1 Kô-rin-tô 7

1Dòq mưng dơgrữq kaya nữn pơnõq adơi sơai wãq: “Siàp viãq ga mơnuĩh lakơi ôh pãq mơtlìq sigỡuq sì mơnuĩh kamơi.” 2Nữn kơyua mưng kaya ơniãi ngãq drì drõc, dơgrữq tãl aràc mơnuĩh lakơi iỡuq khiãng kamơi, sì dơgrữq tãl aràc mơnuĩh kamơi kung iỡuq khiãng lakơi. 3Vơsàc iỡuq ngãq wil tãl dơgrữq vruãq pơweh sì mơnuĩh sơdiuq drơi, dòq mơnuĩh sơdiuq pơweh sì vơsàc drơi kung yơu nữn mĩn. 4Mơnuĩh sơdiuq ôh hũ gơnuar pãq dlòc rùp phàp drơi, nữn mĩn la mơnuĩh vơsàc. Nữn drưh yơu nữn, mơnuĩh vơsàc kung ôh hũ gơnuar pãq dlòc rùp phàp drơi, nữn la mơnuĩh sơdiuq. 5Juơi kơmlah luơi gỡuq, mĩn tũq halơi la kơyua hũ sa hatai sigỡuq dơlãp sa lơwah tũq ngãq gơnĩt pioh ga pơnõq adơi sơai pơlih chẽq avih hatai dơlãp kaya iơu lakơu, vloh nữn wỡq iỡuq dòq salơnuãq sigỡuq, tồq ga kamlai Sa-tan ôh pơlih ơniãi pơnõq adơi sơai kơyua mưng kaya siẽuq thơu gơrhia rùp phàp drơi hũ.

6Bôh làiq yơu nữn, hlãq đơp kaya nĩ yơu sa kaya hũ gơnuar đơp, ôh iỡuq yơu gơnuar pơđar. 7Nữn hlãq chơkhãq chàc dơgrữq tãl aràc mơnuĩh vloh hũ drưh yơu hlãq. Yơu nữn, dơgrữq tãl aràc hũ kaya anĩt krơi mưng Yàc Pô Lơngĩq vrơi ga drơi, bôh làiq mơnuĩh hũ kaya anĩt nĩ, nữn mơnuĩh dih hũ kaya anĩt tơmo. 8Dòq pơweh sì dơgrữq mơnuĩh ôh-ka hẽ pa-khiãng gãm sì dơgrữq mơnuĩh kamơi vlơu, hlãq đơp làiq mơyah làiq pơnõq nhũ miẽt dòq yơu hlãq la siàp. 9Nữn mơyah làiq pơnõq nhũ ôh tũq halơi gơrhia rùp drơi jỡc, nữn pơnõq nhũ iỡuq ãt kaya pa-khiãng. Kơyua kaya pa-khiãng gỡuq nữn siàp rlao sì luơi ga kaya drì drõc ngãq pahanh. 10Dòq pơweh sì dơgrữq mơnuĩh song pa-khiãng vloh nữn hlãq vrơi gơnuar pơđar — ôh iỡuq hlãq, nữn la Yàc — làiq sơdiuq ôh pa-chơlah tơviãq di vơsàc drơi 11(nữn vloh kung yơu nữn mơyah làiq nhũ song pa-chơlah rùp phàp vloh, nữn nhũ iỡuq miẽt dòq yơu nữn ôh khiãng wỡq tơra, hẽla iỡuq ngãq sa lơnuãq wỡq sì vơsàc) dòq vơsàc nữn ôh patloh tlàq luơi sơdiuq drơi. 12Nữn pơweh sì dơgrữq mơnuĩh gãm dòq wỡq nữn hlãq pơđar — hlãq, mĩn ôh iỡuq Yàc — mơyah làiq adơi sơai halơi hũ sơdiuq la mơnuĩh ka-ôh pãc-tui, sì mơnuĩh sơdiuq nữn siàp hatai dòq hadiuq sì drơi, nữn adơi sơai ôh hũ gơnuar patloh tlàq luơi mơnuĩh sơdiuq nữn. 13Mơyah làiq sa aràc mơnuĩh kamơi halơi hũ vơsàc ka-ôh pãc-tui sì mơnuĩh nữn hũ sa hatai hadiuq salơnuãq sì drơi, nữn mơnuĩh sơdiuq ôh patloh tlàq luơi vơsàc drơi. 14Kơyua mơnuĩh vơsàc ka-ôh pãc-tui nữn gơnang mưng mơnuĩh sơdiuq drơi ròq hũ pa-sơdua vơrhơu, sì mơnuĩh sơdiuq ka-ôh pãc-tui gơnang mưng adơi sơai nữn hũ pa-sơdua vơrhơu. Kơyua mơyah làiq ôh yơu nữn, nữn anàq tơcho adơi sơai la ôh sơđah sơchih, nữn tũq nĩ pơnõq nhũ kung hũ sơđah sơchih. 