हिटनो 18

मोसे को संसरो यितरो

1मिदयान को याजक,मोसे को ससरो यितरो ला यो सब गोस्टी मालूम भयो,का परमेस्वर यहोवा कसो मोसे अखिन इसरायली गिन ला मिसर देस लक बाहेर हेड़यो से। 2मोसे ना आपरो बायको सिप्पोरा अखिन दुई टूरा ला वोको अजी यितरो को जवर सोड़ दियो होतो।1 3वोको एक टूरा को नाव गेरसोम राखयो काहेका मोसे ना कह्यो,मी दुसरो देस मा परदेसी भय गयो सेऊ। 4अखिन दुसरो टूरा को नाव एलिएजर2 राखयो, काहेका मोसे ना असो कह्यो होतो का “मोरो अजी को परमेस्वर मोरो साहायक से जोन ना मोला फराओ को तरवार लक बचायो से।” 5यो सूनसान जघा मा जहान इसरायली गिनना परमेस्वर को पहाड़ पर तंबू डाकयो होतो, वहान मोसे को ससरा यितरो, अना मोसे को बायको अना वोको दूई टूरा गिनला आपरो संग लेके आयो। 6यितरो ना मोसे लक कह्यो, “मी यितरो तोरो ससरा, तोरो लक भेट करन आयो सेउ अना मोरो संग दुई टूरा अखिन तोरो बायको भी सेत।” 7मोसे ना जसो आयकयो का वोको ससरा वोको लक भेटन आयो से, ता वोला मिलन तंबू लक बाहेर आयो। अखिन वोला परनाम करके चुम्मयो अखिन आपरो तंबू मा ले गयो। तबा एकमेक को हालचाल पूसन लगीन। 8तबा यहोवा परमेस्वर ना इसरायल गिन को लाय कसो काम करयो। अखिन मिसरी अना राजा फराओ को हाल, अना यातरा को परेसानी, एकन एक करके मोसे ना सांगयो अना यो भी का परमेस्वर कसो रस्ता मा बचायो होतो। 9तबा यितरो ना वोना सबा भलाई को कारन खुस हुयो, जोन यहोवा ना इसरायली गिन को संगा कियो होतो, का उनला मिसरीगिन को बस लक सुड़ायो होतो। 10अखिन यितरो ना कह्यो "धन्य से यहोवा जोन ना तुम्हिला मिसरी गिन अखिन राजा फराओ को अधिकार लक सुड़ायो से अखिन वोको गुलामी लक अजाद करायो। 11अबा मी जान गयो सेऊ का यहोवा परमेस्वर दुसरो सब देवता गिन लक जादा ताकतवर अखिन मोठो से यो तो वोच बेरा सिध्द भयी गयो जब मिसरी गीन इसरायली गिन पर आपरो गरब दिसायो होतो। 12तबा मोसे को ससरा यितरो ना परमेस्वर को लाय होमबली अखिन मेल बली चघायो। अखिन हारून अना सब इसरायली,सियानो, यितरो को संग मिलके जेवन करयो।

नियाव करन वालो ला निवाड़नो

13दूसरो दिवस सक्कारी मोसे लोगगिन को नियाय करन लाय बसियो। लोग सक्कारी लक सन्जा तकन वोला घेरके ऊभो रहीन। 14यो चोय के का मोसे लोगगिन को लाय काजक-काजक करासे वोका सुसरो ना कह्यो, यो काजक काम से जेला तू लोगगिन को लाय करासे? काय लाई तू एकलो बसयो रव्हासे, अना लोगगिन सक्कारी लक सन्जा बेरा तकन तोरो आखा-पाखा उभो रव्हसे?

15मोसे ना अपरो सुसरो लक कह्यो, “एकोलाय का लोगगिन मोरो जवर परमेस्वर को सलाह जानन को लाई आवा सेत। 16जबा उनमा झगड़ा झासा होवसे तबा वोय मोरो जवर आवा सेत। मी दुई पक्स को बीच मा नियाव करके परमेस्वर को कानून ला सांगासू।”

17मोसे को ससरा ना उनलक कह्यो, “जसो परकार लक तुम्ही काम करासेव, वा साजरो नहात।” 18तुम्हि अखीन तोरो संग को लोकहुन थक जाहेत, काहेका यो काम तुमरो लाय लगत भारी सेत। तु एकलो यो काम ला नही कर सकासेत। 19एकोलाय अबा तुम्हि मोरी सला देवासू, मी तोला सहमति देवासू, परमेस्वर तुमरो संग से। तुम्हि परमेस्वर को समोर लोग गिनको अखीन उनको मुकद्दमा परमेस्वर को कठा आनने। 20इनला बिधि अना कानून परगट कर करके जोन चाल मा इनला चलनो से अना जोन-जोन काम इनला करनो से इनला जता देवने। 21अब तुम सब इसरायली लोग गीनमा काबील, परमेस्वर को भेव मानन वालो भगत सच्चाई मा चलनवालो अखीन घूस लक घिरना करन वालो मानूस गिनला निवाड़ लेव। असो मानूस गिनला हजार-हजार, सौ-सौ, पचास-पचास अखिन दहा-दहा समूह पर सासक ठयराव। 22वय हरेक बेरा लोकहुन को नियाव करहेत। हरेक मोठो मुकद्दमा तोरो जवर आनेत पर लहान मुकदमा को फैसला वय खुदच करहेत। असो परकार लक तोरो संग वय तोरो बोझा ला हलको करहेत। 23अदि तुम्हि असो करने अखीन अदि परमेस्वर असो हुकुम देहेत ता तुम्हि ताकतवर बनयो रव्हने अखीन लोग भी आपरो-आपरो रव्हन को जघा सांती लक जाहेत।

24मोसे ना आपरो ससरा को गोस्टी आयकयो, जोन यीतरो ना कह्यो होतो, उनना वसोच करीन। 25मोसे ना सब इसरायली लोक गीनमा काबील मानूस गिनला निवाड़ो अखीन उनला लोकहुन को मुखिया बनायो। उनला हजार-हजार, सौ-सौ, पचास-पचास अखीन दहा-दहा को समूह मा सासक ठयरायो। 26वय हरेक बेरा लोकहुन को नियाव करत होतीन, वय कठीन मुकदमा मोसे को जवर आनत होतीन, पर लहान मुकदमा को नियाव खुदच करत होतीन।

27मोसे ना आपरो ससरा ला सार करीस। यितरो आपरो देस चली गयो।