1 Kô-rin-tô 6

1Tũq hũ sa vruãq jơdrãq sì mơnuĩh tơmo, asơi nữn dơlãp pơnõq adơi sơai khĩn pioh kađòc ãt chahrơna pãq anãq dơgrữq mơnuĩh ôh tơpãq dãng, nữn ôh iỡuq pãq anãq dơgrữq mơnuĩh gơnuar pơđar prõng yơh? 2Hẽla pơnõq adơi sơai ôh thơu làiq dơgrữq mơnuĩh gơnuar pơđar prõng ròq chahrơna dun kơyua? Sì mơyah làiq dun kơyua ròq kađòc chahrơna kơyua mưng pơnõq adơi sơai, nữn pơnõq adơi sơai ôh tãl kaya prãn mưng dơgrữq kaya yãq vãq tìt tiu nĩ yơh? 3Pơnõq adơi sơai ôh thơu làiq pơnõq drơi ròq chahrơna dơgrữq mơnuĩh gơnrơh yơh? Adah làiq dơgrữq vruãq rài nĩ hũ? 4Yơu nữn, bôh làiq pơnõq adơi sơai hũ dơgrữq kaya yãq vãq pơweh sì rài nĩ, kơyua hayơu vloh pơnõq adơi sơai pơđar dơgrữq mơnuĩh nữn dòq guh pioh chahrơna, nữn la dơgrữq mơnuĩh kađòc iãq ôh hũ vơnah hagĩq dơlãp sàc pơjũm sơđah? 5Hlãq ãn đơp mưng kaya đang mang mơlơu ơlah pơnõq adơi sơai hũ. Yơu nữn, hayơu vloh ôh hũ mơnuĩh jãc rgơi halơi dơlãp pơnõq adơi sơai, la mơnuĩh ròq pơlih chahrơna vruãq ôh siàp di khrãh pơnõq adơi sơai drơi yơh? 6Pa-vlữq wỡq, adơi sơai nĩ ãt va tơviãq kaya chahrơna jơdrãq wỡq sì adơi sơai dih, sì mưng vruãq nữn dòq di anãq dơgrữq mơnuĩh ôh pãc-tui? 7Yơu nữn, kaya wãc rơsi nĩ mĩn la sa kaya ãt alah viãq pơweh sì pơnõq adơi sơai vloh, kơyua pơnõq adơi hũ dơgrữq kaya yãq vãq di khrãh rùp phuỗt drơi. Kơyua hayơu vloh ôh ưng ãt lơhiãq? Kơyua hayơu vloh ôh ưng ãt pa-gơla pơgàt? 8Bôh làiq yơu nữn, pơnõq adơi sơai ngãq dơgrữq kaya ôh tơpãq sì vlữq lor, vloh ngãq yơu nữn sì pơnõq adơi sơai drơi! 9Hẽla pơnõq adơi sơai ôh thơu làiq mơnuĩh ôh tơpãq dãng ròq ôh hũ tồq mãq palơi lơgar Yàc Pô Lơngĩq? Juơi luơi kađòc pa-gơla; dơgrữq mơnuĩh arĩh athãm, mơnuĩh duh talơvãt rùp rãp, mơnuĩh ngãq drì drõc, mơnuĩh lakơi ngãq drì, mơnuĩh ngãq drì drõc dơdlãq lakơi sì lakơi, kamơi sì kamơi, 10mơnuĩh tlẽq vlữq, mơnuĩh ham guãm, mơnuĩh mơvũq mơvẽl mơnuĩh đơp pơdah hẽla mơnuĩh đơp pa-gơla, avih dơgrữq mơnuĩh nữn ôh hũ tồq mãq palơi lơgar Yàc Pô Lơngĩq. 11Sì hũ tơkìq mơnuĩh dơlãp pơnõq adơi sơai song hũ yơu nữn. Bôh làiq yơu nữn, pơnõq adơi sơai song hũ rao sơchih, song hũ pa-sơdua, song hũ angãn tơpãq dãng dơlãp angãn Yàc, la Yàc Dõc Pơ-tlah Je-su, sì kơyua mưng Vơngãq Sơđah Yàc Pô Lơngĩq pơnõq drơi hũ.

12“Avih dơgrữq kaya pơweh sì hlãq la hũ gơnuar,” nữn ôh iỡuq avih dơgrữq kaya va trôh kaya hũ kuơ. “Avih dơgrữq kaya pơweh sì hlãq la hũ gơnuar,” nữn hlãq ròq ôh kađòc ngãq halỗt kơyua mưng avih dơgrữq kaya halơi. 13“Kaya bõc la pioh ga tũc hajai, sì tũc hajai la pioh ga kaya bõc,” nữn Yàc Pô Lơngĩq ròq pa-lơhiãq avih kaya nĩ gãm sì kaya dih. Nữn rùp phàp nữn ôh pioh ga kaya drì drõc, nữn la pioh ga Yàc, sì Yàc pioh ga rùp phàp pơnõq drơi. 14Yàc Pô Lơngĩq song ngãq ga Yàc hadiuq wỡq, kung ròq ngãq ga pơnõq drơi hadiuq wỡq kơyua mưng gơnuar chơnuãq Pitrai hũ. 15Pơnõq adơi sơai ôh thơu làiq rùp phàp drơi hũ la vơnah dơlãp rùp phàp Yàc Dõc Pơ-tlah yơh? Yơu nữn, hadơi sì tũq mãq vơnah rùp phàp Yàc Dõc Pơ-tlah hũ, vloh hlãq mãq nhũ ngãq tơviãq jỡc vơnah rùp phàp drì drõc jỡc mĩn? Ôh tũq halơi hũ vruãq nữn! 16Hẽla pơnõq adơi sơai ôh thơu làiq mơnuĩh ngãq salơnuãq rùp phuỗt drơi sigỡuq sì kaya drì drõc la sa rơlo sì nhũ? Kơyua hũ wãq: “Dua aràc ròq tơviãq jỡc sa rơlo.” 17Nữn mơnuĩh halơi ngãq salơnuãq rùp phuỗt drơi sì Yàc nữn la sa rùp suàt vơngãq sigỡuq sì Pitrai. 18Iỡuq pleh ơtah kaya arĩh athãm! Dơgrữq dlàiq nữn anàq mơnuĩh sỗq iỡuq mĩn la dòq gah lơniãu rùp phàp, nữn mơnuĩh ngãq kaya arĩh athãm vloh sỗq dlàiq gãm sì rùp phàp drơi. 19Hẽla pơnõq adơi sơai ôh thơu làiq rùp phàp drơi la sàc duh talơvãt Yàc Vơngãq Sơđah dòq dơlãp pơnõq adơi sơai, la Pitao nữn pơnõq adơi sơai song tồq mãq mưng Yàc Pô Lơngĩq? Sì pơnõq adơi sơai ôh dòq pơweh sì rùp phuỗt drơi tơra, 20kơyua pơnõq adơi sơai song hũ pa-sơdua vlơi mưng pơyòp dloòng viãq vloh. Kơyua yơu nữn, iỡuq ngãq gơhluh Yàc Pô Lơngĩq mưng rùp phuỗt drơi.