हिटनो 29

हारून अखीन वोको टूरागीन ला याजक पद को अभीसेक करनो

(लैव्यवस्था 8:1-36)

1“हारून अना वोको टुरागिन ला पवीतर करन को जोन काम तोला उनको संग करनो से का वय मोरो लाय याजक को काम करहेत, उ यो से; करप मा लक एक निरदोस नाटा अखीन दोन निरदोस मेढा लेवने, 2अना बिना खमीर को भाकर, अना तेल मा सनयो हुयो मयदा को सुवारी अना बिना खमीर को तेल लगयो चपाती यो सब गँहू को मयदा को होवनो पाहिजे। 3इनला एक टोपली मा धरके टोपली अना नाटा अना मेढा समेत आनजोस,”

4मंग हारून अना वोको टूरा गिनला मिलाप वालो तम्बू को बेसकुड़ को जवर ले जा के पानी लक आंगखोरने। 5अखीन उन कपरा गिनला धरके हारून ला कमीज, एपोद जामा पहेना के सीनाबन्ध बान्ध के कढाई वालो पट्टा बान्धने 6तबा वोको डोका मा पगड़ी बान्ध के पवीतर मुकुट राखजोस। 7तबा अभीसेक को सुद्द तेल धरके वोको डोस्का मा डाक के वोको अभीसेक करजोस।

8मंग वोको टूरा गिनला कठा आन के उनला भी कपरा पहेनावजोस, 9अना हारून को टूरा गिनको कम्मर ला बान्धजोस, अना उनको डोस्का मा टोपी लगावजोस, जोनलक याजक पद को लाय हरामेसा को लाय हक रहेत। असो परकार लक हारून अना उनको टूरा गीनको अभीसेक करजोस।

10“तबा नाटा ला मिलाप वालो तम्बू को जवर आन के हारून अना वोको टूरा नाटा को डोका मा हात राखेत, 11तबा वोना नाटा ला यहोवा को समोर मिलाप वालो तम्बू को बेसकुड़ मा बली करजोस, 12अना नाटा को रकत मा लक काही लेयके, आपरो कंरगी लक वेदी को सींग मा लगावजोस अना बाकी बचयो रकत ला वेदी को पाया मा उबड़ा देजोस, 13अना जोन चरबी लक अतडी झको रव्हासेत, अना जोन झिल्ली कलेजा को वरता होवासेत, अना दोनो गुरदा को वरता को चरबी समेत सप्पा ला वेदी मा पेटाय देजोस। 14पर नाटा को मांस, खाल अना गोबर, को बाहेर स्तो मा पेटाय देवने, काहेका यो पाप बली होहेत।”

15“मंग एक मेढा लेवजोस अखीन हारून अना वोको टूरा हुन वोको डोस्का मा हात राखेत, 16तबा वोना मेढा ला बली करजोस, अना वोको रकत लेयके वेदी को आखा-पाखा छिड़कने। 17तबा वोना मेढा को टुकड़ा-टुकड़ा करने अखीन वोको अतड़ी अना पाय ला धोयके, मेढा को टुकडा अना वोको डोस्का को संग राखजोस। 18अखीन वोना पूरो मेढा ला वेदी मा जलाय देवने तबा वा यहोवा को लाय होमबली होहेत अना वोको सूक देवन वालो सुगन्ध अना यहोवा को लाय होमन होहेत।1”

19“मंग दूसरो मेढा लेवजोस तबा हारून अना वोको टूरा गीन मेन्ढा को डोस्का मा हात राखेत, 20तबा वोना मेढा ला बली करजोस, अखीन वोको रकत मा लक काही ला धरके हारून अना वोको टूरा गिनको उज्जो कान को सीरा मा अना वोको उज्जो हात, अना उज्जो पाय को उंगठा मा लगाय के, रकत ला वेदी को चारो कन छीटक देवने। 21मंग वेदी मा को रकत अना अभीसेक को तेल, इन दूई मा लक काही-काही लेके हारून अना उनको कपरा पर, अखीन वोको टूरागीन अना उनको कपरा मा भी छिटक देवने, तबा उ आपरो कपरा समेत अना वोको टूरागीन भी आपरो-आपरो कपरा समेत पवीतर समरपित भयी जाहेत।”

22तबा मेढा ला संस्कार वालो जानके वोको मा लक चरबी अखीन मोटो पुस्टी ला, अना जोन चरबी लक अतड़ी झकयो रव्हासेत वोला अखीन कलेजा पर को झिल्ली ला अना चरबी समेत दोनो गुरदा ला, अना उज्जो जाँघ ला धरके, 23अखीन बिना खमीर को भाकर को टोपली ला जोन यहोवा को पूढा धरयो होहेत, वोमा लक एक भाकर, अना तेल लक सानयो गयो मयदा को एक सुवारी, अना एक पपड़ी धरके, 24इन सबला हारून अना वोको टूरा गिनको हात गिनमा राखके हिलान को भेट ठयराय के यहोवा को समोर हिलायो जाय। 25तबा उन चीज हुनला हात मा धरके होमबली को वेदी मा पेटाय देवजोस, जोनलक उ यहोवा को पूढा सुकदायक सुगन्ध ठयरेत, उ यहोवा को लाय होमन होहेत।

