हिटनो 32

सोन्नो को नाटा

1जब लोक हुन ना चोयीन का मोसे ला पहाड़ लक उतरनो मा उसीर भयी गयी सेत तबा वय हारून को कठा जमा होयके कव्हन लगीन “अबा आमरो लाय देव बना जोन आमरो पूढा-पूढा चलहेत, काहेका वोना मानूस मोसे जोन अमीला मीसर देस लक हेड़के आनी सेस, वोला काजक भयो अमीला मालूम नहात?”1 2हारून ना उनलक कह्यो, “तुमरो बायको अना टूरा-टूरी को कान मा जोन सुन्नो को बारी से उनला हेड़ के मोरो कन आनो।” 3तबा सब लोक हुनना आपरो कान लक सोन्नो को बारी उतार के हारून को जवर आनीन। 4हारून ना उनला उनको हात लक ले लियो, अखीन एक नाटा ढालके बनायो, अना टाक के वोला गढ लियो। तबा लोक कव्हन लगीन, “ओ इसरायल, यो तुम्हरो देव आय जोन मीसर देस लक तुम्हिला सोड़ा के आनीसेस।”2 5यो चोवके हारून ना वोको पूढा वेदी बनवाईन, अखीन असो परचार करीन, “काल यहोवा भगवान को लाय एक तिहार होहेत।” 6अखीन दूसरो दिवस लोक हुन सक्कारी जाग के होम बली करीन, अना मेल बली आनीन मंग बसके जेवन करीन, अखीन उभो होयके खेलन लगीन।3

7तबा यहोवा परमेस्वर ना मोसे लक कह्यो, “खल्या उतर जा, काहेकि तोरो पिरजा को लोकहुन जिनला तू मिसर देस लक हेड़ के आनीसेस, वय लगत बिगड़ गयीन। 8अखीन जोन चाल मा उनला चलन को हूकुम दियो होतो, वोला झटाकने सोड़के उनना एक नाटा ढालके बना लियो, मंग वोला परनाम करीन या अखीन वोको लाय बली भी चघाइन”, अखीन असो भी सांगीन, “ओ इसराइली हुन जोन मीसर देस लक सोड़ा के आनीसेस वो परमेस्वर योच आय।” 9मंग यहोवा ना मोसे लक कह्यो, “मीना इन लोकहुन ला चोयीसेऊ, अखीन आयक, वय हठीला सेत।4 10अबा मोला नोको रोकजोस मोरो गुस्सा धड़़क गयो से, जोनलक मी भस्म कर डाखू, पर तोरो लक एक मोठो रास्ट उपजाहीन।”

11तबा मोसे अपरो परमेस्वर यहोवा ला असो सांगके मनावन लगयो, “ओ परमेस्वर यहोवा, तू काहे गुस्सा गयो से, जोन लोकहुन ला आपरो मोठो ताकत अखीन बलवान हात लक मीसर देस लक हेड़यो सेस? 12मिसरी लोक असो काहे सांगेत, का यहोवा परमेस्वर ना बुरो मनसा लक मजे पहाड़ मा मारन को लाय इसराइली गीनला हेड़के ले गयो? तू आपरो भड़को गुस्सा ला ठन्डो कर अखीन आपरो परजा गीन को हानी नोको कर। 13आपरो दास अबराहम, इसहाक, अखीन याकूब ला हेतकर, जोनलक तूना करार कियो होतो मी तुमरो खानदान ला बादल को तारो गिन को जसा लगत करहु, अखीन यो सप्पा देस जोनको चरचा मीना करीसेऊ, वा तोरो खानदान ला देहू जोन पर उनको हरामेसा को हक्कदार रहेत।”5 14तबा यहोवा आपरो परजा को काहि नुकसान नहि करयो।

15तबा मोसे मुरक के साक्छी को दूई तखता ला हातमा धरके पहाड़ लक उतर गयो। उन पाटी को इता-उता दूई कन लिखयो हुयो होतो, 16अखीन वय पाटी गिन परमेस्वर को बनायो हुयो होतो, अखीन उनमा जोन खन्दके लिखयो हुयो होतो, वा परमेस्वर को लिखयो हुयो होतो।

