1 Kô-rin-tô 9

1Hlãq ôh hũ lanơng lơnai nữn yơh? Hlãq ôh iỡuq la sa aràc mơnuĩh gơnuar pơđar nữn yơh? Hlãq ka-ôh pãp Yàc Je-su, Yàc pơnõq drơi nữn yơh? Ôh iỡuq pơnõq adơi sơai la vruãq ngãq hlãq hũ dơlãp Yàc nữn yơh? 2Bôh làiq hlãq ôh iỡuq la mơnuĩh gơnuar pơđar pơweh sì mơnuĩh tơmo, nữn hlãq kung la mơnuĩh gơnuar pơđar pơweh sì pơnõq adơi sơai. Kơyua mưng pơnõq adơi sơai la kaya ngãq chưng tang mưng vruãq mơnuĩh gơnuar pơđar hlãq hũ dơlãp Yàc. 3Pơnuaĩq đơp dõc jơga hlãq hũ pơweh sì dơgrữq mơnuĩh tơnĩa khao hlãq la yơu nĩ: 4Viãq mĩn pơnõq hlãq ôh hũ gơnuar bõc gãm sì mơnhũm? 5Hayơu vloh pơnõq hlãq ôh hũ gơnuar dui-va sa aràc mơnuĩh sơdiuq tui Yàc, kung yơu dơgrữq mơnuĩh gơnuar pơđar tơmo sigỡuq sì dơgrữq adơi lakơi Yàc hũ sì Se-pha? 6Hẽla hũ mĩn Ba-na-ba gãm sì hlãq ôh hũ gơnuar pioh ôh ngãq vruãq yơh? 7Mơnuĩh halơi nao lĩng mưng jĩn vlàt krơi sàc drơi tũq halơi lơĩh? Mơnuĩh halơi pơla vỡn nho nữn vloh ôh bõc voh nhũ? Hẽla hũ mơnuĩh halơi dlãc iãq tơpuôl avo nữn ôh mơnhũm ia tasơu mưng tơpuôl avo nữn? 8Ôh iỡuq hlãq ãn đơp dơgrữq kaya nĩ tui yơu pơnẽq anàq mơnuĩh rơđãp đơp mĩn yơh, hẽla voh-va kung ôh đơp dơgrữq kaya yơu nữn? 9Kơyua hũ pơnuaĩq wãq dơlãp voh-va Môi-se: “Juơi sròq vai tơma mơvah anàq lơmo ãn juãq vơdai.” Ôh iỡuq Yàc Pô Lơngĩq mơ-ôh ga lơmo ôh yơh? 10Hẽla Pitrai đơp tãl avih dơgrữq kaya la kơyua hũ kuơ ga pơnõq drơi? Viãq, pơnuaĩq hũ wãq kơyua hũ kuơ ga pơnõq drơi, làiq mơnuĩh lơ-oa hamã nữn iỡuq lơ-oa dơlãp kaya chàc gơnang, sì mơnuĩh juãq vơdai nữn ngãq dơlãp kaya chơkhãq chàc mưng vơnãh mơpha ga drơi. 11Mơyah làiq pơnõq hlãq ròq dràq dơgrữq kaya gah suàt vơngãq di khrãh pơnõq adơi sơai, nữn hũ đang mang mĩn lơĩh mơyah làiq pơnõq hlãq ròq yuãq mãq dơgrữq voh chơtai gah rơlo rùp mưng pơnõq adơi sơai? 12Mơyah làiq dơgrữq mơnuĩh tơmo hũ vơnãh mưng gơnuar nữn pãq dlòc pơnõq adơi sơai, nữn ơdah làiq pơnõq hlãq brõq lũ rlao yơh! Bôh làiq yơu nữn, pơnõq hlãq ôh duah ka-nơ di gơnuar nĩ. Pa-vlữq wỡq, pơnõq hlãq ãt ỡn dơgrữq kaya pioh pơnõq hlãq ôh tũq halơi va trôh dơgrữq kaya mãq pakỡuq halơi ga Pơnuaĩq Siàp Yàc Dõc Pơ-tlah hũ. 13Pơnõq adơi sơai ôh thơu làiq mơnuĩh halơi ngãq vruãq dơlãp sàc talơvãt nữn bõc dơgrữq kaya pơweh sì sàc talơvãt, dơgrữq mơnuĩh halơi ngãq vruãq pãq ban talơvãt nữn hũ vơnah dơlãp ban talơvãt, ôh yơh? 14Kung yơu pơnẽq nữn, Yàc song pơto pơđar làiq dơgrữq mơnuĩh akhàt vrơi thơu Pơnuaĩq Siàp nữn iỡuq hadiuq gơnang mưng Pơnuaĩq Siàp. 15Nữn hlãq ôh ka-nơ lakơu yòc dơgrữq kaya halơi dơlãp dơgrữq gơnuar nữn. Vơnah tơmo, hlãq ôh wãq dơgrữq pơnuaĩq nĩ pioh gơnuar nữn hũ ngãq angui ga drơi yơu nữn, kơyua pơweh sì hlãq, vloh luơi ga mơtai siàp rlao la luơi ga dơgrữq