हिटनो 25

पवितर तम्बू को लाइ भेंट

1यहोवा ना मोसे लक कह्यो, 2इसरायली गिन लक कव्हना का मोरो लाय भेट आने; जितरो आपरी मरजी लक देवनो चव्हासे उनको लक लेवना। 3अना जोन जुनूस भेट लेवनो से वा योच से; सोन्नो, खुरो, पीतर, 4नीलो, बयजनी अना लाल रंग का कपरा, बारीक मलमल को कपरा, सेरी को चुन्दी, 5लाल रंग रंगियो मेढा गिन को चमड़ा, सूइसगिन को चमड़ा, बंबूर को लकड़ी, 6उजाडो को लाय तेल, अभिसेक को लाय तेल, अना महकन वालो धूप को लाई मसाला, 7कपरा जामा अना चपरास को लाय सुलेमानी गोटा, अना जड़न को लाय मनी। 8अना वय मोरो लाय एक पवितर जघा को लाय तम्बू बनाय का मी उनको बीच मा रहू। 9अना जोन काही मी तोला चोवाहूँ, अना पवितर जघा को लाय तम्बू अना सबरी जिनुस जसो मी तुम्हिला सांगासू वसोच तुम्हि बनावने।

वाचा का सन्दूक

10बंबूर को लकड़ी लक एक सन्दूक बनावाजो जोन को लम्बाई ढाई हात अना चवडाई डेढ़-डेढ़ हात की होय। 11अना वोला चोखो सोन्नो लक भीतर अना बाहेर गढवावना, अना सन्दूक को वरता चारीकन सोन्नो की भीत को किनार बनवावना। 12वोका चारी पाया मा लगवान को लाई सोन्नो का चार कडा बनवावना, अना चारी कोन्टा मा लगवावना दूही कडा एक कन, अना दूही कडा दूसरो कन होय। 13मघ बंबूर की लकड़ी लक एक डन्डा बनवाना अना वोको पर भी सोन्नो लगवाना। 14डन्डा ला दूही कन लक कडा मा डाकना असो मा सन्दूक ला उठावनो सरल होय जाहे। 15डन्डागिन ला सन्दूक का कडागिन मा लगायी रव्हे उनला अलग नोको करना। 16अना जो गवाही को चिठ्ठी मी तोला देहू वोला वोच सन्दूक मा राखना।

17मघ चोखो सोन्नो को पस्ताप को झक्कन बनवाना वोकी लम्बाई ढाई हात अना चवडाई डेढ़ हात की होय। 18अना सुन्नो ढाल के दुई करूब बनवाय के पस्ताप को झक्कन को दूही छोर मा लगवाना। 19एक करूब एक कन अना दूसरो करूब दूसरो कन लगवाना, दया-आसन अना करूबगिन ला एकच धातू लक बनवावना वोय एक दूसरो लक जुडया होय। 20वोय करूब का पंखा वोरता लक पसारयो रव्हे का जिनको लक दया-आसन झकयो रव्हे उनका टोन्ड आमने सामोर होय। 21तू सन्दूक को वरता दया-आसन ला सन्दूक को वोरता लगवाना, जो गवाही को पतरा मी तोला देहू वोला सन्दूक को भीतर राखना। 22मी वहाच तोला मिलहू अना इसराइली गिन ला जो हूकुम देहू , उनको बारे मा मी दया-आसन को वरता लक अना गवाही को सन्दूक को वरता करूबगिन को बीच मा लक जोन गवाही पतर मघा लक तोरो संगा गोस्टी करहू।

पवितर भाकरी को टेबिल

23बंबूर की लकड़ी लक एक टेविल बनवावना वोकी लम्बाई दूई हात अना चवडाई एक हाथ अना ऊँचाई डेढ़ हात की होहे। 24वोला चोखो सोन्नो लक मढवाना, अना वोको चारी कन सोन्नो की एक दिवाल बनवावना। 25अना वोको चारी कना चार बोट चौवडी एक पटरी बनवाजोस, अना यो पटरी को चारो कना सोन्नो को एक कीनार बनवाजोस 26सोन्नो का चार कडा घडाय के मेज का चारही ठावा मा लगाय देव। 27चारी कडा चौखट जवर च रव्हत, जेमा मेज ला उठावन लाई डन्डा फसायके उचालन को काम आहेत। 28बंबूर को लकड़ी को डन्डागिन ला सोन्नो लक घडाय देव, अना टेवल वोकोच लक उचालो। 29वेदी अना भानी, चम्मच, परसन का बटका, सबच चोखो सोन्नो का घडवाना। 30अना मोरो लाय रोज टेबल मा भेंट की भाकर गिन ला सदाच राखना।1

सोन्नो की दीवट

31मघ चोखो सोन्नो को ढाल के एक टवरी खम्बा बनवावना, वोका ठावा अना डन्डा सुन्नो घडवा के बनावना, वोको मा फूलगिन को जसो चोवन वाला बटका बनवावना, बटका को संग मा कलिगिन अना फूल होय, सबच जुनूस चोखो सोन्नो को बनवावना, या सबच एक टुकडा लक बनवावना। 32टवरी लक छय खान्दा हिटयो, तीन एक कन अना तीन दूसरो कन राखने। 33सबच खन्दा मा बदाम को फूल जेतरो तीन डगाल अना एक डोन्डी होय, अना एक फूल टवरी लक बाहेर हिटिया हुयो सबच छय खन्दा लक एकच मा बनवावना। 34टवरी को डन्डा मा चार फूल बनवावना, जिनको मा बदाम को फूल को जसो डोडागिन अना पंखूडी बनवावना। 35टवरी लक हिटिया छय खन्दा मा लक दुई-दुई डालीगिन को वरता एक-एक गठान होय, वोय टवरी संगा एकच टुकडा लक बनया होय। 36डोन्डीगिन, खन्दागिन अना टवरी को खम्बा चोखो सोन्नो लक घड़ाय के बनवाना। 37सात टवरी बनवाना अना सातच टवरी ला पिटाय के राखना का उनको उजाडो सामुर मा पडे। 38वोका गुलदान अना गुलतरास सबच चोखो सोन्नो को होय। 39यो पूरो जिनुस कम लक कम चवतीस किलो गिराम चोखो सोन्नो लक बनया होय। 40पूरो धियान लक यो सबच जिनुस वसोच बनवावना जसो तुमला पहाड़ मा दिसायो गयो होतो।2