1 Kô-rin-tô 4

1Kơyua nữn, dơgrữq tãl aràc iỡuq iãq pơnõq hlãq yơu dơgrữq mơnuĩh halỗt mơnãq Yàc Dõc Pơ-tlah hũ sì dơgrữq mơnuĩh apãt dơgrữq kaya dơlãp dơđỡuq Yàc Pô Lơngĩq hũ. 2Dòq mưng kaya nĩ, nữn la sa kaya iỡuq chơkhãq chàc dơlãp dơgrữq mơnuĩh apãt akõq la ngãq hayơu ga avih tãl aràc iãq bôh la tui tơpãq. 3Nữn mưng kaya nĩ la vruãq ôh đang mang pơweh sì hlãq, bôh làiq hlãq pơlih kađòc chahrơna kơyua mưng pơnõq adơi sơai hẽla kơyua mưng anĩh chahrơna anàq mơnuĩh hũ. Vơnah tơmo, hlãq kung ôh iãq pơwih pơyòp krơi ga rùp phàp drơi. 4Kơyua hlãq iãq bôh ôh hũ kaya hagĩq pioh jơdrãq sì rùp phàp drơi, bôh làiq yơu nữn hlãq ôh hũ angãn tơpãq dãng gơnang mưng vruãq nữn; nữn Yàc la Pitao iãq pơwih pơyòp hlãq. 5Yơu nữn, juơi chahrơna kaya hagĩq halơu tũq lơwah, la trôh tũq Yàc trôh, la Pitao ròq va gãm dơgrữq vruãq padỡuq dơđỡuq kaya sồp kơnãm hũ tơviãq pa kaya sơdah, gãm sì ràc pa-tơviãq dơgrữq kaya sơnơng ngãq gơnĩt dơlãp hatai. Vloh dơlãp tũq nữn, kaya sơ-uỗt mơyòp mưng Yàc Pô Lơngĩq ròq trôh sì dơgrữq tãl aràc.

6Pa-thơu pơnõq adơi sơai, hlãq song ngãq dơgrữq vruãq nĩ pơweh sì rùp drơi gãm sì A-bô-lô pioh ga pơnõq adơi sơai hũ kuơ, pioh gơnang mưng pơnõq hlãq, pơnõq adơi sơai mơgrũ thơu pơnuaĩq nĩ:

“Juơi nao rlao sì pơnuaĩq song wãq,”

tồq pioh ôh sa aràc mơnuĩh halơi pa-dlòc rùp yeh drơi mãq angãn mơnuĩh nĩ vloh jơdrãq sì mơnuĩh dih. 7Kơyua mơnuĩh halơi pa mơyơu pơnõq adơi sơai ngãq pa-chơlah gỡuq? Vơnah tơmo, kaya halơi pơnõq adơi sơai ãn hũ nữn drơi song ôh tồq mãq? Nữn mơyah làiq pơnõq adơi sơai song tồq mãq, nữn hayơu pơnõq adơi sơai yeh ngãq yơu song ôh tồq mãq? 8Pơnõq adơi sơai nữn song hũ siàp hatai vloh! Pơnõq adơi sơai song tơviãq jỡc mơda gơnãp vloh! Pơnõq adơi sơai song pơdòq kaya apãt akõq nữn ôh gơnang mưng pơnõq hlãq, sì hlãq chơkhãq khiãng pơnõq adơi sơai apãt akõq viãq, tồq pơnõq hlãq kung pơlih hũ apãt akõq sigỡuq sì pơnõq adơi sơai. 9Kơyua hlãq sơnơng Yàc Pô Lơngĩq song va chẽq pơnõq hlãq tơviãq ngãq dơgrữq mơnuĩh gơnuar pơđar luôĩq hadơi, yơu dơgrữq mơnuĩh kađòc krỡq jam ãt mơtai. Kơyua pơnõq hlãq song tơviãq jỡc sa kaya tãm-ya ga dun kơyua — ga mơnuĩh gơnrơh gãm sì ga anàq mơnuĩh. 10Pơnõq hlãq la dơgrữq mơnuĩh gơla pơtòq kơyua mưng Yàc Dõc Pơ-tlah, dòq pơnõq adơi sơai nữn jãc rgơi dơlãp Yàc Dõc Pơ-tlah. Pơnõq hlãq lơduh lơmuỡn, dòq pơnõq adơi sơai nữn prãn khãc. Pơnõq adơi sơai hũ ki ngãm, dòq pơnõq hlãq nữn kađòc iãq ôh srãp. 11Tãl trôh tũq nĩ, pơnõq hlãq gãm ãt lơpa, gãm ãt mơhao ia, gãm chồq ao charơpha tẽq kalôh, gãm sì kađòc poh gơlĩh pơđìq pơđua, gãm sì ôh hũ sàc anĩh dòq, 12gãm sì ngãq vruãq dleh dlàr, ngãq vruãq mưng plàq tơngãn drơi. Tũq kađòc puaĩq mơsão, pơnõq hlãq vrơi lơngai; dơlãp tũq mãq pakỡuq, pơnõq hlãq ãt ỡl; 13tũq kađòc đơp pơdah, nữn pơnõq hlãq đơp pơnuaĩq pa-blôh pơsiàp hatai. Pơnõq hlãq song tơviãq jỡc yơu dơgrữq khãq harô dun kơyua hũ, dơgrữq kaya prah luơi, tãl trôh tũq harơi nĩ.

