हिटनो 34

गोटा को नवतो तखता

1पिरभू ना मोसे लक कह्यो, “जोन गोटा को पाटी तूना तोड़ डाकिसेस वसोच पहेले जसो दूई तखता बना, मंग मी वोच सबद लिखहीन। 2तू सक्कारी को बेरा तैय्यार रव्हजोस, अना सक्कारी च सीनय पहाड़ मा चघजोस, अना छेन्डी मा मोरो लक भेट करजोस। 3कोनी भी मानूस तोरो संग नोको चघेत, पूरो पहाड़ मा कोनी ना चोयेत ना कोनी पहाड़ को पुढा गाई-बइल, सेरी मेन्ढि चराय।” 4मोसे ना पहेले को पटिया को जसो गोटा को दूई पटिया बनायो। अना सक्कारी जाग के, जसो पिरभू ना हुकुम दियो होतो वोको अनुसार आपरो हातमा गोटा को दूई पाटी लेयके सीनय पहाड़ मा चघ गयो।

5पिरभू बदली मा उतरो, उता मोसे को संग उभो भयो अखिन “यहोवा” नाव1 घोसना करयो। 6पिरभू वोको समोर लक हीट गयो, अना वोना घोसना करयो, “यहोवा! यहोवा! उ दयालु, अना किरपा करन वालो, अना उसीर लक हिजड़न वालो, बेजा करूना करन वालो खरो परमेस्वर सेत।2 7उ हजार-हजार पीढ़ि तकन करूना करन वालो, अधरम अना पाप ला छिमा करन वालो से। पर दोसी ला कोनी भि परकार लक निरदोस नही ठयराहेत। उ पुरखा गीनको अधरम को सजा तीसरो अना चवथो पीढी तकन उनको अवलाद ला देवतो रव्हासे।”

8मोसे ना भूई कन आपरो डोस्का गदने नवायो, अना पिरभू को अरज करयो। 9मोसे ना कह्यो, ओ मालीक, यदी मोला तोरो दया को नजर भेटेत ता मी बिनती करासू, मालीक, वसो वय अयठो गरदन को हठी लोक सेत मंग तू आमरो बीचमा लक होयके चल अना आमरो अधरम, अना पाप ला छिमा कर! अना अमीला आपरो नीजी धन बनायले।

करार को दोहरायो जावनो

(हिटनो 23:14-19; नेम को किताब 7:1-5; 16:1-17)

10पिरभू ना कह्यो, चोव, मी करार करासू, मी तोरो सप्पा लोक हूनको पूढा असो भेव काबील अचरज को काम करहीन, जोन पूरो धरती मा, सप्पा रास्ट को बीच मा कभ्भू नही कियो गयो से, अना वय लोक हुन जोनको बीचमा तू रव्हासेत, वय सब पीरभू को भयंकर काम ला चोयेत। जोनला मी तोरो लाय करहीन।

11“जोन हुकुम मी तोला अज देवासू वोला मानजोस, चोव ! मी तोरो पूढा लक अमोरी, कनानी, हित्ती, परिज्जी, हिब्बी अखीन यबूसी लोकहुन ला हेड़ देहीन। 12तू धियान देवजोस, असो नोको होय का जोन देसमा तू जाय रह्यो से, वोको रव्हन वालो लोक गीनलक सांती को करार करहेत, अखीन उ तोरो लाय फन्दा बन जाय।” 13एकोलाय तू उनको हुमन कुन्ड ला तोड़ देवजोस, उनको मुन्डा ला पाड़ देजोस। उनको असेरा नाव को खम्बा ला नास कर देजोस।3

14तू कोनी दूसरो देवता लक बिनती पिरनाम नोको करजोस, काहेका यहोवा जोनको नाव जलन राखन वारो परमेस्वर आय।4 15असो नोको होय का तू वोना देस को रव्हन वालो लोक हुन लक करार अना मेल मिलाप कर लेय अखीन वय जबा आपरो परमेस्वर गीनको पूजा पाठ करहेत अना उनको लाय बलीदान करहेत अना तुम्हीला नेवता दे अना तू भी उनको संग बली को मास जेवन लगहेत। अना बेसिया जसो बरताव करहेत। 16तू अपरो टूरा गिनको लाय उनको टूरी गिनला नोको आनने। असो नोको होय, का उनको टूरी हुन आपरो ईस्वर गीनला मनाये असो परकार लक बेसिया जसो बरताव करहेत, अना तुमरो टूरा गीनला उनको देवता गीनको पूजा पाठ करान लगहेत।