mơnuĩh halơi ròq ngãq ga kaya pa-prõc rùp hlãq hũ tơviãq jỡc lơhiãq soh. 16Kơyua mơyah làiq hlãq pơto akhàt Pơnuaĩq Siàp, nữn ôh hũ hagĩq ga hlãq pioh pa-mơyeh pa-prõc rùp drơi, mưng gơnuar vruãq nĩ pagùq pơ-èp song pơjao ga hlãq. Kơyua viãq la dleh dlàr ga hlãq mơyah làiq hlãq ôh pơto akhàt Pơnuaĩq Siàp! 17Mơyah làiq hlãq rơchãc lơĩh hatai ngãq vruãq nữn, nữn ròq hũ kaya ban. Dòq mơyah làiq ôh rơchãc lơĩh hatai, nữn hlãq ôh ãt pơjao sa gơnuar vruãq ngãq mơnuĩh apãt akõq vloh. 18Yơu nữn, kaya ban hlãq hũ la hagĩq? Nữn la tũq pơto akhàt Pơnuaĩq Siàp ôh chàc jĩn, nữn hlãq pơlih rgơi akhàt tơviãq Pơnuaĩq Siàp hayơu ga ôh ka-nơ angui gơnuar krơi drơi hũ dơlãp Pơnuaĩq Siàp. 19Bôh làiq hlãq hũ lơnang lơnai tlah mưng dơgrữq kaya, hlãq song ngãq ga rùp phuỗt ngãq halỗt mơnãq ga dơgrữq aràc, pioh hlãq pơlih dui-va iơu jàq hũ lũ mơnuĩh wỡq. 20Pơweh sì mơnuĩh Ju-đa, hlãq tơviãq jỡc yơu mơnuĩh Ju-đa, pioh iơu jàq dui-va lũ mơnuĩh Ju-đa. Pơweh sì dơgrữq mơnuĩh halơi dòq pãq ala voh-va, hlãq tơviãq jỡc yơu mơnuĩh dòq pãq ala voh-va, bôh làiq rùp phuỗt hlãq ôh dòq pãq ala gơnuar voh-va, pioh hlãq pơlih iơu jàq dui-va dơgrữq mơnuĩh halơi dòq pãq ala voh-va. 21Pơweh sì dơgrữq mơnuĩh ôh hũ voh-va, hlãq tơviãq jỡc yơu mơnuĩh lơniãu voh-va (bôh làiq ôh iỡuq la ôh hũ voh-va Yàc Pô Lơngĩq hũ, nữn la dòq pãq ala voh-va Yàc Dõc Pơ-tlah), pioh hlãq pơlih rgơi iơu jàq dui-va dơgrữq mơnuĩh gah lơniãu ôh hũ voh-va. 22Pơweh sì dơgrữq mơnuĩh lơduh lơmuỡn, hlãq tơviãq jỡc yơu mơnuĩh lơduh lơmuỡn, pioh hlãq hũ pơlih iơu jàq dui-va dơgrữq mơnuĩh lơduh lơmuỡn. Hlãq song tơviãq jỡc dơgrữq pơnẽq pơweh sì dơgrữq mơnuĩh, tồq ga hlãq pơlih mưng dơgrữq pơnẽq hũ dõc suãq tơkìq mơnuĩh. 23Vơnãh tơmo, hlãq ngãq dơgrữq vruãq kơyua mưng Pơnuaĩq Siàp, tồq ga hlãq pơlih tơviãq jỡc mơnuĩh kung hũ vơnah dơlãp nữn. 24Pơnõq adơi sơai ôh thơu làiq avih dơgrữq mơnuĩh đuaĩq dơlãp tũq pơlòc nữn avih tãl aràc kung đuaĩq, nữn mĩn hũ sa aràc mơnuĩh hũ tồq kaya ban yơh? Hẽla đuaĩq tui pơnẽq nữn pioh pơnõq adơi sơai pơlih tồq mãq hũ kaya ban. 25Vơnah tơmo, dơgrữq tãl aràc mơvlah kơchah dơlãp dơgrữq kaya pơlòc kung mơgrũ ngãq gơrhia rùp phuỗt drơi dơlãp dơgrữq vruãq. Bôh làiq pơnõq nhũ ãt ngãq yơu nữn pioh pơnõq nhũ pơlih tồq mãq hũ chrang mữh ròq lơhiãq thĩt, nữn pơnõq drơi la chrang mữh ôh tũq halơi lơhiãq thĩt. 26Kơyua yơu nữn, hlãq đuaĩq yơu nữn, ôh iỡuq yơu la đuaĩq ôh hũ kaya sa kanõh hagĩq; hlãq poh gơlĩh yơu nữn, ôh iỡuq yơu poh yua angĩn. 27Pa-vlữq wỡq, hlãq pagùq pơ-èp rùp phàp drơi sì ngãq ga nhũ jỡc halỗt mơnãq, huaĩq làiq mưng pơnẽq halơi nữn, hadơi sì tũq pơto akhàt ga mơnuĩh tơmo, nữn mĩn rùp phàp hlãq pơlih ròq kađòc pa-trơh luơi yơh.