हिटनो 28

याजक गीनको कपरा

(हिटनो 39:1-7)

1तु इसरायली गिनको बीचमा लक आपरो भाऊ हारून अना वोको संग वोको टूरागीन, नादाब, अबीहू एलआजर अना ईतामार ला मोरो जवर आन, का वय मोरो लाय याजक को काम करहेत। 2तू आपरो भाऊ हारून को मरयादा अना सोभा को लाय पवीतर कपरा बनावने। 3तू उन सब अक्कलवर कारीगीर गिनलक, जोनला मी आपरो पवीतर आतमा को अक्कल लक भर देहू, उनला च कव्हजोस का वय हारून को कपरा बनायेत, जोन लक वय पवितर होयके मोरो लाय याजक को काम करहेत। 4जोन कपरा उनला बनानो से वय यो सेत, सीनाबन्द अना जामा, चारखाना को कमीज पगडी अना कमरबन्द सेत। यो सब तोरो भाऊ हारून अना वोको टूरा गीन को लाय बनाव अना वय मोरो लाय पवीतर याजक काम करहेत। 5अखीन वय सोन्नो अखीन नीलो अखीन बैंजनी अखीन लाल रंग को अखीन बारीक सन को कपरा लेव।

6“वय कारीगर सोन्नो को तार अखीन झीनो सूत को बनो नीलो, बैंजनी अखीन लाल रंग को कपरा जोनमा बारीकी को संग कढाई हात लक कियो हुयो एपोद बनाहेत। 7वा असो परकार जोड़े जाय का वोको दोनो खन्दा एकमेक लक जुड़यो रहेत। 8अना एपोद मा जोन कढाई वालो पट्टा होहेत, वोको बनावट वोको जसोच होय अखीन वोमा कोनी परकार को जोड़ नही होवनो पाहीजे। अखीन सोन्नो अखीन नीलो बैंजनी अना लाल रंग झीनो सूत को कपरा को बनो होहेत। 9वोको बादमा तू दोन सुलेमानी मनी लेवजोस अखीन वोको मा इसराइली को टूरा हुन को नाव खुदवाजोस। 10उनको नाव सह एक मनी मा अखीन सह दूसरो मनी मा इसरायल को टूरा हुनको पैदाइस को अनुसार खुदवाजोस 11अखीन मनी खोदन वालो कारीगर को काम जसी छापा खुदरो जावा सेत वसोच वय दोनो मनी गीन मा इसरायल को टूरा गिनको नाव खोदवाके सोन्नो को खाना मा जडवा देवजोस। 12अखीन दूई मनी गीनला एपोद को खन्दा पर लगवाजोस अखीन वय इसराइली गीनला हेत करान वालो मनी ठयरेत, मजे हारून उनको नाव यहोवा परमेस्वर को पूढा दोनो खान्द मा हेत को लाय लगाये राखेत। 13मंग सोन्नो को खानो बनवाजोस, 14अना दोरी को जसो गुथो हुयो चोखो सोन्नो को संकल बनवाके, अना गुथो हुयो संकल ला उन खानो मा जड़वा देजोस।”

सीना बंद

15“मंग न्याय को सीना बंद ला भी कढाई को काम को बनवाजोस, एपोद को जसो सोन्नो अखीन नीलो, बैजनी लाल रंग को अखीन झीनो सूत को बनो कपरा को वोला बनवाजोस। 16वा चवरस अना दोहरो होय, अखीन वोको लम्बाई अना चवडाई एक-एक बिल्लस को होवनो पाहीजे। 17अना वोमा चार लाईन मनी जड़ने। पहेलो लाईन मा तो किमती गोटा, पद्मराग अना लालड़ी होय, 18दूसरो लाईन मा किमती गोटा मरकत नीलमनी अखीन हीरा, 19तीसरो लाईन मा किमती गोटा लसम, सूरयाकान्त, अना नीलम, 20अखीन चवथो लाईन मा किमती गोटा, सुलेमानी मनी , अना यसब होय, यो सब सोन्नो को खानो मा जड़यो जाय। 21अखीन इसरायल को टूरा गीनको जितरो नाव सेत उतरोच मनी होवनो पाहिजे। मजे उनको गोतर को गिनती को अनुसार बारह नाव खोदो असो का जसो छापा खोदो जावासेत। 22मंग सीनाबन्द पर दोरी को जसो गुथयो हुयो चोखो सोन्नो को संकल लगवाजोस। 23अखीन सिनाबन्द मा सोन्नो को दोन कडी लगवाजोस,अना दुई कड़ी ला सीनाबन्द को दोनो छोर मा लगवाजोस। 24अखीन सोन्नो को दोनो गूथो संकली ला उन दोनो कड़ी मा जोन सीनाबन्द को छोर मा होहेत लगवाने, 25अखीन गुथो हुयो दुई संकल को दोनो खाना मा जड़ के एपोद को दोनो खन्दा को बन्धन मा वोको समोर लगवाने। 26मंग सोन्नो को दोन अखीन कड़ी बनायके सीनाबन्द को दोनो छोर मा, वोको वोना किनार मा जोन एपोद को भितर को होहेत लगवाजोस। 27मंग उनको सिवाय सोन्नो को दोन अखीन कड़ी बनाय के एपोद को दूई खान्द को बन्धन गीनमा, खाल्या लक वोको समोर अना वोको जोड को कठा एपोद को कढाई कियो हुयो पट्टा को वरता लगवाजोस। 28अखीन सीनाबन्ध आपरो कड़ी गिनलक एपोद को कड़ी गिनमा नीलो फीता लक बान्धयो जाय असो रीत लक वा एपोद को कढाई कियो हुयो पट्टा मा बनयो रव्हे अखीन सीनाबन्ध एपोद लक बेगरो नही होवनो पाय।”

