1 Kô-rin-tô 3

1Pa-thơu pơnõq adơi sơai, hlãq vloh ôh tũq halơi đơp sì pơnõq adơi sơai yơu đơp sì mơnuĩh pơweh gah suàt vơngãq, nữn la yơu đơp sì dơgrữq mơnuĩh gah rơlo rùp, yơu đơp sì mơnuĩh lơđeh tìt dơlãp Yàc Dõc Pơ-tlah. 2Hlãq song vrơi ga pơnõq adơi sơai mơnhũm ia tasơu nữn ôh iỡuq vrơi kaya bõc khõl, kơyua pơnõq adơi sơai ka-ôh bõc jỡc. Viãq yơu nữn, vloh tãl trôh tũq nĩ, pơnõq adơi sơai kung ka-ôh tũq halơi bõc jỡc. 3Kơyua pơnõq adơi sơai gãm dòq pơweh gah rơlo rùp. Kơyua dòq di khrãh pơnõq adơi sơai, la dòq kaya ham khiãng sì mơvlah kơchah, nữn vloh ôh iỡuq pơnõq adơi sơai la gah vơnah rơlo rùp, sì bõc dòq yơu mơnuĩh rài nĩ yơh? 4Kơyua, tũq mơnuĩh nĩ đơp: “Hlãq tui Pol,” dòq mơnuĩh tơmo vloh đơp: “Hlãq tui A-bô-lô,” nữn ôh iỡuq pơnõq adơi sơai la mơnuĩh gah rài nĩ yơh? 5Yơu nữn, A-bô-lô la asơi? Dòq Pol la asơi? La dơgrữq mơnuĩh halỗt mơnãq, nữn pơnõq adơi sơai hũ dui-va trôh pa voh-tui mưng pơnõq nhũ, vloh kung tui gơnuar vruãq Yàc song vrơi kaya anĩt ga dơgrữq tãl aràc. 6Hlãq song pơla, A-bô-lô song tôh pa-đuaĩq ia, nữn Yàc Pô Lơngĩq ngãq ga prõng tơgùq. 7Yơu nữn, ôh iỡuq mơnuĩh pơla, kung ôh iỡuq mơnuĩh tôh pa-đuaĩq ia la hagĩq ôh, nữn Pitao ngãq ga prõng tơgùq la Yàc Pô Lơngĩq. 8Dòq mơnuĩh pơla sì mơnuĩh pa-đuaĩq ia la yơu gỡuq, nữn dơgrữq tãl aràc ròq tồq mãq hũ jĩn harơi drơi tui yơu vruãq ngãq drơi hũ. 9Kơyua pơnõq hlãq kung la dơgrữq mơnuĩh ngãq vruãq sigỡuq pơweh mưng Yàc Pô Lơngĩq. Pơnõq adơi sơai la vỡn Yàc Pô Lơngĩq hũ, la sàc Yàc Pô Lơngĩq hũ.

10Tui yơu kaya anĩt Yàc Pô Lơngĩq hũ song vrơi ga hlãq, hlãq song padỡc rơnỡq drưh yơu mơnuĩh khưh rgơi ngãq, vloh sa aràc mơnuĩh khưh rgơi tơmo vỡq padỡc tơgùq pãq dlòc đỡn, nữn avih dơgrữq tãl aràc iỡuq gơrhia iãq mưng pơnẽq drơi vỡq padỡc tơgùq pãq dlòc đỡn, 11kơyua ôh asơi pơlih vỡq padỡc sa voh rơnỡq tơmo lơniãu rơnỡq song hũ vỡq padỡc, sì nữn la Yàc Dõc Pơ-tlah Je-su. 12Yơu nữn, mơyah làiq hũ mơnuĩh halơi vỡq padỡc pãq dlòc rơnỡq nữn mãq mưng mữh, priãq, patơu màc, tơlũc kayơu, rỡq thô, apồc nrãc, 13nữn vruãq ngãq avih tãl aràc ròq tơviãq jỡc nĩq nũn, kơyua harơi nữn ròq ràc pa-tơviãq; kơyua nhũ hũ ràc tơviãq dơlãp apôi, sì mưng apôi ròq lòc vruãq ngãq dơgrữq tãl aràc hũ đang mang yơu halơi. 14Mơyah làiq vruãq ngãq mơnuĩh halơi hũ vỡq padỡc gãm dòq wỡq, nữn la vruãq ngãq mơnuĩh nữn song vỡq padỡc, nữn mơnuĩh nữn ròq tồq mãq hũ kaya ban prõng; 15dòq mơyah làiq vruãq ngãq mơnuĩh halơi ãt kađòc apôi bõc lơhiãq, nữn mơnuĩh nữn ròq kađòc lơhiãq, dòq rùp phuỗt drơi ròq hũ dõc suãq, nữn yơu mĩn gãt tơpa apôi.

16Pơnõq adơi sơai ôh thơu làiq pơnõq adơi sơai la sàc duh talơvãt Yàc Pô Lơngĩq hũ sì Vơngãq Sơđah Yàc Pô Lơngĩq hadiuq dơlãp drơi yơh? 17Mơyah làiq mơnuĩh halơi ngãq pa-lơhiãq sàc duh talơvãt Yàc Pô Lơngĩq hũ, nữn Yàc Pô Lơngĩq ròq pa-lơhiãq mơnuĩh nữn. Kơyua sàc duh talơvãt Yàc Pô Lơngĩq la sơđah sơchih, sì sàc duh talơvãt nữn la pơnõq adơi sơai.

18Juơi mơnuĩh halơi pa-gơla pơgàt krơi rùp drơi. Mơyah làiq hũ mơnuĩh halơi dơlãp pơnõq adơi sơai ngãq yơu la jãc rgơi dơlãp rài nĩ, nữn mơnuĩh nữn iỡuq tơviãq jỡc “mơnuĩh gơla pơtòq”, tồq pơlih hũ tơviãq jỡc jãc rgơi. 19Kơyua kaya jãc rgơi dun kơyua nĩ hũ la kaya gơla pơtòq di anãq Yàc Pô Lơngĩq. Kơyua hũ pơnuaĩq wãq, làiq:

“Pitrai mãq dơgrữq mơnuĩh jãc rgơi dơlãp kaya jãc khưh pơnõq nhũ hũ.”

20Vloh wãq wỡq làiq:

“Yàc thơu avih dơgrữq kaya sơnơng mơwan mơnuĩh jãc rgơi hũ, pơnõq nhũ mĩn la ôh kuơ viãq.”

21Kơyua yơu nữn, juơi asơi yeh drơi mưng anàq mơnuĩh tơra. Kơyua avih dơgrữq kaya kung la mưng pơnõq adơi sơai hũ, 22bôh làiq la Pol, hẽla A-bô-lô, hẽla Se-pha, bôh làiq la dun kơyua, hẽla kaya hadiuq, hẽla kaya mơtai, hẽla vruãq tũq nĩ bôh, hẽla vruãq ròq trôh. Avih dơgrữq kaya kung pơweh sì mưng pơnõq adơi sơai, 23dòq pơnõq adơi sơai pơweh pa Yàc Dõc Pơ-tlah, sì Yàc Dõc Pơ-tlah pơweh pa Yàc Pô Lơngĩq.