भजनसंहिता 86:5

सहायता को लाय पिराथना

दाऊद को पिराथना

1ओ यहोवा, कान लगाके मोरी आयक लेय,

काहेका मी दीन अना गरीब अना जरुरत वारो सेऊँ।

2मोरो पिरान को रक्सा कर, काहेका मी भक्त सेऊँ;

तू मोरो परमेस्वर आस, एकोलाय आपरो दास को,

जेनको भरोसा तोरो पर से, सुड़ाय ले।

3ओ पिरभू, मोरो पर दया कर,

काहेका मी तोला च राति अना दिवस पुकारत रव्ह सेऊँ।

4आपरो दास को मन ला खुसी कर,

काहेका ओ पिरभू, मी आपरो मन तोरो कन लगायो सेऊँ।

5काहेका ओ पिरभू, तू भला अना माफ करनवालो से,

अखिन जेतरा तोला हाकलासेत उन सबको लाय तू बेजा दयालू मय से।

6ओ यहोवा मोरी पिराथना कन आपरो कान लगाय,

अखिन मोरो गिड़गिड़ावनो धयान लक आयक।

7संकट को दिवस मी तोला हाकलू,

काहेका तू मोरी आयक लेहे।

8होय पिरभू, देव गिनमा लक कोनी भी तोरो बराबर नहाय,

अना ना कोनी च को काम तोरो काज गिनको बरोबर से।

9ओ पिरभू जितरो राज को लोखहुन तूना बनायो से,

सप्पा आयके तोरो मोहोरा टोघरा टेकेत,

अना तोरो नाव को महीमा करहेत।1

10काहेकि तूच महान अना अचरज को काम करन वालो आस ,

सिरप तूच परमेस्वर आस।

11ओ यहोवा, आपरो रास्ता मोला चोवाय,तबा मी तोरो सत मारग मा चलहुन।

मोला एक चित्त कर का मी तोरो नाव को भेव मानू।

12ओ पिरभू ,,मोरो परमेस्वर, मी आपरो पूरो मन लक तोरो धन्यवाद करहु।

अना तोरो नाव को महीमा हरामेसा करतो रव्हु।

13काहेकी तोरी दया मोरो वरता मोठीसे।

अना तूना मोला मरनलोक को पेन्दी मा जावन लक बचाय लियो से।

14ओ परमेस्वर, ताकतवर घमन्डी लोख मोरो बिरोध मा उभो भयी गयो सेत।

अना उपदरी गिनको दल मोरो जियान ला तपासासेत।

अना वोय तोरो काही बिचार नही राखत।

15पर पिरभू सही दयालु अना किरपा करनवालो परमेस्वर आय।

तू उसीर लक गुस्सा करनवालो अना लगत करूना करन वालो आस।

16मोरो कन मुरक के मोरो पर किरपा कर

आपरो दास ला तू ताकत देय2,

अना आपरी दासी को टूरा को उद्धार कर।

17मोला भलाई को कोनी निसान चोवाय,

जोनला चोयके मोरो बयरी निरा सोय,

काहेकि ओ यहोवा, तूना खुद मोरी मदद कियो

अखीन मोला सान्ति दियो से।