हिटनो 30

होमन को वेदी

(हिटनो 37:25-28)

1“मंग धूप पेटान को लाय बंबूर को काडी को वेदी बनावजोस। 2वोको लम्बाई एक हात अखीन वोको चवडाई एक हात को चवकोर अना दोन हात उच्चो होवनो पाहीजे अखीन वोको सींग वोच टुकड़ा को बनायो जाय। 3अखीन वेदी को वरता वालो पल्ला अना चारो कन को बाजू गीन अखीन सींग ला चोखो सोन्नो लक मढने, अना एको आखा-पाखा चारो कन सोन्नो को एक भीट बनवाजोस। 4अखीन वोको भीट को खाल्या एको आमने सामने को दोनो पल्ला मा सोन्नो को दूई-दूई कड़ा बनवायके, एको दूई कन लगवाजोस। वय वोको उठान को डन्डा ला फसान को काम देहेत। 5डन्डा ला बंबूर को काडी लक बनायके वोमा सोन्नो मढवाजोस। 6अखिन तु वोला वोना परदा को पूढा राखजोस जोन साक्छी पतर को संदूक को पूढा से, मजे दया आसन को पूढा, उतच तोला मी भेटीन। 7अखीन वोच वेदी पर हारून सुगन्धित धूप पेटाहेत, हर रोज सक्कारी जब उ दियो साजरो करे तबच उ धूप पेटाय, 8अखीन दिनबुड़ती बेरा मा जब हारून टवरी गीनला पेटाहेत ता धूप ला भी पेटाहेत, यो धूप यहोवा परमेस्वर को पूढा तुमरो पीढी-पीढी तक रोज पेटायो जाय। 9वोना वेदी पर तुम्ही कोनी दूसरो परकार को धूप होमन नोको पेटावने, अखीन नातो ओमा काही चीज रिचावने।1 10हारून साल मा एक बार वोको सींग गीनमा पिरास्चित2 करेत, अखीन तुमारो पीढी-पीढी मा साल मा एक मरतबा पिरास्चित को पाप बली को रकत लक एको मा पिरास्चित कियो जाय, यो यहोवा परमेस्वर को लाय परम पवीतर से।”

पिरान को लाय पाप छिमा को लाय रूपिया

11तबा यहोवा परमेस्वर ना मोसे लक कह्यो, 12जबा तू इसराइली समाज को गिनती करजोस ता हरेक मानूस गीनती को बेरा आपरो पिरान को सूटकारा को रूप मा सूटकारा रुपिया पिरभू ला देहेत, जोनलक गीनती को बेरा वोको पर कोनी मरही को कोप नोको होय। 13जोन मानूस को गीनती कियो गयो सेत, उ परमेस्वर को पवीतर जघा को सेकेल3 को अनुसार अरधो सेकेल अरपन करो। 14बीस साल या वोको लक जादा उमर को हरेक मानूस पिरभू को यो भेट ला चघाहेत। 15जब तुम्हारो पिरान को सूटकारा को लाय पिरभू को जमा पटावने तबा चाहे धनी होय या गरीब सबच अरधो सिक्का अरपन करे ना कोनी जादा ना कोनी कम। यहोवा ला बराबूर भेट देहेत यो तुमरो जिन्दगी को पिरास्चित होय। 16तू पिरास्चित को जमा इसराइली समाज लक लेवजोस, अना वोला मिलाप वालो तम्बू को काम गीनमा खरचा करजोस, जोन लक वा पिरभू को पूढा इसराइली समाज को लाय एक हेत को निसान बनहेत अना तुमारो पिरान को सूटकारा को सिक्का जमा होय।

कासो को भान्डो

17तबा यहोवा परमेस्वर ना मोसे लक कह्यो, 18“धोवन को लाय पीतर को एक गंघार, अना वोको पाया भी पीतर को बनावजोस। वोला मिलाप वालो तम्बू को भीतर बीच मा धरके वोमा पानी भर देवजोस4। 19हारून अना वोको टूरा गीन वोमा हात पाय धोहेत। 20जब वय मिलाप वालो तम्बू मा धसेत, या जब वय पिरभू को लाय स्तो मा होमन करन को लाय वेदी को जवर आहेत ता पहेले वय हात-पाय धोहेत नही ता वय मर जाहेत। 21यो बिधि हारून अना वोको खानदान को लाय हरमेसा को लाय सेत।”

अभिसेक को तेल

22मंग यहोवा ना मोसे लक कव्हयो, 23“तू साजरो लक साजरो सुगन्ध वाला चीज ले, मजे पवितर जघा को सेकेल को अनुसार 5 सव सेकेल5 अपरो आप हीटयो गन्धरस, अखीन वोको अरधो मजे ढाई सव सेकल6 सुगन्धित दालचीनी, अखीन ढाई सव सेकल7 सुगन्धित अगर 24अखीन 5 सव सेकल तज, अखीन एक हीन8 जयतून तेल लेयके पवीतर 25उनको लक अभिसेक को पवीतर तेल मजे गन्धी को रीत लक तैय्यार कियो हुयो तेल बनवाजोस यो अभीसेक को पवितर तेल ठयरेत। 26अखीन वोको लक मिलाप वालो तम्बू को अना साक्छी पतर को सन्दूक को अभिसेक, 27अना सारो समान समेत टेबिल को, अना समान समेत दियादानी को, अना धूपवेदी को 28अना सप्पा समान समेत होमवेदी को, अना पाया समेत गंघार को अभिसेक करने, 29अखीन उनला पवीतर करजोस,जोनको लक वय परम पवीतर ठयरेत अना जोन काही वोको लक छिवाय जाहेत वा पवीतर भयी जाहेत। 30मंग हारून ला वोको टूरा गिनको संग अभिसेक करने, अखीन असो परकार लक उनला मोरो लाय याजक को काम करन को लाय पवीतर करने, 31अखीन इसराइल गिनको ला मोरो यो हुकूम आयकवाने, यो तेल तुमरो पीढी-पीढी मा मोरो लाय पवीतर अभीसेक को तेल होहेत। 32यो कोनी मानूस को तनमा नोको डाकयो जाय, अना मिलावट लक वोको जसो कोनी चीज तैय्यार नोको करने, यो पवीतर से, यो तुमरो लाय भी पवीतर होहेत। 33जोन कोनी वोको जसो समान बनाये या जोन कोनी एको लक काही पराय कुल मा लगाहेत,वा आपरो लोक हुनको बीच लक नास कियो जाहेत।”

धूप

34मंग यहोवा ना मोसे लक कह्यो, बोल, नखी अखीन कुन्दरू, यो सुगन्ध को चीज नीटवल लोबान समेत ले लेजोस,यो सब बराबूर तवल मा होवनो पाहीजे, 35जसो एक सुगन्ध वालो इतर बनासेत वसोच इनमा नोन मिलाय के धूप बनावजोस जोन नीटनाट अना पवीतर होहेत। 36वोमा लक काही ला पीसके बारीक भूकनी बनाय लेवजोस, तबा वोमा लक काही मिलापवालो तम्बू मा साक्छी पतर को पूढा, जिता मी तोरो लक भेट करहीन उता राखजोस, उ तुमरो लाय परम पवीतर होहेत। 37जोन धूप तू बनवाजोस, मिलावट मा वोको जसो तुम्ही लोक आपरो लाय काही नोको बनवाने, वा तुमरो पुढा यहोवा को लाय पवीतर होहेत। 38जोन कोनी सूघनो को लाय वोको जसो काही बनाहेत उ आपरो लोकहुन मा लक नास कियो जाहेत।