Powari Standard Project
भजनसंहिता 139:14
Verse 14 is marked below, with the whole chapter around it. Read from the start
परमेस्वर का सिद्ध गियान
परधान बजानवालो को लाय दाऊद को भजन
ओ यहोवा, तूना मोला जाँच के जान लियो से!
तू मोरो उठनो-बसनो ला जानासेत।
अना मोरो बिचार ला दूहूर च लक
समज लेवासेत!
मोरो चलनो अना लेटनो ला तू साजरो लक छानबीन करासेत।
अखीन मोरो पूरो चाल-चलन को भेद ला जानासेत।
ओ यहोवा, मोरो टोड़ मा असी कोनी गोस्टि नहात
जोनला पूरो रीत लक तू नही जानासेत।
तू ना मोला पुढ़ो-मघा घेर राखयो से,
अखिन आपरो हात मोरो पर राख्यो रव्हासेत।
यो गियान मोरो लाय लगत कठीन से,
यो गंभीर अना मोरो समज लक बाहेर से।
मी तोरी आतमा लक पराय के किता जाऊ?
या तोरो मोहोरा लक किता पराऊ?
अदि मी बादल मा चघू तो तु उता से।
अदि मि आपरो हतरन पताल मा बिछाऊ
तो उता भी तूच सेत।
यदि मी सक्कारी को कीरन मा चघ के
समुंदर को वोनागन जाय के बस जाऊ
तो उता भी तू आपरो हात लक
मोरो अगवाई करजोस
अना अपरो उज्जो हात लक मोला धर लेवजोस।
यदि मी कव्हू क इन्धार मा तो मि लुक जाऊ,
अखिन मोरो चारी कन को उजियारो
राती को इन्धार भयी जाय!
तो भी इन्धार तोरो लक नही लुकायेत।
राती ता दिवस को जसो उजाड़ देहेत।
काहेका तोरो लाय इन्धयार
अखिन उजाड़ दुय एक जसो से।
मोरो मन को मालिक तो तूच आस!
तू ना मोरी माय को पोट मा रचयो!
मी तोरो धन्यवाद करहुँ
एकोलाय मी भयानक अखिन
अदभूत रीत लक रचयो गयो सेऊ। तोरो काम ता चमत्कार का सेत अना मी येला भलो साजरो लक जानासूँ।
जबा मी लुकयो मा बनाय जावतो,
अना धरती को खाल्या को जघा मा रचयो जात होतो।
तब मोरी हाड तोरो लक लुकयो नही होतो।
तोरो डोराना मोरो भद्दो चीज ला चोवयो,
अना मोरो सबरी आंग जोन दिवस-दिवस बनत जात होतो ,
वो बनावन को पहेले तोरी किताब मा लिखयो होतो।
मोरो लाय तो ओ परमेस्वर,
तोरो बिचार का च किमती से।
उनको गिनती को जोड़ कसो मोठो सेस!
यदि मी उनला मोजतो तो वोय
बालू को कन लक भी जादा ठयरतो।
जबा मी चेतासू तबा भी तोरो संग रव्हासू।
ओ परमेस्वर, पक्को तू दुस्ट ला मार डाकजोस!
ओ खूनीहुन मोरो लक दूहूर भयी जाव!
काहेकि वोय तोरो चरचा को योजना चतुराई लक करासेत।
तोरो दुस्मन तोरो नाव खोटो गोस्टि मा लेवासेत।
ओ यहोवा, का तोरो बयरी गिन लक
बयीर नोको करू
अना तोरो बिरोधी गिन लक घिरना रखुसूँ?
हव, मी उनलक पूरो बयर राखासू,
मी उनला आपरो बयरी समजासू।
ओ परमेस्वर, मोला परख के जान ले!
मोला परख के मोरो बेचेन करन वारो बिचार ला जान ले!
अखिन चोव का मोरो मा कोनी बूरो चाल सेत का नहात,
अखिन अमर को रास्ता मा मोरो अगुवाई कर!
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.