29जब-जब हारून पवीतर जघा मा जाय, तबा-तबा उ न्याय को सीनाबन्ध पर आपरो दिल को वरता इसराइली गिनको नाव ला लगायो रव्हे, जोनलक यहोवा को पूढा वोको हरामेसा हेत रहेत। 30अखीन तू न्याय को सिनाबन्ध मा ऊरीम अखीन तुम्मीम1 ला राखने, अखीन जब-जब हारून यहोवा को समोर आहेत तबा-तबा वय वोको हिरदा को वरता होय असो परकार लक हारून इसराइली गिन को न्याय ला आपरो हिरदा को वरता मा हरमेसा लगयो रहेत।2

दूसरो याजकीय कपरा

31“मंग एपोद को बागा ला पूरो नीलो रंग को बनवाजोस। 32वोको बनावट असो होय का वोको बीचमा डोस्का डाकन को लाय एक छेदा होवनो पाहिजे, अना वा छेदा को आखा-पाखा बख्तर को छेद को जसो बुनो हुयो कोर होवनो पाहीजे। जोन लक वा नही फट सकेत। 33वोको खाल्या वालो घेर मा आखा-पाखा नीलो, बैंजनी अना लाल रंग को कपरा को अनार लगवाजोस अना वोको बीच मा चारो कन सोन्नो को घंटी लगवाजोस, 34मजे एक सोन्नो को घंटी अना एक अनार, असो रीत लक जामा को खाल्या वालो घेर मा आखा-पाखा असोच होय। 35हारून वो जामा ला घाल के याजकपन को काम करहेत, जब-जब उ पवीतर जघा को भीतर यहोवा को समोर जाय या बाहेर हीटेत ता घंटी को अवाज आयकोवायेत, नही ता उ मर जाहेत।

36“मंघ चोखो सोन्नो को एक पट्टी बनवाजोस, अना जसो छापा मा से वसोच वोमा भी अक्सर खोदो जाय, मजे ‘यहोवा को लाय पवीतर’” 37अखीन वोला नीलो फीता लक बान्धजोस, अना वा पगडी को समोर को हिस्सा मा रहेत। 38वा हारून को मस्तक मा रहेत, एकोलाय का इसराइली जोन काही पवीतर ठयराहेत, मजे जितरो पवितर चीज भेटमा चघायेत उन पवितर चीज को दोस हारून उचलेत, अना उ हरामेसा अधरम वोको मस्तक मा रहेत, जोन लक यहोवा वोको लक खुस रहेत।

39कमीज ला महिन सूत को चारखाना वालो बनवाजोस, अना बेलबूटा को कढ़ाई को काम कियो हुयो एक कम्मर बन्ध भी बनवाजोस ,अना एक साफा जोन महीन सूती को होवनो पाहिजे।

40मंग हारून को टूरा गिनको लाय भी कमीज कमरबन्ध अना टोपी बनवाजोस यो कपरा भी मरयादा अना सोभा को लाय होहेत। 41आपरो भाऊ हारून अना वोको टूरागीन ला योच कपरा घाल के उनको अभिसेक अना संस्कार करजोस,अखीन उनला पवीतर करजोस का वय मोरो लाय याजक को काम करहेत। 42अखीन उनको लाय सनी सूती को कपरा को जांघीया बनवाजोस जोन लक उनको तन झकयो रहेत, वा कम्मर लक टोंगरा न रव्हनो पाहिजे। 43अना जब हारून या उनको टूरा हुन मिलाप वालो तम्बू मा जाहेत या पवीतर जघा मा सेवा करन को लाय वेदी को जवर जाय ता वय उन जांघीया ला घालयो रहेत जोनलक वय दोसी अधरम नोको ठयरेत अना मर जाय। यो हारून को लाय अना वोको बाद वोको बंस को लाय भी हरामेसा को नियम बन जाय।