Powari Standard Project
हिटनो 31
पिरभु को हाजीर रव्हन को जघा को कारीगर
(हिटनो 35:30—36:1)
मंग यहोवा ना मोसे लक कह्यो, “आयक, मी ऊरी को टूरा बसलेल ला, जोन हूर को पोता अखीन यहूदा को गोत को आय, नाव लेयके हाकलसू वोला परमेस्वर को आतमा लक जोन कारीगीरी को अक्कल गियान मा भरयो हुयो से अना वोला सप्पा परकार को समज देवन वालो आतमा लक भरासेऊ। जोनलक उ कारीगरी को काम अक्कल लक हेड़ के सब परकार को बनावट में, मजे सोन्नो, खुरो, अखीन पीतर मा, अखीन जड़न को लाय मनी कापन मा, अखीन लकड़ी मा नक्कासी को काम करेत। अखीन आयक, मी दान को गोतवालो अहीसामाक को टूरा ओहोलीआब ला वोको संग ठयराव देवासू, अखीन जेतरो अक्कलवर सेत उन सप्पा को दिलमा मी अक्कल देवासू, जोनलक जितरो चीजहुन को हुकुम मी ना तोला दियो सेऊ उन सबला तू बनवाजोस। मजे मिलापवालो तम्बू, अखीन साक्छी पतर को सन्दूक अखीन वोको मा पाप छिमा वालो झाक्कन अखीन तम्बू को सप्पा सामाइन, अखीन समाइन समेत टेबिल अखीन सप्पा समाइन समेत चोखो सोन्नो की टवरी, अखीन सुद्द धूपवेदी, अखीन सारो समान सहित होमवेदी, अखीन पाया समेत गंघार, अखीन कढाई करयो हुयो कपरा, अखीन हारून याजक को याजकवालो काम को पवीतर कपरा, अखीन वोको टुरागिन को कपरा, अखीन अभीसेक को तेल, अखीन पवीतर जघा को लाय खुसबुदार धूप, इन सबला वय उन हुकुम को अनुसार बनाहेत जोन मी तोला देयीसेऊ।”
बिसराम दिवस
मंग यहोवा ना मोसे लक कह्यो, तू इसराइल गिन लक असो भी सांगजोस, “पक्को मा तूम्हि मोरो बिसराम दिवस ला मानने, काहेकी तुमरो पीढ़ी दर पीढ़ी मा मोरो अखीन तुम्ही लोक हुन को बीचमा एक हिदान रहेत, जोनलक तुम्ही ला यो गोस्टी हेत रहेत का यहोवा परमेस्वर आमरो पवीतर करन वालो से।” यो कारन लक तुम्हि बिसराम दिवस ला मानने, काहेका वा तुम्हारो लाय पवीतर ठयरायो गयो से। जोन वोला अपवितर करे उ पक्को मा तुम्हरो बीच लक मार डाकयो जाय, अना जोन कोनी उ दिवस मा काही काम करहेत वोला तुम्हि नास कर देवने। “छय दिवस ता काम करने, पर सातवो दिवस बिसराम को दिवस अना यहोवा परमेस्वर को लाय पवीतर से, एकोलाय जोन कोनी बिसराम को दिवस मा काम-काज करहेत उ पक्को मा मरा दियो जाये।1 एकोलाय इसराइली बिसराम दिवस पीढी लक पीढी तकन वोला हरामेसा को करार समझके वोला मानन को काम करहेत। उ इसरायल गीनको बीच सदा एक निसान रहेत, काहेका छय दिवस मा यहोवा ना बादल अना धरती ला बनायो अखीन सातवो दिवस आमा चैन लक रव्ह के आपरो जियान ला तरो-ताजा कियो।”2
जब परमेस्वर मोसे लक सीनै पहाड़ मा असो गोस्टी कर लियो, तबा वोना वोला आपरो उगंठी लक लिखयो साक्छी देवन वालो गोटा को दूई पाटी देयीस।
Source notes (2)
- Cross-reference हिटनो 20:8-11; 23:12; 34:21; 35:2; लैव्यवस्था 23:3; नेम को किताब 5:12-14
- Cross-reference हिटनो 20:11
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.