हिटनो 19

सीनय पहाड़ पर इसरायली

1इसरायली गिन ला मिसर देस मा लक हिटयो जोन रोज तीन महीना भईन वोनच दिवस वोय सीनय को जंगल मा आईन।

2जबा वय रेफीदीम लक जावन लगिन अना सीनय के जंगल छेतर मा पहुँचीन तबा वहाच जंगल मा, डेरा डाकिन। इसरायली लोग ना पहाड़ को सामुर डेरा डाकिन। 3मोसे परमेस्वर को कठा पहाड़ पर गयो। पिरभु ना पहाड़ मा लक हाकाल कर वोला कह्यो, तू याकूब को खानदान लक असो कव्हजोस; अना इसरायली लोग ला मोरो बचन आयकवाजोस। 4“तुम्ही ना चोयो सेव का मीना मिसरीगिन को संगा काजक-काजक करीसेउ; जसो तुम्हीला उकाब पक्सी को पंखा मा बसाय के अपरो जवर आनी सेउ। 5अता तुमी मोरी गोस्टी धियान लक आयको अखिन मोरी विधी को पालन करहो, ता तुम्ही सबच लोगगिन मा बस मोरोच खास धन होवो, कहेकि सबच धरती मोरीच आय। 6तुम्ही मोरो डोरा मा याजकगिन को समाज अना एक पवितर लोख बनहो।” तू याच गोस्टी ला इसराइली गिन लक कव्हजोस।1

7मोसे ना आय के, वोना इसरायली लोगगिन को बुजरूग सायनागिन ला हकल्लियो, अना उनको सामुर या गोस्टि ला राखिस, जोन हुकुम ला परमेस्वर ना मोसे ला दियो होतो। 8अना सबच लोगगीन ना एकच संगा कहिन, “पिरभु ना जोन कह्यो उ हमी करबोन। मोसे लवटियो अना उनको यो गोस्टि पिरभू ला आयकवायो।”

9तबा पिरभू ना मोसे लक कह्यो, “आयक, मी बादर को इन्धार मा लक होयके तोरो जवर आवासू, एकोलाय का जब मी तोरो संगा गोस्टी करहू तबा वय लोगहुन आयक के अना हमेसा तोरो पर भरोसा करहेत”

अना मोसे ना पिरभु लक लोगहुन कि गोस्टी को बखान करयो। 10तबा पिरभू मोसे लक कह्यो लोगहुन जवर जाय अना उनलक आज अखिन कल पवीतर करखेन वोय अपरा कपरागिन ला धोय लेहेतिन। 11अना परोको दिवस तकन तैयार होय जाय, काहेकि मी यहोवा तीसरो दिवस मा सीनय पहाड़ मा लोगगीन को चोवतो हुयो उतरहू । 12तू लोगगिन को लाय चारो कना एक लकीर बनाय देजोस अना उनला कव्हजोस सतरक रव्हने! तुम्हि पहाड़ मा नोको चघने अना छिवने जोन मानूस पहाड़ ला छियेत वोला मार डाकयो जाहेत। 13वोला कोनि हात लक नोको छिये, जोन छिये, उ गोटा अना तीर लक मारो जाय, चाहे कोनी मानूस होय अखीन कोनी जनावर! जबा मोठो सबद मा तुर्रा को आवाज आयको तबा काही बेचयो गयो लोकहुन पहाड़ मा आए।

14मोसे पहाड़ लक उतरके लोगगीन को जवर आईन अना लोगगिन ला पवीतर करिस अना उनना आपरा-आपरा कपरा धोईन। 15अना वय लोगगिन लक कह्यो, “परोको दिवस लाय तैयार भयि जाव, तुम्हि बायको को कठा नोको जावने।”

16जबा तीसरो दिवस आयो ता सक्कारी बादर गरजन, अना बिजली चमकन लगिन; अना पहाड़ मा कारो बादर छाय गयो, अना तुर्रा को इतरो मोठो अवाज आयो का डेरा मा जेतरा लोग होतिन सबच कपँकपाय गयीन।2

17तबा मोसे लोगगिन ला परमेस्वर लक मिलन को लाय छावनी लक हेड़ के ले गयो, अना वोय पहाड़ को खालया उभा भयीन। 18अना यहोवा जोन स्तो जसो सीनय पहाड़ मा उतरियो होतो, ऐकोलाय पूरो पहाड़ धूगाँ लक भर गयो अना वोका धूगाँ भट्टा को जसो उठ रहयो होतो अना पूरो पहाड़ बेजा कपकपाय रहयो होतो।3 19मंग जबा तुर्रा को अवाज बढतो अना बेजा भारी होतो गयो, मोसे ना कह्यो अना परमेस्वर ना आयक के वोला जवाब दियो। 20अखिन यहोवा सीनय पहाड़ को छेन्डी मा उतरयो, अखिन मोसे ला पहाड़ को छेन्डी मा हाकलिस अना मोसे वरता चघ गयो। 21तबा यहोवा ना मोसे लक कह्यो, खालया उतर के लोगगिन ला समजाय देय, कही असो ना होय की वय रुन्धान तोड़के यहोवा को जवर चोवन ला धसेत, अखिन उनमा लक ढेर सारा लोक नास होय जाय। 22अना याजक जोन यहोवा को जवर अवासेत वोय भी अपरो ला पवीतर करहेत, कहि असो ना होय कि यहोवा उनला नास करहे।

23मोसे ना यहोवा लक कह्यो वय लोक सीनय पहाड़ मा नही चघ सकत; काहेका तूनाच अमीला समजायो होतो का पहाड़ को आखा-पाखा रुधान रूधके वोला पवीतर राखो।

24यहोवा ना मोसे लक कह्यो, “उतर जाय अना हारून समेत तू वरता आय पर याजक अना लोगगिन रूधान तोड़के यहोवा को जवर नोको आ जाय, कही असो ना भयी जाय का यहोवा उनला नास करे।” 25अता मोसे पहाड़ लक उतरके लोगगिन को जवर जायके या गोस्टी आयकवायो।