26“मंग हारून को संस्कार को जोन मेढा होहेत, वोको छाती ला धरके हिलायो जावन को भेट को लाय यहोवा को पूढा हिलावजोस वा तोरो हिस्सा होहेत।”

27अखीन हारून अना वोको टूरा गीनको संस्कार को जोन मेंढा होहेत, वोको मा लक हलाय जावन वारो को भेट वालो छाती हलायो जाहेत, अना उठावन वालो को भेट वालो जाँघ जोन उठायो जाहेत, इन दूई ला पवीतर ठयरावजोस। 28अखीन यो सदा को बिधी को रीत पर इसराइली गीनको कन लक हारून को मेल बली मा लक यहोवा को लाय उठायो जावन को भेट होहेत।

29हारून को जोन पवीतर कपरा होहेत, वा वोको बादमा वोको टूरा, नाती, पोता ला मिलतो रहेत, जोनलक उनलाच घाल्यो हुयो उनको अभीसेक अना दीक्सा कियो जाहेत। 30वोको टूरा गिनलक जोन वोको जघा मा याजक होहेत, उ जब पवीतर जघा मा सेवा करन को लाय मिलाप वालो तम्बू मा पहेले आहेत ता उन कपरा गीनला सात दिवस तकन घाल्यो रहेत।

31“मंग याजक को संस्कार को जोन मेढा होहेत वोला लेयके कोनी पवितर जघा मा सीजावने, 32तबा हारून आपरो टूरा गिनको समेत वोना मेढा को मास अना टोपली को भाकर दुई ला मिलाप वालो तम्बू को बेसकुड़ मा जेहेत। 33जोन चीज गीन लक उनको संस्कार अना उनला पवीतर करन को लाय पाप छिमा मा दियो जाहेत, उनला ता वय जेव सकासेत, पर पराय कुल को वोला नही जेव सकत काहे का वय पवीतर होहेत। 34यदी संस्कार वालो मांस या भाकर मा लक काही सक्कारी तकन बच जाहेत ता वोला स्तो पेटाय देवने, वा नोको जेवो जाय, काहेका वा पवीतर सेत।”

35मीना तोला जोन-जोन हुकुम दियो सेऊ, उन सबको अनुसार तू हारून अखीन वोको टूरा गिन लक करजोस अना सात दिवस तकन उनको संस्कार करतो रव्हजोस । 36मजे पाप बली को एक नाटा पस्तावा को लाय हर रोज चघावजोस। वेदी ला भी पाप छिमा करन को बेरा सुद्ध करजोस, अना वोला पवीतर करन को लाय वोको अभिसेक करजोस। 37सात दिवस तकन वेदी को लाय पाप छिमा करके वोला पवीतर करजोस, अना वेदी परम पवीतर ठयरेत, अखीन जोन काही वोको मा छिवाय जाहेत वा पवितर भयी जाहेत।

रोज को भेंट

(गिनती 28:1-6)

38जोन तोला वेदी मा रोज चघावनो से उ यो से, हरेक दिवस एक-एक साल को दोन मेन्ढी को पाठी। 39एक मेन्ढी को पाठी ला सक्कारी को बेरा, अना दूसरो बछीया ला दिन बुड़ती बेरा चघावने। 40अना पहेलो मेन्डी को पाठी को संग “हीन को चवथाई”2 कूट के हेड़यो गयो तेल लक सनयो हुयो “एपा को दसवो हिस्सा3 मयदा अखीन उबड़न को लाय हीन को एक चवथाई अंगूर को रस देवने। 41अखीन दूसरो मेन्डी को पाठी को संग दिन बुड़ती बेरामा चघावने, अना वोको संग सक्कारी को रीत लक अन्नबली , अना अंगूर को रस दोनो चघावने। जोनलक उ सूक देवन वालो सुगन्ध अना यहोवा को लाय होमन ठयरेत। 42तुम्हरो पिढी लक पीढी तकन यहोवा को पूढा मिलापवालो तम्बू को बेसकुड़ मा असोच रोज होमबली होहेत। यो वा जघा से जोनमा मी तुमरो लक भेट करहीन अना तोरो लक गोस्टी करहीन। 43मी इसराइली गिनला उताच भेट करहीन, अखीन उ तम्बू मोरो महीमा लक पवीतर कियो जाहेत।” 44अखीन “मी मिलापवालो तम्बू अना वेदी ला पवितर करहीन, अना हारून अखीन वोको टूरा गिनला भी पवीतर करहीन का वय मोरो लाय याजक को काम करहेत। 45अखीन मी इसराइल गिनको बीच रव्हीन, अना मी उनको परमेस्वर ठयरीन। 46तबा वय जान लेहेत का मी परमेस्वर यहोवा सेऊ जोन उनला मीसर लक एकोलाय हेड़के आनीसेऊ का उनको बीच मा रव्हीन मी च उनको परमेस्वर यहोवा सेऊ।”