Powari Standard Project
भजनसंहिता 37:4
Verse 4 is marked below, with the whole chapter around it. Read from the start
दुस्टगिन अखिन नेक लोगहुन को किस्मत
दाऊद का भजन
दुस्टगिन को कारन चिन्ता नोको कर, बूरो काम करन वारो को बारे मा जलन नोको करो!
काहेकि उ गवथ को जसो झटाक आईमाई कट जाहेत;
अखिन हिवरो गवत को समान मुरझा जाहेत।
यहोवा पर भरोसा राख, अखिन भला कर, धरती मा बसयो रव्ह,
अखिन सच्चाई मा मन लगाय रव्ह
यहोवा मा खूस रव्हो ,अखीन ऊ तोरो मनोरथ ला करहे।
आपरो रास्ता की चिन्ता यहोवा पर छोड़,
अखिन ओको पर भरोसा रख ,ऊ पूरो करहे।
ऊ तोरो धरम उजाड़ को जसो अखिन तोरो नियाय दुपारी को उजाड़ो को जसो परगट करेत।
यहोवा को मोहरा चुपचाप रव्ह,
अखिन धीर लक ओकी इन्तजार कर;
ओ मानूस को कारन नोको कुढ़, जेको काम सुफल होवासे ,
अखिन उ बुरी योजना ला हेडा से।
गुस्सा लक दुहूर रव्ह, अखिन हिजडनो ला सोड!
नोको कुढ़ , ओको लक बुराई च हिटेत।
काहेकि कुकरमी लोख काट डाको जाहेत,
अना जोन यहोवा को रास्ता चोवासेत,
वय धरती को अधिकारी होहेत।
जरा सो उसीर मा दुस्ट नहि रहेत।
तुमी ओ जाघा ला धियान लक चोवने पर उता उ नहीं होहेत।
पर दीन-गरीब लोख धरती को अधिकारी होहत ,
अना मोठो सांती को कारन खुसी मनाहेत।
दुस्ट नेक को बिरोध बुरी योजना हेड़ासे
अखिन ओको पर दांत पीस सेत।
पर पिरभू ओको पर हासेत
,काहेकि उ देखा से कि वोको दिवस आवनवारो से।
दुस्ट लोख तलवार झीक के अखिन धनुस चढ़ायो हुयो से ,
जोन लक दीन-गरीब ला पाड़ देंह,
अखिन सीदो चाल चलनवारो ला मार डाके।
ओकी तलवार लक ओको च हिरदय छेदेत,
अखिन ओको धनुस तोड़ो जाहेंत।
नेक मानूस को जरासो धन
दुस्ट को लगत सो धन लक साजरो से।1
दुस्ट हीन की भुजा तोडयो जाहेत,
आन पिरभू नेक मानूस को आधार से।
यहोवा खरो लोख गिनकी उमर की सुधि राखासे,
अखिन ओको वारसाना हक हमेसा बनयो रव्ह से।
वय संकट को बेरा मा भी लज्जित न होहे
अना गिरहानी मा भी अघाय जाहेत।
दुस्ट लोख खत्म भय जाहेत
अखिन यहोवा को दुसमन खेत को सूम को गवथ जसो खतम होहेत,
वय धुंगा को जसो गायब भय जाहेत।
दुस्ट मानूस उधार लेवासेत पर चुकावत नहि,
अना नेक मानूस दान देवनो मा उदार दया होवा सेत;
पिरभू को आसीस पायो गयो लोख धरती को अधिकारी होहेत ;
आन वय लोख खत्म भय जाहेत जिनला पिरभू न सराप दियो से।
मानूस को रास्ता यहोवा को कन लक पिक्को होवासेत,
अना वा वोकी चलन लक खुस होवासेत।
चाहे उ पड जाय तभी पड़यो नही रहेत , काहेका यहोवा वोको हात थामो रव्हासे।
मी जुवानी लक बुड़गो पन तकन चोवतो आयो सेऊ,
नातो नेक ला तियागो हुवो ना वोको बंस ला तुकड़ा मागतो चोयो सेऊ।
उ तो दिवस भर दया करतो रव्हासेत, अना उधार देवासेत, अना वोको बंस मा आसीस फलासेत।
बुराई ला छोड़ अखिन भलाई कर, अना तू हमेसा बनयो रव्हजोस।
काहेकि यहोवा नियाय लक माया राखासेत,
अखिन आपरो बिस्वास जोग सेवक लोख ला नही तजेत,
उनको रक्सा हरामेसा लक होतो रव्हे।
पर दुस्ट को संतान ला काट डाकेत।
नेक लोख धरती को अधिकारी होहेत ,
अखिन ओको मा हमेसा को लाय बसयो रहेत।
नेक मानूस आपरो जुबान लक अक्कल को गोस्टि करासेत।
अना नियाव को बचन कव्हासेत।
परमेस्वर को कानून ओको हिरदा मा बनयो रव्हासे;
एको लाय वोको पाय नही घिसरासे।
दुस्ट मानूस नेक मानूस को घात रव्हा से।
अखिन उ वोको खून करन को जुगाड़ मा रव्हासेत।
यहोवा नेक मानूस ला वोको हात मा नहि सोडा सेत,
जबा नेक मानूस को नियाय होहेत,
तबा ऊ वोला दोसी नहि ठयराहे।
यहोवा को बाट जोन चोवतो रव्हे ,
अखिन ओको रास्ता पर बनयो रव्हे ,
अखिन उ तोला बड़ाय को अधिकारी कर देहे ;
जब दुस्ट लोख काट लियो जाहेत, तबा तू चोहेत।
मी न एक लगत ताकतवारो दुस्ट ला देखयो होतो।
जसो कोनी मोठो झाड़ जसो लगत मोठो हिवरो झाड़ आपरी खुदकी जमीन मा फयलो सेत।2
अना जब कोनी उता लक आयो तो देखयो का उ उता नहात,
अखिन मी वोला ढुन्डयो पर वा मोला नही चोयो।
साजरो मानूस पर नजर राख अखिन सच्चो ला देख,
काहेकि सान्ती चाव्हन वालो मानूस को भविस्य उज्जवल होवासे।
अना पापी गिनला एक संगा मा खत्म करयो जाहेत,
पर दुस्टहीन को आखरी फर सत्यानास भयी जाहे।
नेक मानूसगिन को मुक्ति यहोवा को कन लक होवासे;
संकट को बेरा उ उनको पिक्को किला से।
यहोवा उनको मदत करके उनला बचावसे।
उ उनला दुस्ट लोगहुन लक सुड़ाय के उनला बचावासे।
ऐकोलाय का उनना वोमा सरन लियो से।
Source notes (2)
- Cross-reference नीतीवचन 15:16
- Footnote लेबनोन मा एक देवदार को झाड जसो विसाल होतो।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.