1 Kô-rin-tô 5

1Vruãq nữn viãq la pơnõq hlãq hmỡq đơp dơlãp di khrãh pơnõq adơi sơai la hũ sa vruãq arĩh athãm, sì kaya arĩh athãm yơu nữn la kaya vloh ôh-ka bôh dơlãp di khrãh dơgrữq vual vơla lơniãu — tơviãq jỡc nữn sa aràc mơnuĩh dih vloh khiãng sơdiuq ama nhũ hũ. 2Dòq pơnõq adơi sơai nữn miẽt yeh drơi, nữn vloh ôh tũq halơi ka-ồq ka-iãp hagĩq, tồq ga mơnuĩh song ngãq vruãq nữn pơlih kađòc pa-trơh tơviãq di khrãh pơnõq adơi sơai. 3Kơyua hlãq, bôh làiq dòq ơtah dơlãp rơlo rùp nữn dơlãp vơngãq hatai mĩn bôh mơta, song chahrơna mơnuĩh sỗq dlàiq yơu nữn vloh, ngãq yơu ãn bôh mơta pãq đỡn. 4Dơlãp angãn Yàc pơnõq drơi, la Yàc Dõc Pơ-tlah Je-su, tũq pơnõq adơi sơai song hũ pơjũm pơtõm gỡuq wỡq, sigỡuq sì vơngãq hatai hlãq hũ, gãm sì gơnuar chơnuãq Yàc pơnõq drơi hũ, la Yàc Je-su, 5pioh pơjao mơnuĩh nữn ga Sa-tan tồq ãt kaya pa-lơhiãq gah rơlo rùp, ngãq hayơu gah suàt vơngãq mơnuĩh nữn pơlih hũ dõc pơ-tlah dơlãp harơi Yàc hũ. 6Kaya yeh drơi pơnõq adơi sơai hũ ôh siàp mơkrờ hagĩq. Pơnõq adơi sơai ôh thơu làiq sa katĩt voh tapơi ngãq vrùq avih sakhũc hlỡq yơh? 7Iỡuq rao sơchih voh tapơi tlãq, pioh pơnõq adơi sơai pơlih la sakhũc hlỡq vơhrơu, drưh yơu pơnõq adơi sơai la bẽn ôh hũ voh tapơi. Kơyua Yàc Dõc Pơ-tlah, la avo anàq Adãt Bõc Nao Gãt pơnõq drơi hũ, kung song ãt mơtai pioh ngãq kaya padỡc. 8Yơu nữn, pơnõq drơi iỡuq pioh kaya ker-yau harơi adãt nữn, ôh iỡuq mưng voh tapơi tlãq, kung ôh iỡuq mưng voh tapơi vlữq lor sì iãh mơsãc, nữn la mưng bẽn ôh hũ voh tapơi kaya tơpãq viãq sì pơnuaĩq tơpãq hũ.

9Dơlãp srãq pơyuà hlãq song wãq vrơi ga pơnõq adơi sơai la juơi apãt tơngãn sì tơpuôl arĩh athãm — 10viãq yơu nữn ôh iỡuq dơgrữq mơnuĩh arĩh athãm dun kơyua nĩ hũ, hẽla dơgrữq mơnuĩh hãm guãm sì ngãq pa-gơla, hẽla dơgrữq mơnuĩh duh talơvãt rùp rãp, kơyua yơu nữn, pơnõq adơi sơai iỡuq tơviãq tlah mưng dun kơyua. 11Nữn yơu tũq nĩ, hlãq song wãq ga pơnõq adơi sơai juơi apãt tơngãn sì avih dơgrữq mơnuĩh halơi angãn la adơi sơai nữn la mơnuĩh arĩh athãm, ham guãm, duh talơvãt rùp rãp, rơđãp puaĩq mơsão, mơvũq mơvẽl, hẽla ngãq pa-gơla; vloh kung juơi bõc sigỡuq sì mơnuĩh yơu nữn. 12Kơyua chahrơna dơgrữq mơnuĩh gah lơniãu trôh hagĩq tãl hlãq? Vloh pơnõq adơi sơai ôh chahrơna dơgrữq mơnuĩh dòq dơlãp Sàc pơjũm sơđah yơh? 13Nữn Yàc Pô Lơngĩq ròq chahrơna dơgrữq mơnuĩh gah lơniãu dih.

“Iỡuq tlàq luơi kaya iãh mơsãc tơviãq tlah di khrãh rùp phuỗt pơnõq adơi sơai.”