हिटनो 26

पिरभु को मिलनवालो तम्बू

1मघ पवितर तम्बु को लाय दहा पड़दा बनवाजो इनला बारीक मलमल, नीलो, बैजनी अना लाल रंग का कपरा मा कसीदा लक घड़यो हुयो करूबगिन संगा बनावनात। 2एक पड़दा अठाईस हात को लम्बो अना चार हात चवडो रव्हेत, सबच पड़दा एकच नाप का रव्हेत। 3पाँच पड़दा एकमेक लक जुड़यो रव्हेत अना जो पाँच बचयो सेत वोय भी जुड़यो रव्हेत। 4अना जहान यो परदा जोड़यो जाय वहान को दूई छोर मा नीलो रंग को फन्दा लगवाने। 5दूई छोर मा पचास- पचास फन्दा, असो लगवाने का वोय फन्दा एकमेक को सामुर होय 6अना सोन्नो को पचास अकोडा बनवावना अना वोय अकोडा लक दूही पड़दा ला मिलावना, जेमा पवितर जघा एक होय जाय।

7मघ सेरीगिन को चुन्दी लक अकरा पड़दा बनवाने जोन पवितर जघा को वरता को हिस्सा से। 8एक-एक पड़दा को लम्बाई तीस हात अना चौड़ाई चार हात की हो; अकरा पड़दा एक ही नाप का हों। 9पाँच पडदा ला जोड़ के एक पडदा बनवावना। अना बचया छय पड़दा ला जोड़ के एकच पड़दा बनवावन, छटवो पड़दा ला तम्बू को सामुर दूना के टगाय देवना। 10अना दूही बेगरो-बेगरो पड़दागिन मा एक-एक किनार मा पचास-पचास फून्दडा लगवाना। 11मघ कासो का पचास अकोडा बनवावना, वोय अकोडागिन मा फून्दा लगवाय के वोला जोड़ देवना का वोय एकच होय जाय। 12तम्बू का पड़दागिन का बचयो हुयो भाग तम्बू को मघा लटकाय देवना। 13अना तम्बू का पड़दागिन को लम्बाई मा लक हात भर इता, अना हात भर उता रव्हन को झाकन को लाय वोका दुही कन टंगयो रव्हे।

14मंग तू तम्बू को लाय लाल रंग लक रंगयो हुयो मेढा गिन अना डालफिन मसरी को पिकया हुयो टिकाऊ चमड़ागिन का एक-एक पघरन बनवाना।

15मघ पवितर तम्बू लाई बंबूर की लकड़ी को तखता बनवावना। 16एक-एक तखतागिन का लम्बाई दहा हाथ अना चवडाई डेढ़ हात का होय। 17उनला एकमेक लक जोड़न लाई तखता मा दुई-दुई टंगनी होय, रव्हन को जघा का सबच तखता मा टंगनी बनवावना। 18अना रव्हन को जघा को लाई तखता येना पिरकार बनवावना बीस तखता दक्सिन को कन लाई बनवावना। 19अना बीसच तखता को खाल्या खुरो का चालीस कुरची बनवावना, सबच तखता को खलया वोकी दुई टंगनी को लाई दूई कुरची बनवावना।

20अना योच पिरकार उत्तर को कन भी बीस तखता बनवावना। 21अना खुरो का चालीस कुरची सबच तखता को खलया दूई कुरची बनवावना। 22पवितर तम्बू को मघा दिन बुड़ती को कन छय तखता बनवावना। 23अना मघा को कन कोन्टा को लाय दुई तखता बनवावना। 24वोय खलया ता अलग-अलग होहे, मघ वरता को कन पहलो कडा मा जुडया होहे, दुही तखतागिन को योच अकार होय, या ता दुही कोन्टा को लाई होय। 25अना आठ तखता, अऊर खुरो का सोला कुरचीगिन होय, का एक-एक तखता को खलया दुई-दुई कुरचीगिन होय।

26तू बंबूर की लकड़ी लक छड़गिन बनवावना, पवितर तम्बू को तखता को लाई पाँच, 27अना दूसरो कन को तखता को लाई पाँच अना रव्हन को जघा को दिनबुड़ती को कन का तखता को लाई पाँच छड़ बनवावना। 28तखतागिन को बीच मा छड़ होय वा तम्बू को एक कन लक दूसरो कन तक होय। 29मघ तू तखतागिन ला सोन्नो लक मढ़ना, अना उनका कडा़गिन वोय बेडागिन को घरा को काम से, उनला भी सोन्नो लक मढवाना, अना बेंडागिन ला भी सोन्नो को मढवाना। 30अना रव्हन को जघा ला येना पिरकार उभो करना, जसो यो पहाड़ मा तोला दिसायो गयो से।

31मघ नीलो, बैंजनी, अना लाल रंग को बारीक मलमल को कपरा को एक बीचवालो पड़दा बनवाना; ऊ कढाई को काम लक करूबगिन को संगा कढवाना। 32अना वोला सोन्नो लक मढायो हुयो बंबूर का चार खम्भागिन मा लटकावना, इनका कुन्दा सोन्नो का होय, अना वोय खुरो का चार कुरची मा ऊभो होय। 33अना बीच वालो पड़दा गिनका कुन्दा को खलया टगायके वोकी आड़ मा गवाही पतर का संदूक भीतर राखना, बीच वालो पड़दा को एक कन पवीतर जघा अना दूसरो कन महा पवीतर जघा होय।1 34मंग महा पवीतर जघा मा गवाही पतर को संदूक को वरता दया को आसन ला राखना। 35पड़दा को बाहेर पवीतर जघा को उत्तर को कन कुरसी राखना, अना वोका दक्सिन कन का कुरची को सामुर टवरी राखना।

36मघ तम्बू का बेसकुड़ को लाई निलो, बैजनी अना लाल रंग का अना बारीक मलमल वाला कपरा को कढ़ाई कारी को काम वाला कपरा का एक पड़दा बनवावना। 37अना यो पड़दा को लाई बंबूर का पाँच खम्बागिन बनवाना अना उनला सोन्नो लक घढवाना, उनका कुन्दागिन सोन्नो का होय, अना उनको लाई पीतर का पाँच कुरचीगिन घडायके बनवावना।