Powari Standard Project
हिटनो 27
बेदी
“मघ तू बंबूर की लकड़ी को एक वेदी बनवाजोस, वा पाँच हात लम्बी अना पाँच हात चवडी गढवाजोस, वेदी चारखुटी होय अना वोकी ऊँचाई तीन हात की होय। तू वोको लाय चारों कोन्टा मा चार सींग बनवाजोस। वेदी अना वोका सींग लकड़ी का एकच टुकडा लक बनयो होय, अना वोला पीतर लक घडवाजोस।” तू वोका राखड़ उठान का भांडा, फावडागिन, बटकाहुन, कांटागिन अना घमेला बनवावना। वोका सबच भान्डा पीतर का बनवावना। अखीन पीतर की जाली एक झंजरी बनवावना। झंजरी का चारी कोन्टा मा पीतर का चार कुन्दा बनवावना। तू झंजरी ला वेदी को वरता येना पिरकार लगवावना का वा वेदी को अरधो ऊचाई को बीच तक आय। तू वेदी को लाई बंबूर की लकड़ी का डन्डागिन ला बनवावना, अना उनला पीतर लक घडवावना। डण्डागिन कुन्दागिन मा येना पिरकार डाकयो जाय का जबा वेदी उठायो जाहेत तबा वोय वोका दुई किनार मा रहेत। तू वेदी ला तखता लक पोलो बनवावना, जसी तोला येना पहाड़ मा दिसायो सेत वसीच बनवावना।
पिरभु की उपसतिथी वालो तम्बू को आंगन
तू तम्बू को आंगन बनवावना। आंगन का दक्सिन कन को लाई पड़दा पतलो बुनयो हुयो सूती को कपरा का होय वोय सबच मिलाय के एक कन वोकी लम्बाई सव हात की होय। अवर बीस खम्बा अना कासो की बीस कुरची बनवावना, खम्बागिन का कुन्दा अना पट्टिगिन खुरो का होय। येना पिरकार उत्तर को कन लाई भी सव हात लम्बा पड़दागिन होय उनको लाई बीस खम्बा अना कासो का बीस कुरची बनवावना। खम्बागिन का कुन्दा अना पट्टिगिन खुरो का होय। मघ आंगन का चवडाई मा दिनबुड़ती को कन पचास हाथ का पड़दागिन होय, उनका खम्बागिन दहा अना खन्दागिन भी दहा होय। दिन उगती को कन मा अँगन की चवडाई पचास हाथ का होय। अना अँगन का बेसकुड़ को एक अँगन पंदरा हाथ का पड़दागिन होय, अना उनका खम्बागिन तीन अना खन्दा तीन होय। अना दूसरो कन भी पंदरा हाथ का पड़दागिन होय उनका भी खम्बा अना खन्दा तीन होय। अँगन को बेसकुड़ को लाई एक पड़दा बनवावना, नीलो, बेजनी अना लाल रंग का कपरा अना बेलबूटा को कढ़ाई वालो होय ऊ बीस हाथ का होय, वोको लाई चार खम्बागिन अना चार खन्दा भी होय। अँगन का चारीकन का सबच खम्भा खुरो का पट्टिगिन लक जुड़या होहे, उनका कुन्दा खुरो का अना खन्दा पीतर का होय। अँगन की लम्बाई सव हात की, अना वोकी चवडाई बराबर पचास हात की अना वोका किनात का ऊँचाई पाँच हात का होय, वोका किनार बारीक मलमल को कपरा का होय, अना खम्बागिन का खन्दा पीतर का होय। रव्हन को जघा का सबच भान्डा अना सबच जुनुस, वोका सबच खूटागिन, अना अँगन का भी सबच खूटागिन पीतर कोच होय।
दीयो की देख-भाल
तू इसरायली लोकहुन ला आदेस देवजोस, का मोरो जवर टवरी को लाय कूट के हेडियो हुयो जयतून को चोखो तेल आनने जोन लक टवरी हरामेसा जलतो रहेत। हारून अना वोको टूरा उजाड़ को परबन्ध करहेत, वय मिलाप वालो तम्बू को पहेलो खोली मा जाहेत अना यो खोली साक्छी पतर को सन्दूक वालो खोली को बाहेर वोना परदा को मोहोरा से जोन दूई खोली ला बेगरो करासेत। वय एको धियान राखेत का यो जघा मा यहोवा को मोहोरा दियो सन्जा अना सक्कारी लगातार पेटायो रहे। इसराइल को लोख अना उनको खानदान यो नेम ला हमेसा मानतो रहेत।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.