15Dòq mơyah làiq mơnuĩh ka-ôh pãc-tui nữn ưng pa-chơlah krơi, nữn iỡuq luơi ga mơnuĩh nữn ngãq pa-chơlah. Mơnuĩh adơi sơai lakơi hẽla adơi sơai kamơi nữn ôh kađòc pagùq pơ-èp dơlãp vơnah nữn, nữn la Yàc Pô Lơngĩq song iơu jàq pơnõq drơi dòq dơlãp kaya dadu lơngai. 16Kơyua, pa-thơu ga mơnuĩh adơi sơai kamơi, ngãq hayơu adơi sơai thơu mĩn làiq adơi sơai dõc suãq vơsàc drơi? Hẽla, pa-thơu ga mơnuĩh adơi sơai lakơi, ngãq hayơu adơi sơai thơu hũ mĩn làiq adơi sơai ròq dõc suãq sơdiuq drơi? 17Mơyah làiq ôh hũ, nữn Yàc song vrơi kaya anĩt ga dơgrữq tãl aràc yơu halơi, Yàc Pô Lơngĩq song iơu jàq dơgrữq tãl aràc yơu halơi, iỡuq yàp nao yơu nữn. Sì hlãq vrơi adãt pơđar ngãq gơnĩt yơu nữn dơlãp avih dơgrữq sàc pơjũm sơđah. 18Hũ mơnuĩh halơi nữn hũ duỡt ruãh hadơi sì tũq song ãt sìq kalìq lơĩh? Mơnuĩh nữn juơi yơu ka-ôh ãt sìq kalìq. Hũ mơnuĩh halơi nữn hũ duỡt ruãh dơlãp kaya wãc rơsi ka-ôh ãt sìq kalìq lơĩh? Mơnuĩh nữn juơi ãt sìq kalìq. 19Kaya ãt sìq kalìq ôh la hagĩq, ôh ãt sìq kalìq kung ôh la hagĩq, sì la kaya prong màc rlao nữn la kaya chròq rơmiãq dơgrữq kaya pơđar-va Yàc Pô Lơngĩq hũ. 20Dơgrữq tãl aràc, dơlãp tũq hũ sãp iơu jàq nữn drơi song hũ iơu jàq, iỡuq miẽt dòq dơlãp kaya iơu jàq nữn. 21Iỡuq mĩn pơnõq adơi sơai hũ iơu jàq dòq dơlãp rơsãq rơsi mơnuĩh ngãq halỗt? Juơi luơi ga kaya nữn ngãq ga pơnõq adơi sơai ka-ồq ka-ãn. Bôh làiq yơu nữn, mơyah làiq pơnõq adơi sơai viãq pơlih tơviãq jỡc hũ lanơng lơnai, nữn iỡuq apãt mãq tũq lơwah nữn. 22Kơyua sa aràc mơnuĩh, la mơnuĩh halỗt, hũ iơu jàq dơlãp Yàc nữn tơviãq jỡc mơnuĩh lanơng lơnai Yàc hũ. Kung yơu nữn, mơnuĩh lanơng lơnai hũ iơu jàq nữn ròq tơviãq jỡc mơnuĩh halỗt mơnãq Yàc Dõc Pơ-tlah hũ. 23Viãq pơnõq adơi sơai song hũ sơdua vlơi mưng pơyòp savĩq dloòng vloh; nữn juơi ngãq jỡc mơnuĩh halỗt ga anàq mơnuĩh tơra. 24Pa-thơu pơnõq adơi sơai, bôh làiq adơi sơai dòq dơlãp kaya wãc rơsì halơi dơlãp tũq hũ iơu jàq, nữn iỡuq miẽt pơtui sì Yàc Pô Lơngĩq dơlãp kaya wãc rơsì nữn.

