1 Kô-rin-tô 8

1Dòq mưng dơgrữq kaya bõc kakôh ga rùp rãp: Pơnõq drơi thơu làiq avih tãl aràc pơnõq drơi kung hũ kaya jãc thơu vloh. Nữn kaya jãc thơu pajỡc tơviãq kaya yeh drơi, dòq kaya khiãng duman nữn padỡc kaya ngãq krơh siàp. 2Mơyah làiq mơnuĩh halơi sơnơng drơi thơu kaya hagĩq nữn, nữn mơnuĩh nữn mĩn ka-ôh thơu ngãq yơu drơi thơu rgơi. 3Nữn mơyah làiq mơnuĩh halơi anĩt duman Yàc Pô Lơngĩq, nữn mơnuĩh nữn hũ Pitrai kơnãl thơu. 4Yơu nữn, dòq mưng vruãq bõc dơgrữq kaya kakôh talơvãt ga rùp rãp: Pơnõq drơi thơu làiq rùp rãp dơlãp dun kơyua nĩ mĩn la lơhiãq soh, sì làiq ôh hũ yàc halơi lơniãu mĩn Yàc Pô Lơngĩq la rlao avih. 5Kơyua gãm sì yơu hũ dơgrữq kaya hũ angãn la yàc, hẽla dòq pãq dlòc lơngĩq hẽla pãq ala hlùq, drưh yơu hũ lũ “vơngãq” sì lũ “yàc”, 6nữn pơweh sì pơnõq drơi mĩn hũ sa Yàc Pô Lơngĩq, la Ama, dơgrữq kaya mưng Pitao nữn pajỡc tơviãq, sì la Pitao nữn pơnõq drơi hadiuq ga Pitrai; kung mĩn hũ sa Yàc la Yàc Dõc Pơ-tlah Je-su, gơnang mưng Pitrai nữn dơgrữq kaya hũ pajỡc tơviãq, sì gơnang mưng Pitrai nữn pơnõq drơi hũ mơta.

7Bôh làiq yơu nữn, kaya jãc thơu nĩ ôh dòq dơlãp dơgrữq mơnuĩh. Nữn hũ lũ mơnuĩh tui yơu kaya rơđãp ngãq mưng hlơu trôh tãl nĩ gãm sì rùp rãp, pơnõq nhũ bõc dơgrữq kaya nữn ngãq yơu kaya song kakôh ga rùp rãp, vloh tũc hatai gãm lơduh lơmuỡn pơnõq nhũ hũ kađòc tasỡuq nrãc. 8Vơnah tơmo, kaya bõc ròq ôh va pơnõq drơi trôh jẽq sì Yàc Pô Lơngĩq; mơyah làiq ôh bõc, pơnõq drơi kung ôh kuơ hagĩq, mơyah làiq bõc pơnõq drơi kung ôh pơtãl rlao tơra. 9Nữn iỡuq gơrhia, huaĩq mưng pơnẽq halơi nữn, gơnuar lanơng lơnai pơnõq adơi sơai hũ nĩ pơlih tơviãq jỡc kaya sơnẽq sỗq ga mơnuĩh lơduh lơmuỡn. 10Kơyua mơyah làiq mơnuĩh halơi nữn iãq bôh hũ sa aràc mơnuĩh jãc thơu dòq guh bõc dơlãp sàc kakôh rùp rãp, nữn ôh iỡuq tũc hatai lơđãp lơduh lơmuỡn pơnõq nhũ hũ ròq kađòc pachôh pasũl tồq bõc dơgrữq kaya song kakôh ga rùp rãp yơh? 11Yơu nữn, sa aràc mơnuĩh lơduh lơmuỡn, sa aràc mơnuĩh adơi sơai nữn Yàc Dõc Pơ-tlah song ãt mơtai ala vloh, kađòc mơtai lơhiãq kơyua mưng kaya jãc thơu pơnõq adơi sơai hũ. 12Vơnah tơmo, tui yơu pơnẽq nữn, dơlãp tũq sỗq dlàiq jơdrãq sì sa aràc adơi sơai drơi sì ngãq pơđìq pơđua tũc hatai lơduh lơmuỡn pơnõq nhũ hũ, nữn la pơnõq adơi sơai sỗq dlàiq jơdrãq sì Yàc Dõc Pơ-tlah. 13Yơu nữn mơyah làiq kaya bõc ngãq ga sa aràc mơnuĩh adơi sơai hlãq hũ sơnẽq sỗq, nữn hlãq viãq làiq ròq ôh tũq halơi bõc rơlo tơra, tồq ga hlãq ôh ngãq sơnẽq sỗq ga mơnuĩh adơi sơai drơi hũ.