हिटनो 21

दासहुन लक साजरो बरताव करनो

1तोला यो न्याय हूकुम इसरायल समाज को सामुर राखनो से, 2“जबा तू इबरानी गुलाम ला लेवजोस तबा ऊ छय साल तकन गुलामी सेवा करहे। वय सातवो साल को मघानी बिना कीमत को आजाद होयके जाय सकासेत। 3अदि वोको बिहा नही भयो से अना आयो से, ता ऊ असोच अजाद होयके जाहेत, पर अदि नवरा अपरी बायको संग आयो से ता ऊ वोको संगच जाहेत।” 4अदि वोको मालिक ना वोला बायको देईसे अना बायको लक टूरा-टारी जलमी से ता बायको अना टूरा-टारीगिन वोको मालिक का होतिन, अना ऊ एकलो आजाद होय कर जाहे। 5पर अदि गुलाम अटल होय कर कहे का मी अपरो मालीक अना अपरी बायका लक अना अपरो टूरा-टारी लक माया करासेऊ मी आजाद होयके नही जाहू, 6तो वोको मालीक वोला यहोवा को जवर आनेत, अना वोको मालीक वोला किवाड़ मजे चौखट को जवर लायके सूज्जा लक वोको कान छेदेत। वोको बाद उ आपरो मालीक को हमेसा को लाय अधिन गुलाम बन जाय।1

7“जब कोनी मानूस अपरो टूरी ला दासी को रूप मा बिकेत, तबा वा मरदमाना जसो अजाद होयके नही जाय सकेत। 8अदि वा आपरो मालीक जोन ना वोला आपरो लाय लियो से खुस न कर सकेत ता मालीक वोको किमत लेयके वोला अजाद कर देय। वोला परदेसी को हात मा बिकन को हक नहात। बलकि यो ओको संग दगाबाजी होहेत।” 9पर अदि मालीक ना आपरो टूरा को लाय वोला लियो से ता उ वोको संग आपरो टूरी जसो बरताव करेत। 10अदि उ दुसरी बायको राखासे ता यो दासी को जेवन, कपरा अखीन संग मा सोवन को सूक देय। 11यदि मालीक यो तीन चीज को बेवस्था नही कर सकेत ता बिना दाम दिये वा चली जाहेती।

हिंसा को बारेमा फैसला को नेम

12“जो कोनि मानूस पर असो मार मारे का उ मर जाहेत ता वोला मरन कि सजा भेटेत। 13पर अदि वोना घात लगाके नही मारयो से पर दुरघटना लक असो भयी गयो होतो, ता मी यहोवा तुमरो लाय एक जघा ठयराहू जहान वा पराय सकेत। 14पर अदि कोनी आपरो सेजारी ला कपट करके जान लक मारन को मकसद लक मारे,ता तू वोला जान लक मारन को लाय मोरो वेदी लक भी वोला घसीट के ले जावने।”

15“जोन कोनी आपरो माय-अजी ला मारहेत वोला जान लक मार दियो जाहेत।”

16“जो कोनी मानूस ला चोराय, अखीन वोला बिक दे या चुरायो मानूस वोको अधिकार मा पायो जाय तो वोला पक्को मार डाकयो जाय। ”

17“आपरो माय-अजी ला सराप दे, उ मानूस पक्को जान लक मार दियो जाहेत।”

18“जब मानूस झगड़ा करे, अखीन एक मानूस आपरो सेजारी ला गोटा लक मारहेत या मुक्का मारे अखीन उ मरे नोको पर वोको कारन वोला खटिया मा सोवनो पड़ेत 19मंग उ दुबारा जाग के आपरो लठीया को सहारा लक बाहेर हिडंन लगहेत, ता मारन वालो बरी भयी जाहेत पर वोको खराब गयो बेरा अना वोला पूरो साजरो करवान तकन वोला हरजाना देवनो पड़हेत। ”

