भजनसंहिता 19:14

जगत मा परमेस्वर की महीमा

(परधान बजनवारो को लाय दाऊद को भजन )

1बादल परमेस्वर की महीमा को बखान कर रह्यो से,

बादल को तारागिन वोको हात को कला हीनला को परगट करा से।

2दिवस लक दिवस गोस्टि करासे, अखीन

राति ला राति गियान सिकावासेत।

3न तो कोनी बोली आय, अखिन न भासा च आय,

उनको अवाज नही आयकयो गयो।

4मंग उनकी आवाज सबरी धरती मा गून्ज गयो सेत,

अखिन धरती को छोर तकन पहोच गयो से।

परमेस्वर न बादल को बीच

दिन को लाय एक मान्ढो उभो करी से।1

5जो नवर देव को जसो अपरो महल लक हिटासे।

उ बीर को जसो आपरी दवड़- दवड़न मा खुस होव्ह से।

6ऊ बादल को एक छोर लक हिटसे,

अखिन ऊ ओको दुसरो छोर लक मुरका सेत।

अखिन ओको गरमी सबला भेटासेत।

परमेस्वर को कानून

7यहोवा को कानून खरो से,

ऊ पिरान ला साजरो कर देसे

यहोवा को नियम बिस्वास को लायक से,

साधारन लोख गिनला अक्कलवर बनावा से;

8यहोवा को कानून सच्चो से,

हिरदय ला खुस कर देवासे;

यहोवा को आदेस निरमल से;

उ डोरा मा उजाड आनासे।

9यहोवा को भेव पवीतर से,

उ अमरबेरा तकन अटल रव्ह से

यहोवा को नियम सत अखिन पूरी रीति लक न्यायमय से।

10उ तो सोन्नो लक अखिन कुन्दन लक

भी बढ़के मन मोहक से

वय मोहतल लक अखिन रस टपकन वारो

छत्ता लक भी बढ़के मिठ्ठो से।2

11उनको च लक तोरो दास ला चितायो जावासेत,

उनको हुकूम मानन को फर मोला भेटासेत।

12आपरी भूलचूक बिचार ला कोनि जान सका से?

मोरो लुकयो पापहीन लक तू मोला पवीतर कर।

13तू आपरो सेवक को हेकड़पन को

पाप करन ला रोक

वोय मोरो पर सासन नोको करनो पाय।

तबा मी सिद्ध भयी जाहु,

अखिन मोठो गुनाह लक छुट जाहुन।

14मोरो टोंड को बचन

अखिन मोरो हिरदय को मनसा तोरो मोहरा गिरहन जोग होय,

ओ यहोवा परमेस्वर,

मोरी चट्टान अखिन मोला मुकती देवन वारो आय