14Hlãq ôh iỡuq wãq dơgrữq pơnuaĩq nĩ pioh ngãq mơlơu ơlah ga pơnõq adơi sơai, nữn hlãq pơto pơđar adơi sơai yơu anàq anĩt duman hlãq hũ. 15Kơyua bôh làiq pơnõq adơi sơai hũ tơlãc tamỡn mơnuĩh dui-va dơlãp Yàc Dõc Pơ-tlah, nữn mĩn ôh hũ lũ ama; kơyua mưng hlãq song pajỡc tơviãq pơnõq adơi sơai dơlãp Yàc Dõc Pơ-tlah Je-su gơnang mưng Pơnuaĩq Siàp. 16Yơu nữn, hlãq pơto pa-sơdor pơnõq adơi sơai iỡuq tơviãq jỡc dơgrữq mơnuĩh mơgrũ đõm hlãq. 17Kơyua kanõh gơtha nĩ hlãq pơđar Ti-mô-the nao, nữn la mơnuĩh anàq anĩt duman sì tui tơpãq hlãq hũ dơlãp Yàc, trôh pãp pơnõq adơi sơai, nhũ nữn ròq pa-sơdor pơnõq adơi sơai mưng dơgrữq jơlàt ơthua hlãq hũ dơlãp Yàc Dõc Pơ-tlah Je-su, drưh yơu hlãq pơto akhàt dơlãp dơgrữq voh sàc pơjũm sơđah vãq avih dơgrữq anĩh. 18Bôh làiq yơu nữn, ngãq yơu kơyua hlãq ôh trôh sì pơnõq adơi sơai, nữn hũ tơkìq mơnuĩh pa-dlòc rùp yeh drơi. 19Nữn hlãq ròq sơmar trôh sì pơnõq adơi sơai, mơyah làiq Yàc ưng, sì hlãq ròq kơnãl thơu ôh iỡuq mưng pơnuaĩq đơp dơgrữq mơnuĩh yeh drơi dih, nữn la kaya prãn pơnõq nhũ. 20Kơyua palơi lơgar Yàc Pô Lơngĩq ôh iỡuq mưng pơnuaĩq đơp, nữn la mưng gơnuar chơnuãq. 21Pơnõq adơi sơai ưng kaya hagĩq? Hlãq ưng trôh sigỡuq sì pơnõq adơi sơai sì mưng gai hơwai, hẽla va kaya khiãng duman sì hatai lơmuỡn siàp?