हिटनो 33

पिरभु इसरायल ला सीने पहाड़ सोड़न को हुकूम देवासे

1पिरभू ना मोसे लक कह्यो, “हीट अना जाय! तू अखीन वय लोक जोनला तू मीसर लक हेड़के आनयो सेत, इता लक वा देसमा जाव, जोनको बारेमा मीना अबराहम, इसहाक ,अखीन याकूब लक करार कियो होतो। मी वोला तोरो खानदान ला देहीन।”1 2मी तोरो पूढा-पूढा एक दूत धाड़ीन मी वोना देसमा कनानी,अमोरी हित्ती, परिज्जी, हिब्बी अखीन यबूसी लोगहुन ला हेड़ देहीन। 3एकोलाय तुम लोग उ दुध अना सहेद को नद्दी को धार बोहासे उ देसमा जाव, पर मी खुद तुमरो पूढा-पूढा नही जाहीन। कदी असो ना होय का मी तुम्हिला रस्ता मा भसम कर डाकीन, काहेका यो हठी लोक सेत।2

4जब लोक हुनना यो बूरो खबर आयकीन ता रड़न लगीन अखीन कोनी भी मानूस जेवर नही घालीन। 5काहेका पिरभू ना ने मोसे लक कह्यो होतो, तु इसरायली लोग लक असो कव्हजोस, “तुम्हि अयठो मान को हठी लोक सेव, अदी मी जरासो बेरा तुमरो बीचमा चलहु ता तुम्ही भसम भयी जावने। एकोलाय अबा आपरो जेवर उतार लेव जोनको लक मोला पता चल जाय का मोला तुमरो संग काजक करनो पाहीजे।” 6एकोलाय इसरायली लोकहुन ना होरेब पहाड़ लक पूढा तकन जेवर नही घालयो।

पिरभु को हाजीर रव्हन को तम्बू

7मोसे छावनी लक बाहेर, काही दूहूर मा तम्बू गाड़त होतो, वोला उन मिलाप को तम्बू कव्हत होतीन। पिरभू लक सला लेवन वाला छावनी लक बाहेर मिलाप तम्बू मा जावत होतीन। 8जब-जब मोसे बाहेर तम्बू को जवर जावत होतो, सब लोक उभो भयी जावत होतीन। जब तकन उ तम्बू को भित्तर नही चलयो जात होतो तबा तकन हरेक मानूस आपरो तम्बू को बेसकुड़ मा उभो होयके वोको कन चोवत होतीन। 9जब मोसे तम्बू मा धस जात होतो तबा बादर को खम्बा उतरत होतो अना तम्बू को बेसकुड़ मा मोसे लक असो परकार गोस्टी करत होतो। 10जब लोक तम्बू को बेसकुड़ मा खम्बा ऊभो चोवत होतीन तबा सब उभो होयके आपरो-आपरो तम्बू को बेसकुड़ लक नवके बन्दना करत होतीन। 11जसो कोनी मानूस आपरो संगी लक गोस्टी करासेत वसोच पिरभू मोसे लक आमने सामने गोस्टी करत होतो। जबा मोसे तम्बू लक लवट के आवत होतो तबा वोको नीजी सेवक, नून को टूरा जुवान यहोसू, उ तम्बू लक नही हीटत होतो।3

पिरभू आपरो हाजीर होवन को बचन देवासेत

12मोसे ना यहोवा लक कह्यो, “आयक तू मोरो लक कव्हासे! इन लोक हुनला लेके चल, पर तूना यो नही सांगयो का मोरो संग तू कोनीला धाड़जोस? तोभी तूना सागंयो सेस, तोरो नाव मोरो चितमा बसयोसे, अखीन तोरो दया को नजर मोरो पर से। 13अखीन अबा यदि मोरो पर तोरो दया को नजर सेत ता मोला आपरो मारग ला समजा देव! जोन लक जब मी तोरो गियान चिन्हू तो तोरो दया को नजर मोरो पर बनयो रहेत। मंग यो भी धियान राखजोस का यो लोख तोरो परजा सेत।”

14यहोवा ना कह्यो, “मी खुद तोरो संग चलहीन अना तोला अराम देहीन।”

15वोना वोको लक कह्यो, “यदि तू खुद नही जाजोस, ता अमीला वरता नोको लेजाव। 16यो कसो पता चलहेत का तोरो दया को नजर मोरो पर अना आपरो परजा पर से? का एकोलक नही का तू आमरो संग-संग चलहेत, जोनलक मी अना तोरो परजा को लोक धरती भरको सब मानूस लक बेगरो ठयरेत?”

17यहोवा ना मोसे लक कह्यो,“मी यो काम भी जोनको चरचा तू ना करयो से, काहेका मोरो दया को नजर तोरो पर से, अना तोरो नाव मोरो चितमा बसयो से।”4

18मोसे ना परमेस्वर लक बिनती करके कह्यो “मोला आपरो महिमा तेज चोवाय दे।”

19परमेस्वर ना कह्यो, “मी तोरो समोर होयके चलतो हुयो आपरो सप्पा भलाई चोवाहीन5 अखीन तोरो समोर यहोवा को नाव को घोसना करहीन, अना जोनको पर मी किरपा करनो चाव्हासू वोकोच पर मी किरपा करासेऊ, अना जोन पर मी दया करनो चाव्हासू वोकोच पर मी दया करहीन।” 20मंग वोना कह्यो, “तू मोरो चेरहा चोव नही सकत काहेका मोरो चेहेरा चोवके कोनी मानूस जिन्दो नही रव्ह सकत।” 21मंग यहोवा ना कह्यो, “आयक मोरो जवर एक जघा से,उता तू वोना चट्टान मा उभो भयी जाय, 22अखीन जब तक मोरो महिमा अना तेज तोरो समोर चलतो रव्हेत, तबा तकन मि तोला चट्टान को दरार मा राखीन, अखीन जब तकन मी तोरो पूढा लक होयके नही हीट जाहीन तबा तकन आपरो हात लक तोला झाक के राखीन, 23मंग मी आपरो हात उचल लेहीन, तबा तू मोरो पाठ को दरसन पाहेत, पर मोरो चेरहा तू नही चोव सकासेत।”