17जब यहोसू लोकहुन को हल्ला को सबद आयकयो, तबा मोसे लक कह्यो, “तम्बू लक लड़ाई को जसो हल्ला आयकनो मा आवासे।” 18वोना कह्यो, “यो जोन हल्ला को सबद आयकनो मा आवासेत,यो नातो जितन वारो को सेत ना तो हारन वारो को सेत। मोला तो गाना आयकनो मा आवासेत।” 19तम्बू को जवर जसोच मोसे आयो, अखीन नाटा को जवर नाच चोवके वो हिजड़ गयो, अखीन आपरो हात को पाटी गिनला पहाड़ को खाल्या पटक के तोड़ डाख्यो। 20अना वोना उनको हात को बनायो नाटा ला लेयके स्तोमा पेटाय दियो। अखीन पीसके चूरा चूर कर डाकयो, अखीन पानी को वरता फेंक दियो। अखीन इसरायल गिनला वोला पिलवा दियो।

21तबा मोसे ना हारून लक कह्यो, “इन लोक हुनना तोरो संग काजक करीन ता तूना इनला एतरो मोठो भयानक पाप मा फसाय दियो?” 22हारून ना जवाब दियो, “मोरो मालीक मोरो पर नोको हिजड़ेत, तु तो इनला जानासेस का इनको मन बुराई मा लगयो रव्हासेत। 23अखीन उनना मोरो लक कहीन, आमरो लाय देव बना जोन आमरो पूढा-पूढा चलहेत, काहेका वोना मानूस मोसे ला जोन मीसर देस लक सोड़ाय के आनीसेस अमीला मालूम नाहत का वोको काजक भयो?” 6 24तबा मीना उनलक कह्यो, “ जोन-जोन को जवर सोन्नो को जेवर सेत उनला उतार के आनो, अखीन जब उनना मोला देयीन, ता मीना उनला स्तो मा डाक दियो तबा यो नाटा हीट गयो।”

25मोसे ना चोयो का, हारून ना उन लोक गीनला असो बेलगाम कर दियो होतो का वय आपरो बिरोधी गीनको बीचमा मजाक7 बन गयो होतीन। 26उनला बेलगाम चोयके, मोसे ना तम्बू गिनको बेसकुड़ मा ऊभो होय के कह्यो, “जोन कोनी यहोवा परमेस्वर को कन से वा मोरो कठा आव!” तबा सप्पा लेवी गीन वोको जवर जमा भयी गयीन। 27वोना उनलक कह्यो, “इसराइल को परमेस्वर यहोवा असो कव्हासे, का आपरो-आपरो जघांर मा तलवार लटका के छावनी मा लक एक दरवाजा लक दूसरो दरवाजा तकन हिन्ड-हिन्ड के अपरो-अपरो भाऊहुन, संगीहुन, अखीन सेजारी गीनला मार डाको।” 28मोसे को यो बचन को अनुसार लेवी गीनना करीन, अखीन वोना दिवस तीन हजार को करीब लोकहुन मारो गयीन। 29मंग मोसे ना कह्यो, “अज को दिवस यहोवा परमेस्वर को लाय आपरो याजकपद को संस्कार करो8, अना अपरो टूरा गीन अखीन भाऊहुन को बिरोध मा होयके असो करो जोन लक उ अज तुम्हिला आसीस देहेत।”

30दूसरो दिवस मोसे ना लोकहुन लक कह्यो, “तुम्हिना लगत मोठो पाप करीसेव, अबा मी परमेस्वर यहोवा को कठा पाहाड़ मा जाहीन, कदि मी तुमरो पाप छिमा याचना कर सकीन।” 31तबा मोसे यहोवा को जवर जायके कह्यो, “धिक्कार से! उन लोकहुन सोन्नो को देव बनायके मोठो पाप करयो सेत। 32तो भी अब तू उनको पाप छिमा कर नहीं तो आपरो जीवन को किताब9 लक मोरो नाव काप देय।”10 33यहोवा ना मोसे लक कह्यो, “जोनना मोरो बिरोध मा पाप करयो से वोच को नाव आपरो किताब लक काट देहीन। 34अब तू जायके उन लोकहुन ला वोना जघा मा ले जाय जोनको चरचा मीना तोरो लक करयो सेऊ। चोव, मोरो दूत तोरो पूढा-पूढा चलहेत। पर जोन दिवस मी सजा देवन लगहीन वोना दिवस यो भयानक पाप को भी सजा देहीन।”

35एकोलाय यहोवा परमेस्वर ना उन लोकगीन पर आफद डाकयो, काहेका हारून को बनायो हुयो नाटा उनना बनवायीन होतिन, अना वोकी सेवा करिन।