हिटनो 16

मन्ना अना लावा

1मंग इसरायली को सबरी टोली एलिम लक चलके सीन नावको सूनसान देसमा पहुचयो। यो एलिम अना सीनायी को बीच मा होतो। मिसर देस लक हीटन को मघानी दोन महीना अना पन्दरा दिवस भय गयो होतो। 2जंगल मा इसरायली गिन की सारी टोली को संगा मोसे अना हारून को खिलाप कुड़कुड़ान लगी। 3इसरायली टोली कव्हन लगीन “साजरो होतो का यहोवा परमेस्वर अमीला मिसर देस माच मार डाकतो, वहान अमी मास को हन्डिया को जवर बसत होतिन अखिन पोट भर जेवन करत होतिन। तुम्हि तो अमीला यहान भूको मरन काजी आनीसेव।1”

4एको पर परमेस्वर ना मोसे लक कव्हयो, “आयको मी तुमरो लाय सरग लक जेवन बरसाहिन, अखिन हर रोज लोक बाहेर जायके आपरो जरूरत को अनुसार जेवन बटोर लेहेत। मी उनको जाच करहु अखिन चोहूँ का वय मोरो नेम मानासेत का नही। 5अना असो होहे का छटवो दिवस जबा उ बटोरो जेवन दुसरो दिवस लक दुगनो होहेत, एकोलाय जोन काही वय वोना दिवस बटोरे वोला तैयार राखे।”

6मोसे अखीन हारून ना सब इसरायली गिनलक कह्यो, “सन्जा लक तुमरो समज मा आजाहेत का यहोवा परमेस्वर ना च तुम्हिला मिसर देस लक बाहेर हेड़यो से। 7अना सक्कारी तुम्हिला यहोवा परमेस्वर को तेज चोहेत, काहेका यहोवा परमेस्वर ना तुमरो बुड़बुड़ानो आयक लियो से। अमी कवन सेजन जोनला तुम्हि इतरो गुस्सा दिसाय रहयो सेव?” 8मोसे ना कह्यो, “अब यहोवा तुम्हिला सन्जा ला मनमानो मांस अखिन सक्कारी जेवन देहेत। काहेका यहोवा परमेस्वर ना वोको बिरोध मा तुमरो बड़बड़ आयक लियो से। अमी कवन सेजन? तुमरो गुस्सा अमी पर नही पर परमेस्वर पर होवासे।”

9मंग मोसे ना हारून लक कह्यो, “सप्पा इसरायली सभा लक सांग यहोवा परमेस्वर को जवर आओ, काहेका वोना तुमरो बड़बड़ आयक लियो से।” 10जब हारून सबा इसरायली टोली लक गोस्टि कर रहयो होतो, तबा उनना सूनसान देस कन लक यहोवा परमेस्वर को तेज बदली मा दिसयो। 11यहोवा परमेस्वर ना मोसे लक कह्यो, 12मीना इसरायली गिनको बड़बड़ आयक लियो सेऊ, उनला सांग देव का “दिन बुढ़ती ला तुम्हिला मांस अखीन सक्कारी पोट भर जेवन भेटेत। तबा तुम्हि ला मालूम भयी जाहेत का मी च यहोवा परमेस्वर सेऊ।”

13दिन बुढ़ती को बेरा लावा उड़तो हुयो आयीन अखिन तंबू ला झाक लेयीन। अखिन सक्कारी छावनी को आखा-पाखा ओस को एक परत जसो चोवयो। 14जब ओस भाप बनके उड़ गयो तबा बरफ सूक्को जमीन को वोरता पर लहान-नहान एक पतलो परत को समान नहान- नहान कन दिसाई पड़िन। 15यो चोयके इसरायली गिन, तबा वय एकमेक लक कव्हन लगीन, यो काजक से? काहेका उनला काही समजमा नही आय रहयो होतो। “का वा काजक से?”