17तू अपरो लाय देवता गीनको ढाल के मूरती नोको बनाने। 5

18तू बेखमीर भाकर को तिहार मनावजोस। जसो मीना तोला हुकुम देईसेऊ वोको अनुसार तू सही बेरामा अबीब महीना मा सात दिवस तकन बेखमीर भाकर जेवने। काहेका तू वोना आबीब महीना मा मिसर देस लक बाहेर हिटयो होतो।6

19हरेक सीग7 को सन्तान मोरो आय। तुमरो जनावर को मरद सन्तान गाई अखीन मेंढी को सीग को सन्तान मोरो सेत।8

20तू गाढ़व को सीगको बच्चा को बदला पाठी देयके सुड़ा लेजोस। यदी तू वोला सुड़ावनो नही चाव्हासेस ता वोको मान तोड़ देजोस। तू आपरो टूरा गीनको सीग को सन्तान ला जरूर सुड़ावजोस।

कोनी मानूस रिकामो हात आपरो चेहेरा नोको दिसावने।9

21तू छय दिवस तकन मेहनत काम करजोस पर सातवो दिवस अराम करजोस, तू नागर जुपतो बेरा अना कटनी को बेरा भी बिसराम को दिवस ला मनावजोस।

22तू गहूँ की नवतो पहेलो उपज को बेरा हफता गीनको तिहार10 अखीन साल को आखीर मा संगारन को तिहार मनावजो

23तोरो परिवार को सब मरदमाना साल मा तीन बार पिरभु परमेस्वर, इसरायल को परमेस्वर को पूढा हाजीर होहेत। 24काहे का मी सप्पा दूसरो रास्ट को लोकहुन ला तोरो पूढा लक हेड़ के तोरो सीव मेन्ड ला बढाहीन। जब तू साल मा तीन बार आपरो यहोवा परमेस्वर को पूढा हाजीर होवजोस ता कोनी मानूस तोरो जमीन को लोभ नही करहेत।

25तू मोरो जनावर बली को रकत खमीर वालो भाकर को संग नोको चघावजोस। तू फसह तिहार को जनावर बली सक्कारी तकन नोको सोड़ना।11

26तू आपरो जमीन को पहेलो उपज मा लक सबलक साजरो फर आपरो पिरभू परमेस्वर को घरमा आनजोस। तू सेरी को पाठी ला वोको माय को दूध मा नोको सिजावजोस।

27यहोवा परमेस्वर ना मोसे लक कह्यो, तू यो सबद गिनला लिख ले। मीना इन सबदगीन को अनुसार इसरायल को संग करार रह्यो सेऊ। 28मोसे उता यहोवा परमेस्वर को संग चालीस दिवस अना चालीस राति रह्यो। नातो जेवन करयो ना ता पानी पीयो। वोना करार को गोस्टी मजे दहा हुकूम12 पाटी मा लिख लियो।

मोसे को सीनय पहाड़ लक खाल्या उतरनो

29जब मोसे सीनय पहाड़ लक उतरियो, वोको हात मा साक्छी को दोन पाटी होतो। तबा यहोवा परमेस्वर को संग गोस्टी करन को कारन लक वोको चहेरा उजाड़ लक चमकत होतो। पर वोला यो गोस्टी मालूम नही होतो। का वोको चहेरा चमक लक भरयो सेत। 30हारून अखीन सप्पा इसराइली समाज ना मोसे ला चोवयो का वोको टोन्ड लक उजाड़ हीट रह्यो सेस एकोलाय वोको जवर जावन को लाय भेव लगन लगयो। 31पर मोसे ना उनला हाकलीस, तबा हारून अखीन इसराइली सभा को सब मोठो,अगुवा वोको जवर लवटियो, मोसे ना उनलक गोस्टी करयो। 32मंग वोको बाद पूरो इसराइली लोग को जवर गयो। जोन गोस्टी पिरभू ना मोसे ला सीनय पहाड मा कह्यो होतो, वोना सब हुकूम उनला आयकवायो। 33जब मोसे ना वोको संग गोस्टी करनो बंद कर दियो ता आपरो चेहेरा ला झाक लियो। 34जब-जब मोसे पिरभू लक गोस्टी करन को लाय मीलाप वालो तम्बू को भीतर जावत होतो, उ आपरो टोन्ड को परदा हटा लेत होतो, अना बाहेर हीटत तकन वोला हटा के राखत होतो। अना जोन हुकुम वोला दियो जात होतो बाहेर आयके इसराइली गीनला सांग देत होतो। 35इसराइली लोग मोसे को टोन्ड चोवासे का वोमा उजाड़ से। जब तकन मोसे भीत्तर पीरभू को संग गोस्टी करन नही जावत होतो तबा तकन उ आपरो टोन्ड मा परदा डाकयो रव्हत होतो।