1 Kô-rin-tô 10

1Pa-thơu adơi sơai, hlãq ôh ưng pơnõq adơi sơai ôh thơu làiq ung kõq pơnõq drơi avih tãl aràc song dòq pãq ala pỗc huãl, sì avih tãl aràc song gãt tơpa ia tơsìq, 2avih tãl aràc pơnõq nhũ pơweh tui Môi-se song hũ ngãq bãp-tem dơlãp pỗc huãl sì pãq ala ia tơsìq, 3avih tãl aràc pơnõq nhũ song bõc sigỡuq sa kaya bõc gah suàt vơngãq, 4sì avih tãl aràc song mơnhũm sigỡuq kaya mơnhũm gah suàt vơngãq, kơyua pơnõq nhũ mơnhũm ia mưng sa kơblah patơu suàt vơngãq nao tui drơi, sì patơu nữn la Yàc Dõc Pơ-tlah. 5Bôh làiq yơu nữn, Yàc Pô Lơngĩq song ôh siàp hatai sì lũ mơnuĩh dơlãp pơnõq nhũ, yơu nữn pơnõq nhũ song kađòc mơtai vãq dơgrữq anĩh dơlãp blàc choah. 6Vơnah tơmo, dơgrữq kaya nĩ song tơviãq jỡc kaya ngãq krơh ga pơnõq drơi, pioh ôh ngãq ga pơnõq drơi la dơgrữq mơnuĩh hãm khiãng dơgrữq kaya iãh sàq kung drưh yơu pơnõq nhũ song hãm khiãng. 7Kung juơi tơviãq jỡc dơgrữq mơnuĩh kakôh talơvãt rùp rãp yơu dơgrữq mơnuĩh dih dơlãp pơnõq nhũ; tơviãq jỡc yơu hũ pơnuaĩq wãq: “Vual vơla dòq guh pioh bõc sì mơnhũm, vloh tơgùq dỡc geh gỡuq.” 8Pơnõq drơi kung juơi ngãq sỗq dlàiq drì drõc yơu lũ mơnuĩh dơlãp pơnõq nhũ song sỗq dlàiq, nữn hũ dua plôh tlơu rơvơu aràc song lơvuh mơtai dơlãp mĩn sa harơi. 9Kung juơi lòc Yàc yơu lũ mơnuĩh dơlãp pơnõq nhũ song lòc Pitrai vloh kađòc pa-mơtai mưng anàq ala kẽq. 10Kung juơi đơp rơbòp yơu lũ mơnuĩh dơlãp pơnõq nhũ song đơp rơbòp sì kađòc pitao pa-lơhiãq pa-mơtai. 11Bôh làiq yơu nữn, dơgrữq vruãq nữn song tơviãq trôh ga pơnõq nhũ yơu dơgrữq kaya ngãq krơh, nữn pơnõq nhũ song hũ wãq luơi pioh ga vruãq pơto pơđar pơnõq drơi, la pãq dlòc dơgrữq mơnuĩh nữn dơgrữq kaya luôĩq hadơi dơgrữq rài hũ song trôh vloh. 12Yơu nữn, asơi sơnơng drơi dòq dỡc, iỡuq gơrhia vẽq tồq ôh lơvuh trỗt. 13Ôh hũ kaya ơniãi halơi song tơviãq trôh ga pơnõq adơi sơai lơniãu kaya pơweh sì anàq mơnuĩh; vơnah tơmo, Yàc Pô Lơngĩq tơpãq viãq, la Pitao ròq ôh tũq halơi luơi ga pơnõq adơi sơai kađòc ơniãi rlao sì kaya prãn drơi, nữn dơlãp kaya ơniãi nữn, Pitrai kung ròq pơh sa gơlòc tơviãq tồq ga pơnõq adơi sơai pơlih ãt ỡn jỡc.