20“यदि कोनी मानूस आपरो गुलाम पर चाहे वा दासी होय या दास होय, लठीया लक मारेत, अना उ वोको हात लक मर जाहेत ता वोला पक्को सजा दियो जाहेत। 21मंग फिर गुलाम एक-दुई दिन मा नहि साजरो होहे, ता मालिक ला सज़ा नहि दियो जाहे। वोको धन को नुसकान हि वोको लाय साजरो होहे।”

22“जब मानूस मार-पीट करे, अखीन पोटलक बायको ला एतरो मार लगहेत का वोको पोट खसल जाहेत, अखीन काही हान नही होहेत तबा बायको को नवरा को मांग को जसो मारनवालो लक पंच जितरो पक्को करहेत उतरो रुपिया को डन्ड भरायो जाहेत।”

23“अदि मार-पीट मा कोनी जान लक मर जाहेत ता वोला जान को बदला मा जान देवनो पडहेत। ”

24अना कोनी परकार को हान होवासे ता डोरा को बदला मा डोरा, दांत को बदला मा दांत, हात को बदलामा हात, अना पाय को बदलामा पाय।2 25अखीन दाग को बदला दाग, घाव को बदला घाव, अना मार को बदला मा मार को सजा होय।

मालिक गिन को जिम्मेदारी

26“जब कोनी मानूस आपरो गुलाम को, चाहे वा दासी होय या दास होय डोरा मा मारहेत अखीन डोरा फूट जाय ता मालीक वोको डोरा को बदला मा वा गुलाम ला अजाद करके जावन देय।”

27यदि उ आपरो गुलाम को, चाहे वा दासी होय या मरदमाना दांत ला तोड़ासे ता वोना दांत को बदला मा गुलाम ला अजाद करके जावन देय।

जनावर गीनको बारेमा मालक को करतब

28“यदि बइल कोनी बायका या मरदमाना ला सींग लक मार डाकेत ता गोटा लक मारके वोला मार डाकनो पाहीजे। असो बइल को मटन नोको जेवने। बईल का मालीक ला कोनी सजा नही होहेत काहेका उ निरदोस से। ”

29पर अदि बइल को पहले लक सींग मारन को आदत से अखीन मालीक ला चेतावनो पर भी वोला बान्ध के नही राखासे अना वा कोनी आईमाई या मरदमाना ला मारासे ता गोटा लक मारके वोना बइल ला मार डाकयो जाय अना वोको मालीक ला भी जान लक मारन को सजा दियो जाय। 30यदि वोको पर मुक्ति को रुपिया डन्ड पक्को कियो जाय। तो वोला पिरान को बदला मा डन्ड रुपिया भरनो पड़हेत। 31अदि बइल कोनी मानूस या टूरा टूरी ला सींग लक मार डाकासे, ता योच नियाव को नेम लक फैसला होहेत। 32यदि बइल कोनी गुलाम ला, चाहे वा दासी या मरदमाना होय, सींग लक मार डाकासे ता वोको मालिक खूरो को तीस सिक्का वा दास को मालीक ला देहेत अना गोटा मारके बइल ला मार डाकयो जाय।

33“जब कोनी मानूस खोदरा खन्द के उघाडो च सोड़ दे अना अदी वोमा कोनी जनावर बइल, गाढ़व पड़ जाय, 34तबा खोदरा को मालीक हरजाना भरेत। अना जनावर को मालीक ला वोको दाम लवटाहेत। पर लास मा वोको अधिकार होहेत।” 35“जब कोनी मानूस को बइल सेजारी को बइल ला इतरो मारे का वा मर जाय, ता जिन्दो बइल ला बीक के वोको दाम ला अरधो-अरधो बाट लेय। अना वोको लास ला भी अरधो-अरधो बाट लेय। 36अदि यो गोस्टी सबला मालूम सेत का बइल ला पहेले लक च सींग लक मारन को आदत होतो अखीन वोको मालीक ना वोला बान्‍ध के नहीं राखयो , ता उ बइल को बदला मा बइल देके नुकसान को पूरती करेत पर लास मा वोको हक होहेत।”