हिटनो 17

चट्टान लक पानी हिटनो

1मंग इसराइल सभा को सप्पा लोक सीन को सूनसान जघा लक हीटके अखीन एक जघा लक दुसरो जघा को यातरा करतो हुयो, जसो यहोवा परमेस्वर ना हुकुम दियो होतो उनना रेफीदीम मा तंबू डाकीन, यहान उनको पीवन को पानी नही होतो। 2मंग वय मोसे लक तन्टा करन लगीन अमीला पीवन लाय पानी दे, असो कव्हन लगीन।

तबा मोसे ना कह्यो “काहे मोरो लक तन्टा करके यहोवा परमेस्वर ला परखा सेव?”

3पर लोग गिनला लगत तहान लगयो होतो, लोग मोसे ला कहीन “तू अमीला मिसर देस लक काहे आनयो सेत का आमरो लेकरा अना जनावर तहान लक मर जाय?”1

4तबा मोसे ना यहोवा परमेस्वर ला कह्यो “काही बेरा मा यो ता मोला च गोटा लक मार डाकेत, अता मी काय करू?”

5तबा यहोवा ना मोसे लक कह्यो, “आपरो संग इसरायल को काही मुखिया लोक गिनला लेव अखीन वोच लठिया ला जोन नील नद्दी पर मारयो होतो वोला आपरो हात मा लेके लोकगीन को पूढा चलत जाय, 6अखीन मी होरेब पहाड़ को एक चट्टान पर तुमरो जवर उभो रहीन, इसराइली मुखिया गीन को समोर तुम्ही वोना चट्टान पर आपरो लठिया मारने, तबा ओमा लक पानी हिटेत जोनलक लोक पीव सकेत ” तबा मोसे ना वसोच करयो।

7अखिन उन ना वोना जघा को नाव मस्साह अना मरीबा राख दियो काहेका यहान इसरायली गिन ना बैस करयो अखिन “आमरो संग यहोवा से का नही?” असो कव्हता हुया वोला परखो होतिन।

अमोलेक लक लड़ाई

8मंग रेफीदीम मा अमोलेकी इसरायली गीन लक लड़न लगीन। 9तबा मोसे ना यहोसू लक कह्यो, “आपरो कन लक लड़ाई को लाय काही मरद माना ला बेगरो कर, जोन लक वय जायके अमोलेक गिन लक लड़ाई करहेत। काल मी परमेस्वर को लठिया लेयके यो पहाड़ को वरता उभो रहीन।” 10यहोसू ना वसोच करयो अखिन वय अमोलेक गिनलक लड़न गयो, वोच बेरा मोसे, हारून अना हूर पहाड़ मा गयीन। 11जब मोसे आपरो हात वरता करत होतो तबा इसरायली गिन जीत जावत होतिन अखिन जब मोसे आपरो हात खाल्या करत होतो तबा अमोलेक जीत जावत होतो। 12जब मोसे को हात थक गयो तबा उनना एक गोटा लायके राखयो, अखिन मोसे वोको मा बस गयो अना हारून अखिन हूर ना वोको हात उठा राखयो दिन बुढ़ती तकन मोसे को हात वरता रहयो। 13असो परकार लक यहोसू ना अमोलेक गिनला तरवार को ताकत लक हराय दियो।

14मंग यहोवा ना मोसे लक कह्य, यो गोस्टी ला हेत राखन को लाय किताब मा लिख देव अना यहोसू ला वाच के आयकानो का मी धरती पर लक अमोलेक गिनला नास कर देहू।2 15मोसे ना एक वेदी बनायो अखिन वोको नाव यहोवा निस्सी3 राखीस। 16मोसे ना कह्यो यहोवा परमेस्वर ना किरिया खायो, का यहोवा पीढी-पीढी तकन अमोलेक गिन लक लड़ाई करतो रहेत।