भजनसंहिता 42:11

दूसरा भाग

(भजनसंहिता 42—72)

हेडयो गयो मानूस को पिराथना

मुखिया बजानेवाले के लिये कोरहबंसी गीन का मस्कील

1जसो हिरन नदी को पानी को लाय हाँफ से,

वसो च, ओ परमेस्वर, मी तोरो लाय हाँप सेव।

2जिन्दो परमेस्वर, हाँ परमेस्वर, को मी तहान सेव,

मी कबा जायके परमेस्वर ला आपरो टोन्ड चोवाहुँ?

3रात अखिन दिवस मोरो आंसू च जेवन रव्हा सेत।

लोख लगातार मोरो लक पूस से, “तोरो परमेस्वर किता से?”

4यो जान के मोरो पिरान दुखी हो जावसे।

मी कसो तिहार मा गरदी को संगा जावत होतो;

:मी लोखगीन कि संग गयो होतो।

मी जय जयकार अना धन्यवाद को संग,

जय जयकार करन वाली भीड़ को बीच मा परमेस्वर को मन्दिर मा धीरु-धीरु जावत होतो।

5ओ मोरो पिरान, तू कायको लाय व्याकुल से?

कायलक तू हिरदय मा उदास से?

ओ मोरो पिरान ,तू परमेस्वर की आसा कर;

मी आपरो उध्दार ला ,आपरो परमेस्वर ला मंग लक धन्यवाद करहु।

6मोरो हिरदय मा पिरान बेचैनी से एकोलाय मी यरदन को जवर को देस लक,

अखिन हारमोन परदेस लक मिसार की पहाड़ी लक

मी आपरो परमेस्वर पर धियान ठेवासुँ।

7तोरो पानी धाराहीन को सब्द आयक,

पानी, पानी ला हाकल से;

तोरी सबरी तरंग अखिन लहर मा मी डूब गयो सेव।

8तबा भी दिवस को यहोवा आपरी ताकत

अखिन करूना पिरगट करहे;

अखिन रात ला भी मी ओको गीत गाहुँ

अखिन आपरो जीवनदाता पिरभू लक पिराथना करुँ।

9मी आपरो परमेस्वर, आपरी चट्टान लक येव पूसा सेव,

“तू न मोला कायको लक भुलाय दियोस?

काय मी दुसमन को अत्याचार को कारन सोक को पहिराव

पहिन के मारो-मारो फिर सेव?”

10मोरो बैयरी ताना मार से। वय मानो सरीर मा घातक पहार करासेत।

वय लगातार मोरो लक कव्हासेत “तोरो परमेस्वर किता से?”

11हे मोरो पिरान, तू कायको लाय दुखी होवासे?

तू भीतर च भीतर कायलक व्याकुल से?

परमेस्वर पर भरोसा राख;

काहेकि ऊ मोरो उध्दारकर्ता मोरो परमेस्वर से,

मी फिर ओको धन्यवाद करासुँ।