnõq nhũ,

nữn pơnõq nhũ ròq la vual vơla Kơu.”

17Yơu nữn:

“Iỡuq tơviãq tlah vẽq mưng pơnõq nhũ nữn pa-chơlah

sì pơnõq nhũ,” Yàc đơp,

“sì juơi rơwỡq trôh kaya tasỡuq nrãc,

vloh Kơu ròq tồq mãq pơnõq anàq.”

18Sì

“‘Kơu ròq ngãq Ama pơnõq anàq,

sì pơnõq anàq ròq ngãq anàq lakơi, anàq kamơi Kơu,’

Yàc Gơnuar Chơnuãq Rlao Avih đơp yơu nữn.”