2 Kô-rin-tô 5

1Kơyua pơnõq drơi thơu làiq mơyah làiq sàc pãq ala hlùq pơnõq drơi hũ — nữn la sa voh tlam pơnõq drơi hadiuq ga dơlãp — kađòc yah pa-lơhiãq, nữn pơnõq drơi hũ sa voh sàc vỡq padỡc mưng Yàc Pô Lơngĩq, la sàc dòq gãm gãm pãq dlòc lơngĩq, ôh iỡuq mưng tơngãn anàq mơnuĩh ngãq tơviãq. 2Nữn viãq, pơnõq drơi rơbòp kơmrão dơlãp tlam padơh nĩ, ãn chơkhãq chàc chồq mãq sa anĩh dòq pơnõq drơi hũ pãq dlòc lơngĩq, 3sì viãq mơyah làiq song chồq tơma vloh, nữn pơnõq drơi ròq ôh kađòc iãq la dòq kalôh salũt. 4Viãq yơu nữn, la dơgrữq mơnuĩh tũq nĩ ãn dòq dơlãp tlam padơh nĩ, pơnõq drơi suãq yuà mưng kaya anòng tơrãq — kơyua mưng kaya nữn pơnõq drơi ôh ưng wàq luơi, nữn ưng hũ chồq pơtãl tơma wỡq, pioh ga dơgrữq kaya halơi iỡuq mơtai pơlih kađòc mưng kaya hadiuq luỗt tơma thĩt. 5Vơnah tơmo, Pitao song rơchãc lơĩh kaya nĩ ga pơnõq drơi nữn la Yàc Pô Lơngĩq, la Pitao song vrơi Vơngãq Sơđah ga pơnõq drơi pioh ngãq chưng. 6Kơyua yơu nữn, bôh làiq hũ hatai chàc gơnang gãm nữn iỡuq thơu làiq tũq dòq dơlãp sàc gah rơlo rùp nĩ, nữn pơnõq drơi ãn dòq atah di Yàc — 7Kơyua pơnõq drơi yàp nao gơnang mưng voh tui, ôh iỡuq gơnang mưng mơta bôh — 8Nữn pơnõq hlãq mĩn chàc gơnang gãm vloh ưng tlàq luơi di rùp phàp nĩ nữn nao dòq sì Yàc siàp rlao. 9Yơu nữn pơnõq hlãq avih hatai avih prãn pioh siàq hatai Yàc, bôh làiq ãn dòq dơlãp sàc hẽla tơviãq di rùp phàp nĩ. 10Kơyua avih tãl aràc pơnõq drơi iỡuq dòq dỡc di anãq sơvan chahrơna Yàc Dõc Pơ-tlah hũ, pioh ga avih tãl aràc pơlih tồq mãq dơgrữq kaya halơi iỡuq yơu dơgrữq vruãq nữn drơi song ngãq dơlãp tũq dòq dơlãp rơlo rùp, pơlih la vruãq ngãq siàp hẽla vruãq iãh mơsãc.

11Yơu nữn, kơyua thơu duh huaĩq di Yàc, yơu nữn pơnõq hlãq iơu jàq dơgrữq mơnuĩh. Dòq Yàc Pô Lơngĩq thơu gơnĩt pơnõq hlãq, nữn hlãq kung chơkhãq chàc adơi sơai kung thơu gơnĩt pơnõq hlãq dơlãp tũc hatai adơi sơai. 12Ôh iỡuq pơnõq hlãq vloh ãn đơp siàp mưng rùp drơi sì adơi sơai ôh, nữn la pơnõq hlãq ãn vrơi ga adơi sơai hũ tũq lơwah pioh pa-prõc rùp mưng pơnõq hlãq, pioh ga adơi sơai thơu iỡuq drơ wỡq yơu halơi ga dơgrữq mơnuĩh lơđãp yeh drơi mưng gah lơniãu nữn ôh mưng gah dơlãp tũc hatai. 13Mơyah làiq pơnõq hlãq jỡc kruãq hanruơi, nữn la kơyua mưng Yàc Pô Lơngĩq; dòq mơyah làiq pơnõq hlãq thơu iãq gơrhia, nữn la kơyua mưng adơi sơai. 14Kơyua kaya anĩt duman Yàc Dõc Pơ-tlah pachôh pasũl pơnõq hlãq, hadơi sì tũq pơnõq hlãq pa-luỗiq pơnuaĩq yơu nĩ: nữn la sa aràc song mơtai ala ga dơgrữq mơnuĩh; yơu nữn, avih tãl aràc kung mơtai. 15Pitrai song mơtai ala ga avih tãl aràc, pioh ga dơgrữq mơnuĩh ãn hadiuq ôh dòq hadiuq kơyua mưng rùp phàp drơi tơra, nữn kơyua mưng Pitao song mơtai ala ga drơi sì song hadiuq wỡq ga drơi. 16Kơyua yơu nữn, mưng tũq nĩ wỡq sì hadơi, pơnõq hlãq ôh dòq kơnãl thơu mơnuĩh halơi tui rơlo rùp. Nữn vloh bôh làiq pơnõq hlãq song kơnãl thơu Yàc Dõc Pơ-tlah tui rơlo rùp, nữn tũq nĩ, pơnõq hlãq kung ôh dòq kơnãl thơu Pitrai drưh yơu pơnẽq nữn tơra. 17Yơu nữn, mơyah làiq mơnuĩh halơi dòq dơlãp Yàc Dõc Pơ-tlah nữn mơnuĩh nữn la sa kaya chrơng pajỡc vơhrơu. Dơgrữq kaya tlãq song gãt tơpa avih vloh; nĩ, dơgrữq kaya song tơviãq jỡc vơhrơu. 18Bôh làiq yơu nữn, avih dơgrữq kaya nĩ trôh mưng Yàc Pô Lơngĩq, la Pitao song ngãq ga pơnõq drơi salơnuãq wỡq sì Pitrai gơnang mưng Yàc Dõc Pơ-tlah nữn song pơjao ga pơnõq hlãq gơnuar vruãq ngãq salơnuãq nĩ, 19nữn yơu la Yàc Pô Lơngĩq dòq dơlãp Yàc Dõc Pơ-tlah, tũq ngãq ga anàq mơnuĩh dơlãp dun kơyua hũ salơnuãq wỡq sì Pitrai, ôh karhia dơgrữq dlàiq dơnũh pơnõq nhũ song sỗq, sì pơjao vrơi dơgrữq pơnuaĩq pơto akhàt ngãq kaya salơnuãq nữn ga pơnõq hlãq.

20Kơyua nữn, pơnõq hlãq la mơnuĩh gơnuar pơđar ala mơta Yàc Dõc Pơ-tlah, nữn yơu Yàc Pô Lơngĩq ãn iơu jàq pơnõq adơi sơai mưng pơnõq hlãq: Pơnõq hlãq mãq angãn Yàc Dõc Pơ-tlah nữn lakơu iơu jàq adơi sơai: “Iỡuq ngãq salơnuãq vẽq sì Yàc Pô Lơngĩq!” 21Pitrai song ngãq ga Pitao song ôh thơu dlàiq dơnũh tơviãq jỡc dlàiq dơnũh kơyua mưng pơnõq drơi, pioh dơlãp Pitao nữn pơnõq drơi tơviãq jỡc kaya tơpãq dãng di anãq Yàc Pô Lơngĩq hũ.