तबा मोसे ना कह्यो, “यो वोच जेवन सेत जोन तुम्हीला जेवन लाय परमेस्वर ना दियो से।2 16अखिन परमेस्वर को असो हुकुम सेत का हरेक मानूस जितरो जेवन कर सका सेत, उतरोच बेचे। मन्जे हरेक मानूस को लाय एक ओमेरा3 को हिसाब लक आपरो तंबू मा आनेत।”

17इसरायली गिन ना वसोच करयो, कोनी ना कम अना कोनी ना जादा बेचयो। 18जबा ओमेरा मा नापीन पर जोन ना जादा जमा करयो उनको जवर जादा नही रहयो, अना जोन को जवर कम होतो उनला भी काही कमी नही भयो। काहेकी एक-एक मानूस ना आपरो जवन लायक समेटयो होतो।4 19मोसे ना उनलक कह्यो “कोनी भी मानूस एला सक्कारी को लाय नोको राखने।” 20पर काही लोक हुन मोसे को गोस्टी ला नही मानयो, अखिन सक्कारी को लाय राख दियो। तबा वोमा कीड़ा पड़ गयीन होतिन अखिन लगत बस्सात होतो। तबा मोसे ना उनको पर गुस्सा करयो। 21मंग रोज सक्कारी जितरो जरूरत होतो उतरो च वय लेत होतिन। अना जबा कड़ी तपन होत होति, तबा वय गल जातिन।

22अखीन असो भयो का छटवो दिवस टोली को हरेक मानूस ना आपरो-आपरो लाय दोन-दोन ओमेर जेवन समेत लेयिन, अना सब जायके मोठो मुखिया अना मोसे ला सांगीन। 23यो आयक के वोना उनला समजायो “यहोवा ना असोच कह्यो होतो। काहे? काहेका काल बिसराम दिवस से। जोन यहोवा परमेस्वर को लाय समरपित मोठो पवीतर दिवस, एको लाय आजच जोन काही रान्धनो से रान्ध लेव अखिन जोन काही पकानो से वोला पका लेव। अना जोन बच जाहेत वोला सक्कारी को लाय राख लेयने।” 24उन ना बचयो हुयो दुसरो दिवस को लाय राख दियो, जसो मोसे ना कव्हयो होतो। ना ता वोमा किड़ा लगयो ना बस्सायो। 25मंग मोसे ना उनला कह्यो “आज को दिवस एला जेवो। काहेका आज यहोवा परमेस्वर ला बिसराम को पवितर दिवस से, अज बाहेर जेवन नही भेटेत। 26तुम्हिला छय दिवस असोच करनो होहेत पर सातवो दिवसमा बिसराम को दिवस से, वोना दिवस जेवन नही भेटेत।”

27काही मानूस गिन सातवो दिवस मा जेवन बेचन गयीन पर उनला काही नही भेटयो। 28तबा परमेस्वर ना मोसे लक कह्यो, “अखीन कबा तकन तुम्हि मोरो हुकुम अना नियम ला नही मानने? 29चोवो, यो बिसराम को दिवस, यहोवा परमेस्वर ना बेगरो करीसेस। यहोवा परमेस्वर च छटवो दिवस तुम्हि लोक गिनला दोन दिवस को जेवन देवासेत। अना तुम्हि सातवो दिवस सब आपरो-आपरो रव्हन को जाघा मा रव्हो, सातवो दिवस कोनी मानूस बाहेर नोको जाय।” 30इसरायली गिन ना सातवो दिवस बिसराम करिन।

31इसरायली गिनना एना चीज ला मन्ना नाव दियो यो धना को बीज जसो पांढरो अना सुवाद मा सहेद लक बनयो सुवारी जसो मिठ्ठो होतो।5 32मंग मोसे ना उनलक कह्यो, यहोवा परमेस्वर को यो हुकुम से, पीढी-पीढी तकन यो सांगन को लाय अना चोवान को लाय ओमेर नाप के मन्ना राख लेव, जोन लक तुम्हि उनला सांग सको का जब मीना तुम्हिला मिसर देस लक हेड़ो होतो तबा सूनसान देस मा यो मन्ना खिलायो होतो। 33मोसे ना हारून लक कह्यो, “एक भान्डो मा मन्ना लेयके यहोवा को पूढा ठेय देव जोन आवन वालो पीढी को लाय साजरो रहेत।” 34यहोवा कन लक दियो गयो हुकुम को अनुसार मोसे अना हारून ना मन्ना करार को सन्दुक को जवर सुरक्सित ठेय दियो। 35इसरायली गिन मन्ना तबा तकन जेवतो रहयो, जब तकन जहा उनला चालीस साल तकन बसनो होतो। मजे कनान को हद मा नहि पहुचयो।6 36एक नाप ओमेरा मन्जे एपा7 को दसवो हीस्सा से।