हिटनो 22

नुकसान पूरती को नियम

1“यदि कोनी मानूस बइल या एक मेंढा चोराके वोला कापासे या बिकासे, ता उ एक बइल को बदला मा पाँच बइल अना एक मेढा को बदला मा चार मेढा देयके वोको नुकसान भरहेत। 2यदि चुरायो हुयो जनावर चाहे वा बइल, गाढव या मेन्ढी होय वोको हक मा जिन्दो से ता वोको खुन को बदला वोको च पर होये।”

3“यदि चोर सेंध लगातो हुयो राती मा धराय जाय अखीन कोनी वोला असो मारे का उ मर जाय ता वोको मारनो को दोस वोको पर नही लगहेत। 4यदि चुराया हुयो बईल, या गाढ़व, या मेढ़ा, या सेरी उसको हात मा जीन्दो पाई जाए, ता उ वोको दूना भर दे।”

5“जब कोनी मानूस आपरो जनावर गिनला खुल्ला सोड देहेत अना कोनी को आवरी या अंगूर को बाड़ी अखीन फसल ला चर डाकेत ता आपरो आवरी या बाड़ी को सबलक साजरो फसल देके वोको नुकसान भरहेत।”

6“जब कोनी कचरा मा अखीन आपरो अवार मा इस्तो पेटायो अना वा लघार लगके दूसरो को फूल को ढग, अना फसल जर जाय ता स्तो पेटानवारो वोको पूरो नुकसान भरेत।”

7“अदि कोनी मानूस आपरो सेजारी को रूपिया, या दूसरो कोनी धन राखन को लाय देवासेत। अखीन वोको घर लक चोरी भयी जासेत अना चोर धरायो जासेत तबा चोर वोला दुगनो वापीस करहेत। 8पर यदि चोर नहीं धराहेत ता घर को मालीक परमेस्वर को कठा आहेत जोन लक मालूम भयी जाहेत का वोना आपरो सेजारी को चीज चोरायो से का नही।”

9“जब दगाबाजी को पाप होय, चाहे वा बईल, गाढ़व, मेंढी या सेरी, चाहे कपरा अना कोनी गुमयो चीज को दावा काहे ना होय, जोनको बारेमा एक मानूस कव्हासेत, यो मोरो आय, तबा असो दुई मानूस को मुकदमा परमेस्वर को समोर आनो जाहेत, परमेस्वर जोनला दोसी ठयराहेत, वा आपरो सेजारी ला दुगनो करके लवटाहेत।”

10“जब कोनी मानूस आपरो सेजारी को मेढा,गाढ़व, बईल अखीन आपरो सेजारी को गाढव अना दूसरो जनावर राखन को लाय देवासे, अना वा कोनी को डोरा लक नही चोहेत अना मर जाय घायल भयी जाय, या कोनी खेद लेहेत, 11तबा दूई को बीचमा पिरभू को किरिया खायो जाय, जोनलक मालूम भयी जाय का यो मानूस ना आपरो सेजारी को धन चुरायो से का नही, अना जनावर को मालीक ला किरिया ला माननो पड़हेत। अना दूसरो ला नुकसान नही भरनो पड़हेत। 12यदि वोको जवर लक पक्को मा राखयो गयो जनावर चोरी भयी जाय ता वोको मालीक को नुकसान वोला भरनो पड़हेत। 13यदि राखयो गयो जनावर,जंगली जनावर को लक चीर दियो जाय अना वा चीरो गयो जना को सबूत आनहेत ता वोला नुकसान नही भरनो पडहेत।”

14“यदि कोनी मानूस आपरो सेजारी लक एक जनावर उधार आनासेत अना वोको मालीक को गैरहाजीर मा जनावर घायल भयी जाय अना मर जाय ता उ पक्को मा पूरो नुकसान भरहेत। 15मंग वोको संग जनावर को मालीक से ता उ नुकसान नही भरेत। यदी जनावर किराया को सेत ता वोको नुकसान किराया मा कट गयो।”1

नैतिक अना नियावपन को नियम

16“जब कोनी मानूस कोनी टूरी जोनको पक्की नही भयी सेत, वोला बहेला फूसला के वोको संग सोवासेत ता ऊ वा टूरी को अजी ला टूरी को हरजाना देके वोला बायको बनाले।” 17“पर टूरी को अजी वोला आपरो टूरी देवन लाय मनाही कर दे ता, वा मानूस सिरप हरजाना दाम भरे।2 ”

18“जादू-टोना करनवाली बायको ला जिन्दो नोको सोडने। ”

19“जानवर संग गलत करनवारो ला पक्को जानलक मार देवनो पाहिजे।”

20“एक च पीरभू यहोवा को सीवाय दूसरो देवता ला बली देवन वालो मानूस को पूरो सत्यानास करयो।”

21“तू ताकत लक नोको दडपने, काहेका तुम्हि मीसर देसमा परदेसी होतीन।” 22“तू कोनी बेवा अना अनाथ ला नोको तंगाजोस। 23यदि तू उनला तंगाजोस अना वय मोला हाकदेत ता मी पक्को उनको आयकीन। 24अखीन मोरो गुस्सा भडकेत, अना मी तलवार लक तोला मार डाकू, तबा तोरो लेकरा अनाथ अना तोरो बायको बेवा भयी जाहेती।”

25“यदि तूम्हि लोक मा लक कोनी गरीब ला जोन तुम्हरो संग रव्हसेत सिक्का उधार देय ता वोको साहुकार बनके वोको लक ब्याज नोको लेवने।” 26“यदि तू अपरो सेजारी को कपरा रहेन मा राखेत ता दिन बुड़न को पहेले वोला लवटा देवजोस, 27काहेका वोको जवर एकच पघरन को लाय चद्दर से, वोको तन को एकच कपरा से उ काजक पघर के झोपेत? एकोलाय जब उ मोला हाकलेत तो मी वोको आयकू, काहेका मी दया करन वालो परमेस्वर सेऊ।”

28“तूम्ही परमेस्वर को बेइज्जती नोको करने अखीन आपरो समाज को मोठो अगूवा ला सराप नोको देवने अना बुरो सबद नोको कव्हने।”

29“तूम्हि मोला आपरो आवरी को रस कुन्ड को रस अना फसल चघानो मा उसीर नोको करने।”

“तुम्हि मोला आपरो 3सीग टुरा देवने। 30असोच आपरो बइल अना मेन्ढी को सीग पाठी को संग करने, वा सात दिवस तकन आपरो माय को संग रहेत पर आठवो दिवस वोला मोला देवने। ”

31“तुम्हि मोरो लाय पवीतर बनो, एकोलाय बर्रा मा जंगली जनावर लक चीरो गयो जनावर को मटन नोको खावने। वोला कुतरा को पूढा डाक देवने।”