हिटनो 23

नियाव अना दया

1बूरो गवाह होहे के बुरो को संग नोको देवना, अना झूठी गोस्टी ला नोको फेलावना।1 2बुराई करन को लाई पंचायत मा नोको जावना ना कोन्हि को झगड़ा मा भीड़ को संगा मिलके खोटो सांगना। 3गलत काज मा गरीब-गुरबा को मामला मा भी साथ नोको देवना।

4अदि तोरा दुसमन को बईल अना गाढ़व गुमयो हुयो मिलहे ता तू वोला लौवटाय देवजोस। 5अदि तोला तोरा दुसमन को गाढ़व बेजा बोझ को मारे दबिया हुयो चोहे ता वोला वहाच नोको छोड जोस तोरो मन नयी भी होय तबा भी तू वोला छुडाय लेवना।

6गरीब-गुरबा को नियाय नोको बिगाड़ना या सोच के का यो गरीब से। 7बूरो लाड़ाई लक दूरच रहजोस, अना सीधो-साधो साजरो मानूस ला नोको मारना, काहेकि मी दोसी ला निरदोस नही मानहु। 8तुम्ही कभ्भूच घूस नोको लेवना, काहेकि घूस चोवन वाला ला भी अंधरो बनाय देसे अना न्यायी मानूस की गोस्टी ला बिगाड देसे।

9परदेसी लोकहुन को संगा अत्याचार नोको करना तुम्ही तो परदेसी को मन को गोस्टी ला जानासेव, काहेकि तुम्ही भी मिसर देस मा परदेसी होतो।

सातवाँ साल अना सातवाँ दिन

10छय साल ता आपरी खेती ला बोवना अना वोकि फसल जमा करना; 11पर सातवो साल मा वोला पड़त रव्हन देवना वा तोरा गरीब-गोर वोको मा लक खायेत अना जो काही बच जाहे वोला जनावर गिनला चारन देवना। अंगूर अना जयतून को बाड़ी ला भी असोच छोड देवना2

12छय रोज तुम्ही काज करना, पर सातवो रोज कोनि काज नोको करना काहेकि तुमरो बईल अना गधा भी सुसताय, तुमरो नौकर अना दास- दासी बीच को परदेसी भी सुसताय सके।

13जो काही भी मीना तुमला सांगि सेऊ, वोय गोस्टी ला धियान राखना दूसरो देव गिनको नाव भी नोको लेवना, पर वोय तुमरो टोन्ड लक भी आयकुआय।

तीन मुख तिहार

14हर साल मोरो लाई तीन बार तिहार मनावना। 15अखमीरी भाकर को तिहार मनावना मोरो हुकुम जसो से वसो हर साल अबीब महीना को पक्को बेरा मा सात रोज तक अखमीरी भाकर जेवना, काहेकि वोच महीना मा तुम्ही मिसर लक हिटयो होतिन।

16जबा तोरो खेत को पहेलो उपज तैयार होय तबा कापन को तिहार मनाना साल को अखिर

मा जबा तू बोझा बटोर लेय तबा बटोरन को तिहार मनावना।3 17हर साल तीन बार तोरो मरदमाना पिरभू यहोवा को जवर आहेत।

18मोरो बलि को जनावर को रकत खमीर वालो भाकर को संगा नोको चघावना, अखिन मोरो तिहार का साजरो बलिदान दूसरो बलिदान4 दूसरो रोज तक नोको राखने।

19तुम्ही अपरो खेत का पहेलो उपज यहोवा को भवन मा लिजावना। सेरी को पाठी वोकी माय को दूध मा नोको रांधने।5

वादा अना आदेस

20“आयको, मी एक दूत तुम्हरो रक्सा को लाय तुमरो पूढा-पूढा धाड़ासू अना जोन जघा ला मी ना राखिसेऊ वोको मा तुमला धाड रह्यो सेऊ। 21तुम्ही वोय सरगदूत लक डर के रव्हना, वोकी गोस्टी ला मानना वोका विरोध नोको करना काहेकि ऊ तुमरो पाप छिमा नही करहेत, काहेकि वोको मा मोरो नाव रव्हासे। 22का तू सच मा वोकी मानहे, अना जो काहि मी कँहू करहेत, ता मी तोरो दुस्मन को दुस्मन अना तोरा बिरोधि का बिरोधि बन जाहूँ। 23काहेकि मोरो दूत आगे-आगे चलके तुम्हिला अमोरीगिन, हित्ती गिन, परिज्जीगिन, कनानी गिन, हिब्बी गिन अना यबूसीगिन को देस पोहचा देहू अना मी उनको सतियानास कर देहू। 24तुम्ही उनको देव गीनको पूजा नोको करने, अना उनको सेवा करने, अखीन उनको गोस्टी ला भी नोको मानने, तुम्ही उनको पूजा को जघा ला मिटाय देवने अना उनको पूजा को जघा ला गोटा लक टुकडा-टुकडा कर देवने। 25तुम्ही अपरो परमेस्वर यहोवा च कि सेवा करना, तबा ऊ तोरो अनाज अना पानी मा आसीस देहे, अना तोरो बीच मा लक बीमारी दूहुर करहे। 26तोरो देस मा ना ता कोनी बायको को पोट पड़ेत अना कोनी बायको वाखड़ रहेत, अना मी तोला पूरी उमर देहू। ”

27जेतरा लोग गीन को बीच मा तुम्ही जाहो मोरो भेव सबच को बीच मा समाय जाहे अना मी सबच ला घबराय देहू, अना सब बयरी पाठ दिसाय के पराय जाहेत। 28अना मी तोरो लक पुढा बारा6 गिनला धाडहू वोय हिब्बी, कनानी, हित्ती लोगगिन ला तोरो सामुर लक भगाय के दूहूर कर देहे। 29मी उनला तोरो सामुर लक एकच साल मा नही हेडीन असो ना होय का देस सुनसान होय जाय अना जंगली जनावर बढके उनला सम्भाल नही पाहो। 30जबा तकन तू फल-फुल के देस मा अधिकार ना कर लेय मी उनला जरा-जरा कर के हेडीन। 31मी भू-मध्य सागर तकन अऊर जंगल लक फरात महानदी तक तुमला देय देहू, अना मी वोय देस का लोक हुन ला भी तोरा वस मा कर देहू, अना तू उनला आपरो सामुर लक हेड देहे। 32तू उनको अना उनको देवता लक कोनी वादा नोको करने। 33वोय तुमरो संगा रव्हनो नही पाहिजे असो ना होय की वोय तुमरो लक भी मोरो बिरोध मा पाप कराय, अना तुम्ही अदि उनको देव गिनको सेवा करहो ता मुसीबत को जाल मा पड़हो।