Powari Standard Project
हिटनो 24
यहोवा और इसरायली गिन को बीच वाचा
मघ यहोवा ना मोसे लक सांगिस, तू हारून, नादाब, अबीहू अना इसरायलि गिन का सत्तर मुखिया सायनागिन को संगा यहोवा को जवर वरता आयके दूहुर च लक नवके पिरनाम करना मोसे एकलो च यहोवा को जवर आयो, पर वय सयानागिन कठा नही आइन, अना बाकी इसरायली लोग वोको संग नही आइन।
मोसे ना लोकहुन को जवर जाय के यहोवा का सब च नेम अना गोस्टी सांग देइस। तबा सबच लोक एक च संग सांगीन, जेतरा गोस्टी यहोवा ना सांगि से वोय सबच गोस्टी हमी मानबिन। तबा मोसे ना यहोवा को सबा बचन लिख दियो, अना भुन्सारे जाग के पहाड़ को खाल्या एक वेदी अना इसरायल को बारा गोतर को अनुसार बारा मुन्डा उभा करिन। तबा वोना काही इसरायली जुवान हुनला धाड़यो जोन यहोवा को लाय होम बली अना बाइलगिन का मेल बली चघाये। अना मोसे ना अरधो रकत लेयके कटोरागिन मा राखिस, अना अरधो वेदी मा छिड़क दियो। तबा करार को किताब ला लेयके परमेस्वर को पूढा बाचयो तबा वोला आयक के उनना कह्यो, जोन काही यहोवा सांगासे वो अमीला करनो मन्जूर से, अना अमी सबरी हुकुम ला मानबीन।
तबा मोसे ना रकत लेय के सबरी परमेस्वर पर छिड़क के कह्यो, “यो वा करार को रकत आय, जोन ला यहोवा ना तुमरो संग बांधयो से।”
मघ मोसे, हारून, नादाब अना अबीहू अना इसरायल का सत्तर बुजरूग गिन ला संग मा धर के वरता गयो। वहान उनना इसरायल को परमेस्वर को दरसन करिन। उनको पाय को खालया नीलमनी किमती गोटा को चबूतरा जसो काहि होतो। जोन बादल को जसो साफ-सुतरो होतो अना वोना इसराइल को मुखीया गिन पर हात नही उठायो, तबा उनना परमेस्वर को दरसन करयो अना सबरी जेवन करयो।
मूसा सीनय पहाड़ पर
यहोवा ना मोसे लक कह्यो, “तू पहाड़ को वरता मोरो कठा आव! मी तोला मोरो नियम लिखयो पाटी देहूं वोला तू सबला सीकावजोस।1 तबा मोसे यहोसू ला संगा लेय के परमेस्वर को पवितर पहाड़ मा गयो। मंग मोसे ना मुखियागिन लक कह्यो, आमरो परमेस्वर को कन लक लवटनो तकन इता च रव्हने, तबा तकन आमरो राह चोवनो, हारून अना हूर तुमरो संगा से, कोनि भी गोस्टी होय त उनला च सांगने।”
असो सांग के मोसे पहाड़ मा चलि गयो अना बादर पहाड़ ला झाक लियो। सीने पहाड़ मा यहोवा को उजाड़ो तेज छाय गयो। छय रोज लक बादर वा पहाड़ ला झाकयो रहयो, सातवो रोज यहोवा ना बादलगिन को बीच लक मोसे ला हाकलयो। इसराइली गिनला यहोवा को उजाडो, पहाड़ मा भसम करन वाला तेज इस्तो को जसो चोय रह्यो होतो। मोसे पहाड़ मा बादर गिनको बीच लक चघ गयो अना चालीस रोज अना चालीस राती उता रहयो।2
Source notes (2)
- Cross-reference 2 कुरिन्थियो 3:3
- Cross-reference नेम को किताब 9:9
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.