14Kơyua yơu nữn, ơ pơnõq adơi sơai anĩt duman hlãq hũ, iỡuq pleh ơtah tlah mưng kaya duh talơvãt rùp rãp. 15Ngãq yơu hlãq ãn đơp sì dơgrữq mơnuĩh thơu pãc. Pơnõq adơi sơai iỡuq iãq pơwih gơnĩt pơnuaĩq hlãq đơp. 16Mưng chơwàt siàp lơngai nữn pơnõq drơi ỡn ngai, ôh iỡuq nữn la pơnõq drơi kung hũ vơnah sigỡuq dơlãp dơrãh Yàc Dõc Pơ-tlah hũ yơh? Bẽn nữn pơnõq drơi pẽq ôh iỡuq nữn la pơnõq drơi kung hũ vơnah sigỡuq dơlãp rùp phàp Yàc Dõc Pơ-tlah hũ yơh? 17Kơyua mĩn hũ sa tleh bẽn, yơu nữn pơnõq drơi, bôh làiq lũ, kung mĩn la sa rùp phàp, kơyua avih dơgrữq tãl aràc pơnõq drơi kung hũ vơnah sigỡuq dơlãp sa tleh bẽn nữn. 18Iỡuq iãq vual vơla Is-ra-el tui vơnah rơlo rùp. Ôh iỡuq dơgrữq mơnuĩh halơi bõc kaya pioh padỡc la dơgrữq mơnuĩh kung hũ vơnah dơlãp ban duh talơvãt yơh? 19Yơu nữn, hlãq ãn đơp kaya hagĩq? Kaya pioh kakôh rùp rãp la kaya hagĩq, hẽla rùp rãp la hagĩq mĩn? 20Bôh làiq yơu nữn, dơgrữq kaya nữn dơgrữq vual vơla lơniãu kakôh chràc la kakôh ga kamlai, ôh iỡuq ga Yàc Pô Lơngĩq. Nữn hlãq ôh ưng pơnõq adơi sơai tơviãq jỡc dơgrữq mơnuĩh hũ vơnah sigỡuq sì dơgrữq kamlai! 21Pơnõq adơi sơai ôh tũq halơi gãm mơnhũm chơwàt Yàc hũ gãm sì mơnhũm chơwàt kamlai ràc jỡc. Pơnõq adơi sơai ôh tũq halơi dòq tơma dơlãp anĩh bõc mơnhũm Yàc hũ gãm sì dòq tơma dơlãp anĩh bõc mơnhũm kamlai ràc jỡc. 22Hẽla pơnõq drơi ưng ngãq ga Yàc lơmùq mơvai yơh? Vloh pơnõq drơi nữn hũ prãn khãc rlao sì Pitrai mĩn?

23“Dơgrữq kaya nữn hũ gơnuar ngãq,” nữn ôh iỡuq dơgrữq kaya va trôh kaya hũ kuơ. “Dơgrữq vruãq nữn hũ gơnuar ngãq,” nữn ôh iỡuq dơgrữq kaya kung va kaya vỡq padỡc sì ngãq krơh siàp. 24Juơi hũ mơnuĩh halơi duah iãq kaya kuơ màc krơi ga drơi, nữn la iỡuq duah kaya kuơ màc ga mơnuĩh tơmo wỡq. 25Iỡuq bõc dơgrữq kaya hũ kãq pa-vlơi dơlãp dràq, nữn ôh chàc blah đơp hagĩq kơyua mưng tũc hatai. 26Kơyua “voh hlùq sigỡuq sì dơgrữq kaya dơlãp nhũ pơweh sì Yàc.” 27Mơyah làiq sa aràc mơnuĩh ôh pãc-tui halơi jàq pơnõq adơi sơai nữn pơnõq adơi sơai ưng nao, nữn iỡuq bõc dơgrữq kaya bõc song pồq pơyãq vrơi ga drơi nữn juơi blah đơp kaya hagĩq kơyua mưng tũc hatai. 28Nữn mơyah làiq hũ mơnuĩh halơi nữn đơp sì pơnõq adơi sơai: “Nĩ la kaya kakôh,” nữn juơi bõc, kơyua mưng mơnuĩh nữn, la mơnuĩh song vrơi ga pơnõq adơi sơai thơu vloh, sì kơyua mưng tũc hatai — 29nữn hlãq đơp mưng tũc hatai, ôh iỡuq la rùp phuỗt pơnõq adơi sơai hũ, nữn la mưng tũc hatai mơnuĩh nữn hũ. Nữn la kơyua hayơu kaya lanơng lơnai drơi hũ kađòc tũc hatai mơnuĩh tơmo hũ chahrơna? 30Mơyah làiq hlãq angui bõc mưng hatai thơu ỡn ngai, nữn hayơu hlãq vloh kađòc siẽq sier kơyua kaya bõc nữn hlãq ỡn ngai? 31Kơyua yơu nữn, bôh làiq pơnõq adơi sơai bõc hẽla mơnhũm, hẽla ngãq dơgrữq vruãq halơi nữn, iỡuq ngãq avih dơgrữq vruãq ga kaya gơhluh Yàc Pô Lơngĩq hũ. 32Juơi ngãq sơnẽq sỗq ga mơnuĩh Ju-đa gãm sì mơnuĩh Gơ-rec sì Sàc Pơjũm Sơđah Yàc Pô lơngĩq hũ, 33drưh yơu hlãq kung pioh hatai ngãq dõc dơgrữq mơnuĩh dơlãp dơgrữq vruãq, ôh duah kaya kuơ màc krơi ga drơi, nữn ga kaya kuơ màc ga lũ mơnuĩh, pioh pơnõq nhũ pơlih hũ dõc pơ-tlah.