Powari Standard Project
हिटनो 20
दहा हूकुम
तब यहोवा ना योच सारो वचन कह्यो, “मी तोरो, पीरभू यहोवा सेऊ, जोन तोला मिसर देस लक, गुलामी को घर लक बाहेर हेड़ लायी सेऊ।”
तू मोला सोड़ कोनी ला पीरभू परमेस्वर करके नोको मानजोस।
“तू अपरो लाय कोनी मुरती खन्दके नोको बनावजोस अना न कोनी कि फोटू बनावजोस, जोन वरता बादल मा अना खाल्या धरती मा अना धरती को पानी मा से। तू उनला नवके पिरनाम नोको करजोस, अना ना उनको पूजा सेवा नोको करने, काहेकि मी तुमरो परमेस्वर यहोवा जलन राखन वालो परमेस्वर सेऊ। जोन मोरोलक घिरना करसे, उनको पाप को दन्ड मी तीसरी अना चवथो पीढ़ी तकन उनको संतान ला देहू”।1 पर जोन मोरो लक पिरेम करनवालो अना जोन मोरो हुकुम ला मानासे, वोय हजारगिन कोपर दया करसू।2
“तू अपरो प्रभु परमेस्वर को नाव बेकार3 नोको लेवना; काहेकि जोन यहोवा को नाव बेकार लेहे ऊ वोला निरदोस नहीं ठयराहेत।4”
तू बिसराम दिवस ला पवीतर मानन को लाय हेत राखना। छय दिवस ता तू मेहनत करके अपरो सब काम काज करना; पर सातवो दिवस तोरो परमेसवर यहोवा को लाई आराम को दिवस से। ऊ रोज ना तो तू कोन्हि किसम को काम-काज करना, अना ना तोरा टूरा-टूरी, ना तोरा दास-दासी, अना ना तेरा दास-दासी, ना तोरा जनावर, ना कोन्हि परदेसी जो तोरो सहेर आयो होय कोनी काज ना करे।5 काहेकि छय रोज मा यहोवा ना बादर, धरती, समुन्दर अना उन सबला बनायो, अना सातवो रोज आराम करीस; एकोलाय यहोवा ना आराम को दिवस ला आसीस दियो अना वोला पवीतर ठहरायो।6
“अपरा माय-बाप को मान करजोस जेकोलक जोन देस तोरो परमेस्वर यहोवा तोला देसे, वोमा तू बेझा दिवस तकन रव्हन पाहेत।7”
“तू जान लक कोनि ला नोको मारजोस।8 ”
“तू कोहि संग नोको सोवजोस। ”
“तू चोरी नोको करजोस।”
“तू अपरो सेजारी को बिरोध झूठी गवाही नोको देवजोस। ”
“तू अपरो सेजारी को घर को लालच नोको करजोस। तू अपरो सेजारी की बायको, नौकर-चाकर, दास दासी, बईल-गाढ़व, अना वोकी कोहि चीज को लालच नोको करजोस।”9
लोगगिन को भेव
सबा लोग ना बादर गरजन अना बिजली कड़कन अना, तुर्रा को अवाज आयकयो अना धूंगा उठतो हुयो पहाड़ ला चोयके लगत भेव लक कपकपान लगीन अना दूहुर ऊभो भय गयीन। अना वोय मोसे लक कव्हन लगीन, “तूच आमरो लाय गोस्टि कर, तबा तो अमी आयक सकासे पर परमेस्वर हमरो लक गोस्टि नोको करे, कही असो नोको होय का अमी मर जाबीन।”10 मोसे ना लोगगिन लक कह्यो, “भेव नोको करो, काहेकि परमेस्वर तुम्हिला परखन को लाय आयो से, अना वोको भेव तुमरो मा बनो रव्हे जोनको लक तुम्ही पाप नोको करो।” मोसे बेजा घोर इन्धियारो को जवर गयो जहा परमेस्वर होतो पर वय लोग दूहूर च ऊभो रहीन।
बेदीगिन को बारे मा नियम
यहोवा ना मोसे लक कह्यो, तू इसरायली लोक असो कव्हना, “तुमिना खुदच चोईसेव का मीना सरग लक तुमरो लक गोस्टी करीसेऊ। तुम्ही खुरो अना सोन्नो को देवगिन नोको बनावना का तुम्ही मोरो संगा वोकी भी उपसना करो। मोरो लाय माती को एक वेदी बनावना, अखीन आपरो करप लक मेन्ढा-सेरीहुन अना गाई बइल को होमबली अना मेल बली चघावने। जहांन-जहांन मी अपरो नाव तुमला सांगू वहाच-वहाच मी आयके तुमला आसीस देहू।” अना तुम्ही मोरो लई गोटा कि वेदी बनाहो ता वोला अवजार नोको लगावनो, काहेकि जबा तुम्ही वोमा अवजार लागावना तो ओला अपवितर करहो।11 मोरो लाय असो बेदी नोको बनावनो, जोन मा चघन को लाय पायरी हो; मंग तुम्हि असो करहो, ता तुम्हि पायरी चघन को बेरा आपरो आप ला नंगरो पन नोको चोवाव।
Source notes (11)
- Cross-reference हिटनो 24:17; लैव्यवस्था 19:4; नेम को किताब 4:15; 18
- Cross-reference हिटनो 24:6,7; गिनती 14:18
- Footnote खोटो गोस्टी
- Cross-reference लैव्यवस्था 19:12
- Cross-reference हिटनो 23:12; लैव्यवस्था 23:3
- Cross-reference पैदाइस 2:1; 2; हिटनो 31:17
- Cross-reference नेम को किताब 27:16; मत्ती 15:4; 19:19; मरकुस 7:10; 10:19; लूका 18:20; इफिसियो 6:2,3
- Cross-reference पैदाइस 9:6; लैव्यवस्था 24:17; मत्ती 5:21; 19:18; मरकुस 10:19; लूका 18:20; रोमियो 13:9; याकूब 2:11
- Cross-reference रोमियो 7:7; 13:9
- Cross-reference इब्रानियो 12:18,19
- Cross-reference नेम को किताब 25:5,7; यहोसु 8:31
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.