25Đơp tãl trôh kamơi dơra dòq soh, hlãq ôh hũ gơnuar pơđar halơi mưng Yàc. Bôh làiq yơu nữn, hlãq lakơu đơp tơviãq kaya sơnơng hlãq kơyua song tồq mãq hũ kaya anĩt mưng Yàc yơu la sa aràc mơnuĩh đang mang chàc gơnang viãq. 26Kơyua nữn, hlãq sơnơng làiq kaya wãc rơsi nữn la siàp, kơyua mưng kaya rũc rài padưh nĩ song trôh jẽq, siàp viãq ga sa aràc mơnuĩh miẽt dòq yơu nữn. 27Iỡuq mĩn adơi sơai kađòc pơgùq pơ-èp sì sơdiuq? Juơi duah vơnẽq kaya pa-chơlah. Iỡuq mĩn adơi sơai kađòc pơgùq pơ-èp pa-chơlah mưng sơdiuq? Juơi duah sơdiuq. 28Dòq mơyah làiq adơi sơai khiãng kamơi, nữn adơi sơai ôh sỗq dlàiq; sì mơyah làiq sa aràc mơnuĩh kamơi dơra dòq soh khiãng lakơi, nữn adơi sơai kamơi nữn kung ôh sỗq dlàiq. Bôh làiq yơu nữn, dơgrữq mơnuĩh yơu nữn ròq hũ kaya dleh dlàr dơlãp rơlo rùp, nữn hlãq ưng pơnõq adơi sơai pleh tlah kaya nữn. 29Nữn, pa-thơu pơnõq adơi sơai, hlãq đơp kaya nĩ: Tũq jơ nữn song katũt viãq, tồq ga mưng tũq nĩ wỡq sì hadơi, gãm sì avih dơgrữq mơnuĩh halơi hũ sơdiuq nữn iỡuq ngãq yơu ôh hũ; 30mơnuĩh halơi sia, iỡuq ngãq yơu ôh sia; mơnuĩh halơi uỗt sơh, iỡuq ngãq yơu ôh uỗt sơh, mơnuĩh halơi vlơi pioh, iỡuq ngãq yơu ôh hũ angui kaya hagĩq; 31sì mơnuĩh halơi angui kaya mơnã dun kơyua, iỡuq ngãq yơu ôh angui; kơyua dơgrữq kaya sẽq pabôh dun kơyua nĩ hũ ròq tơpa gãt. 32Vơnah tơmo, hlãq chơkhãq khiãng pơnõq adơi sơai ưng ôh ka-ồq ka-ãn hagĩq. Mơnuĩh dòq soh nữn chẽq hatai dơgrữq kaya pơweh sì Yàc, duah mưng pơnẽq halơi nữn drơi pơlih ngãq siàp hatai Yàc. 33Nữn dơgrữq tơpuôl ung song hũ sơdiuq nữn chẽq hatai sơnơng trôh dơgrữq vruãq pơweh sì rài nĩ, duah pơnẽq halơi mơnuĩh vơsàc pơlih ngãq ga siàp hatai sơdiuq drơi, sì mơnuĩh nữn kađòc pa-chơlah kaya sơnơng. Mơnuĩh kamơi dòq soh hẽla kamơi dơra dòq soh 34nữn chẽq hatai sơnơng trôh dơgrữq kaya pơweh sì Yàc, ngãq hayơu tồq ga drơi pơlih hũ sơđah sơchih gãm dơlãp rùp phàp sì gah dơlãp suàt vơngãq. Nữn mơnuĩh kamơi song hũ vơsàc nữn chẽq hatai sơnơng trôh dơgrữq vruãq pơweh sì rài nĩ, duah pơnẽq ngãq hayơu pơlih ngãq siàp hatai vơsàc drơi. 35Bôh làiq yơu nữn, hlãq ãn đơp kaya nĩ kơyua pioh ga rùp phuỗt pơnõq adơi sơai hũ kuơ, ôh iỡuq pioh ga hlãq pơlih đơp pơluãq mãq pakỡuq pơnõq adơi sơai, nữn tồq pơweh trôh kaya duh vruãq iỡuq viãq sì chẽq hatai ga Yàc savĩq ôh chẽq hatai ga dơgrữq vruãq tơmo. 36Nữn mơyah làiq mơnuĩh halơi nữn đơp làiq drơi ãn ngãq kaya ôh iỡuq pơweh sì mơnuĩh kamơi dòq dơra drơi hũ — mơyah làiq mơnuĩh kamơi nữn pơlih kađòc prõng thũt uãn sì kơyua yơu nữn vruãq pa-khiãng gỡuq iỡuq hũ padỡc tơviãq — nữn mơnuĩh nữn iỡuq ngãq kaya drơi chơkhãq khiãng. Mơnuĩh nữn ôh sỗq dlàiq; iỡuq luơi ga pơnõq nhũ khiãng gỡuq. 37Dòq mơnuĩh halơi gơjãp gơnĩt dơlãp hatai drơi, ôh hũ kaya pagùq pơ-èp, nữn hũ gơnuar pãq dlòc mưng hatai ưng rùp phuỗt drơi hũ sì mơnuĩh nữn song ngãq gơnĩt yơu nữn dơlãp hatai drơi — pioh rơmiãq jàc mơnuĩh kamơi dơra drơi hũ — nữn mơnuĩh nữn ròq ngãq sa kaya iỡuq tơpãq. 38Yơu nữn, mơnuĩh pa-khiãng ga anàq kamơi drơi duah vơsàc mãq ngãq iỡuq, nữn mơnuĩh ôh pa-khiãng anàq kamơi drơi nữn vloh ròq ngãq siàp rlao wỡq. 39Mơnuĩh sơdiuq ãt pơgùq pơ-èp hadiuq sigỡuq tãl avih tũq halơi vơsàc drơi dòq hadiuq. Nữn mơyah làiq mơnuĩh vơsàc mơtai, nữn mơnuĩh sơdiuq hũ lơnang lơnai nao khiãng sì mơnuĩh halơi drơi ưng, mĩn la mơnuĩh dòq dơlãp Yàc. 40Bôh làiq yơu nữn, tui yơu kaya sơnơng hlãq hũ nữn mơnuĩh sơdiuq hũ dadu lơngai rlao mơyah làiq pơlih miẽt dòq hadiuq yơu nữn. Nữn, hlãq sơnơng làiq drơi kung hũ Vơngãq Sơđah Yàc Pô Lơngĩq.