हिटनो 35

अराम दिवस मनावन को नेम

1मोसे ना सप्पा इसराइली टोली ला जमा करयो, अखिन उनलक कह्यो, पिरभू ना इन काम ला करन को हुकुम तुम्हिला देयिसेस। 2छय दिवस तकन काम करयो जाहेत, पर सातवो दिवस पिरभू को लाय पवीतर बिसराम दिवस मनावने। जोन मानूस वोना दिवस काम करहेत, वोला मार डाकयो जाहेत।1 3तुम बिसराम दिवस मा चुल्हा मा स्तो नोको पटावने।

पवित्र तम्बू को लाय भेट

(हिटनो 25:1-9)

4मंग मोसे ना इसराइल गिनको सप्पा टोली ला कह्यो, जोन गोस्टी को पिरभू ना हुकुम दियो से वा यो से। 5तुमरो जवर लक यहोवा को लाय भेट लियो जाय, मजे जितरो जोन आपरो मनसा लक देवनो चाव्हासे परमेस्वर को लाय भेट को जूनूस आने मजे सोन्नो, खुरो पीतर 6नीलो, बैंजनी अना लाल रंग को कपरा, बारीक सनी को कपरा, सेरी को चुन्दी, 7लाल रंग लक रंगयो हुयो मेढा को चमड़ा, डालफिन2 गिन को चमड़ा, बंबूर को लकड़ी, 8उजाड़ देवन को लाय तेल, अभिसेक को तेल, अना होमन को लाय सुगन्ध वाला चीज, 9मंग एपोद अना सीना बन्द को लाय सुलेमानी मनी अना जड़न को लाय मनी।

पिरभु को लाय दूसरो समाइन

(हिटनो 39:32-43)

10“तुमरो मा लक जितरो को दिलमा अक्कल को उजाड़ से वय सब आयके जोन-जोन समाइन को हुकुम यहोवा ना दियो से वय सबरी चीज बनाओ। 11मंजे तम्बू, अखीन वरता को परदा समेत रव्हन को जघा, अखीन वोको घुंडी, तखता, बेन्डा, खम्बा आड़ो पटिया, 12मंग डन्डा गिन समेत सन्दूक, अना पाप छिमा को झक्कन अना बीच वालो पड़दा, 13डन्डागिन अना सबरी जीनूस समेत टेबिल, अना चघावा को भाकर, 14सामाइन अना टवरी गिन समेत उजाड़ देवन वालो दियोदानी, उजाड़ को लाय तेल, 15डन्डागिन समेत धूपवेदी, अभिसेक को तेल, सुगन्धित धूप, अना रव्हन को जघा को पड़़दा, 16पीतर को झंझरी, डण्डा गिन सप्पा जुनूस समेत होमवेदी, पाया समेत गंघार; 17खम्बा गिन अना उनको पट्टी समेत आंगन को बेसकुड़ को पड़दा, 18तम्बू को जघा अना आंगन को दूई खूटा अना दोरीहुन, 19पवीतर जघा मा सेवा करन को लाय कढाई कियो कपरा, अना याजक को काम करन को लाय हारून याजक को पवीतर कपरा, अखीन वोको टूरा गिनको लाय कपरा।”

लोखहुन लक भेट आननो

20तबा इसरायली गिनको सबरी सभा मोसे को जवर लक लवट गयिन, 21अखीन जितरो जोस लक भर गयो होतीन अखीन जितरो को मन मा असो मनसा पयदा भयो होतो, वय मिलापवालो तम्बू को काम करन अखीन वोको सप्पा सेवा अना पवीतर कपरा ला बनावन को लाय यहोवा को भेट आनन लगयो। 22का आई-माई का मरदमाना, जितरो को मनमा असो मनसा पयदा भयी वय सब जुगनू, नथ, मुंदरी, अखीन कंगन सोन्नो को जेवर आनन लगयो,असो परकार लक जितरो मानूस यहोवा को लाय सोन्नो भेट देवन वालो होतीन सबरी आनयो। 23अखीन जोन-जोन अखीन मरदमाना को कन नीलो, बैंजनी या लाल रंग को कपरा, या महीन सनी को कपरा, या सेरी को चुन्दि, या लाल रंग लक रंगयो हुयो मेढा को चमड़ा, या सूइसगिन को चमड़ा होतो वय आनीन। 24मंग जितरो खुरो, या पीतर को भेंट देवनवालो होतीन वय यहोवा को लाय वसो भेट आनीन, अखीन जोनको जवर सेवा को कोनी काम को लाय बंबूर को लकड़ी होतो उनला आनीन। 25अना जितरो आईमाई को दिलमा अक्कल को उजियाड़ होती वय आपरो हात लक सूत कात-कात के सूत आनीन। 26जितरो आईमाई को मन मा असो अक्कल को उजाड़ कौसल होतो उनना सेरी को चुन्दी ला कातीन। 27अखीन परधान लोक एपोद अना सीनाबनध को लाय सुलेमानी मनी, जड़न को लाय मनी, 28अखिन उजाड़ देवन अखीन अभिसेक अना धूप को लाय सुगन्ध वाला चीज अना तेल आनयो। 29जोन- जोन चीज ला बनान को हुकूम यहोवा परमेस्वर ना मोसे को लक दियो होतो वोको लाय काही जरूरी होतो। वोला वय सबरी मरदमाना अना आईमाई ले आईन जोनको दिल मा असो मनसा पयदा भयी होती। असो परकार इसराइली यहोवा को लाय आपरो मन लक भेट आनीन।

मिलापवालो तम्बू को लाय कारीगर

(हिटनो 31:1-11)

30तबा मोसे ना इसराइली ना कह्यो, आयको, यहोवा ना यहूदा को गोत वालो बसलेल को, जोन ऊरी को टूरा अना हूर को नाती से नाव लेयके हाकलो से। 31अखीन वोना वोको परमेस्वर को आतमा लक भरयो गयो से, का सबरी परकार को बनावट को लाय वोला असो अक्कल अना समज को योगता गियान भेटयो से। 32का उ कढाई कारीगरी को जुक्ती हेड़के सोन्नो, खुरो अखीन पीतर मा, 33अखीन जड़न को लाय मनी कापन को लाय अना लकड़ी मा खुरदन मा, पर अक्कल लक सप्पा परकार को बनावट को काम कर सकेत। 34मंग यहोवा ना वोको मनमा अखीन दान को गोत वालो अहीसामाक को टूरा ओहोलीआब को मन मा भी सिक्सा देवन को ताकत दियो से। 35इन दुई कारीगर को दिल ला यहोवा ना असो अक्कल लक पूरो कियो से, का वय खुदरनो अना गढ़न वालो अखीन नीलो, बैंजनी अखिन लाल रंग को कपरा अना महीन सनी के कपरा मा काढ़न अखीन बुनन वालो होय, बल्कि सप्पा परकार को बनावट मा अक्कल लक काम हेड़नो मा सप्पा परकार को काम करेत।