2 Kô-rin-tô 9

1Dòq mưng vruãq dõc đơ ga dơgrữq mơnuĩh gơnuar pơđar prõng, nữn nĩ la vruãq hlãq ôh chàc wãq pơyua ga pơnõq adơi sơai tơra. 2Kơyua hlãq thơu hatai rơchãc lơĩh pơnõq adơi sơai hũ, la kaya nữn hlãq ala mơta pơnõq adơi sơai song akhàt sì dơgrữq mơnuĩh pãc-tui yàc pãq Ma-se-đoan làiq, sàc pơjũm sơđah pãq palơi A-chai song rơchãc lơĩh mưng sa thũt hlơu, sì hatai sơkuãq mơ-ôh pơnõq adơi sơai hũ song pasũl hatai lũ mơnuĩh tơmo wỡq. 3Nữn hlãq song pơđar dơgrữq adơi sơai dih nao trôh, tồq ga pơnuaĩq mơyòp pơnõq hlãq mưng pơnõq adơi sơai ôh tơviãq jỡc iãq ôh kuơ dơlãp vruãq nĩ, tồq pioh ga pơnõq adơi sơai rơchãc halơu yơu hlãq song đơp. 4Huaĩq, mơyah làiq hũ pơnõq adơi sơai pãc-tui yàc pãq Ma-se-đoan halơi nao sigỡuq sì hlãq trôh nữn iãq bôh làiq pơnõq adơi sơai ôh-ka rơchãc lơĩh, nữn pơnõq hlãq iỡuq kađòc mơlơu ơlah — nữn la ka-ôh đơp trôh pơnõq adơi sơai — kơyua pơnõq hlãq song pãc gơnang yơu nữn. 5Yơu nữn hlãq sơnơng iỡuq pachôh pasũl dơgrữq adơi sơai nữn nao trôh pãp adơi sơai halơu sì rơmiãq rơchãc lơĩh mưng katih kaya mơnã nữn adơi sơai song hẽ vrơi, tồq ga kaya mơnã vrơi soh ròq rơchãc lơĩh yơu sa kaya dadu lơngai, nữn ôh yơu mưng vruãq kađòc pơgùq pơ-èp.

6Vơnah tơmo, hlãq đơp kaya nĩ: mơnuĩh halơi dơràq tơkìq nữn ròq yuãq hũ tơkìq, mơnuĩh halơi dơràq lũ nữn ròq yuãq hũ lũ, sì mơnuĩh halơi dơràq kaya dadu lơngai nữn ròq yuãq dơlãp kaya dadu lơngai. 7Dơgrữq tãl aràc pioh kaya ngãm tui yơu drơi ngãq gơnĩt halơu dơlãp hatai, ôh ngãq tơviãq mưng hatai ka-ồq ka-iãp hẽla pagùq pơ-èp, kơyua Yàc Pô Lơngĩq anĩt duman mơnuĩh pioh kaya ngãm mưng hatai sơh sơr. 8Dòq Yàc Pô Lơngĩq hũ gơnuar vrơi ga pơnõq adơi sơai dơlah dơlai dơgrữq kaya anĩt, pioh gãm dơlãp dơgrữq kaya, kơyua hũ tãl avih dơgrữq kaya pioh angui, pơnõq adơi sơai pơlih hũ savĩq dơlah dơlai dơlãp dơgrữq vruãq ngãq siàp. 9Yơu hũ wãq:

“Mơnuĩh halơi pa-phanh tơviãq kaya mơnã drơi hũ, mơnuĩh halơi pa-mơpha ga mơnuĩh rơbah,

nữn kaya tơpãq dãng pơnõq nhũ dòq gãm gãm ôh luôĩq.”

10Vơnah tơmo, Pitao pa-phanh asar pơjẽh ga mơnuĩh dơràq pơjẽh sì bẽn pioh ngãq kaya bõc pioh ròc chiẽp drơi, sì ròq pơtãl rlao asar pơjẽh pioh adơi sơai dơràq tơviãq, vloh ròq ngãq ga voh chơtai kaya tơpãq dãng adơi sơai hũ pơtãl lũ rlao wỡq, 11dơlãp tũq hũ dơlah dơlai dơlãp dơgrữq vơnah pioh avih hatai lơnang lơnai, la kaya nữn lũ mơnuĩh va trôh pơnuaĩq ỡn ngai Yàc Pô Lơngĩq mưng pơnõq drơi, 12kơyua mưng vruãq ngãq nĩ ôh mĩn la ngãq pơtãl dơgrữq kaya iỡuq angui dơgrữq mơnuĩh gơnuar pơđar hũ, nữn dòq ngãq ga vãq sơrè mưng lũ pơnuaĩq ỡn ngai Yàc Pô Lơngĩq, 13vruãq ngãq dõc nĩ la chưng tang pioh pơnõq nhũ sơ-uỗt mơyòp Yàc Pô Lơngĩq, kơyua kaya pãc sãp Pơnuaĩq Siàp Yàc Dõc Pơ-tlah hũ nữn pơnõq adơi sơai song ràc tơviãq sì kơyua hatai lơnang lơnai pơnõq adơi sơai hũ song pa-mơpha ga pơnõq nhũ gãm sì dơgrữq mơnuĩh, 14gãm sì pơnuaĩq iơu lakơu pơnõq nhũ hũ mưng pơnõq adơi sơai, anĩt anar chơkhãq chàc pơnõq adơi sơai kơyua mưng kaya anĩt prõng rlao avih Yàc Pô Lơngĩq hũ dơlãp pơnõq adơi sơai. 15Lakơu kaya ỡn ngai hũ padỡc tơgùq ga Yàc Pô Lơngĩq kơyua kaya vrơi soh Pitrai hũ ôh đơp tơviãq avih!