हिटनो 36

1बसलेल अना ओहोलीआब अना सबा अक्कलवर मानूस जोनला यहोवा ना असी अक्कल अना समज दियो से, का वय यहोवा को सप्पा हुकूमगिन को अनुसार पवीतर जघा का काम को लाय सबच पिरकार को काम करन को अनुभव होय, वोय सबा यो काम करेत।

लोगों द्वारा बहुत सी भेंट

2तबा मोसे ना बसलेल अना ओहोलीआब अना सबा अक्कलवर गिनला जोनला यहोवा ना अक्कल दियो होतो, अना आपरी मरजी लक सेवा करन आयो होतीन उन सबला हाकलयो। 3अना इसरायली गिन जोन काही भेट आनयो होतीन मोसे ला दे दियो। अना काम करनवालो लोकना मोसे लक वय भेट ला आपरो हातमा ले लियो पर हरेक सक्कारी लोक पवीतर भेट लावनो बंद नही करयो। 4तबा जितरो पवीतर जघा मा अक्कलवर काम करन वालो होतीन वय मोसे को जवर जायके, 5उनना मोसे लक कह्यो, पवितर जघा मा जसो यहोवा ना कह्यो होतो वसो समाइन बनावन को लाय जितरो चीज को जरूरत होतो वोको लक जादा चीज जमा भय गयो से।

6तबा मोसे ना सारो डेरा मा येना हुकूम को पिरचार करवायो “चाहे कोनी मरदमाना होय अना आईमाई पवीतर जघा को लाय अबा भेट नोको आनने।” असो परकार लक समाइन लावनो मा रोक लग गयो। 7काहेकि अबा उनको जवर वापरन लायी सामाइन भय गयो होतो।

हाजीर रव्हन को जघा ला बनावनो

(हिटनो 26:1-37)

8काम करन वालो मा सबलक साजरो कारीगर गिनना पिरभू को हाजीर होवन को तम्बू ला बनायो। उनना नीलो, बैगनी अना लाल ऊन लक बुनयो गयो अखीन पंखा वालो जीव दूत को फोटू को संग कढ़ाई वालो साजरो सनी को कपरा को दहा तुकड़ा लक बनायो। 9हरेक टुकड़ा एक जसो होतो। लम्बाई 28 हात अना चवड़ाई 4 हात को होतीन। 10उनना उनमा लक पाँच ला एक संग सी दियो अना बाकी पाँच ला भी वसोच करयो। 11उनना हरेक जोड़ को बाहेर को तुकड़ा को किनार मा नीलो कपरा को फन्दा बनायो। 12उनना पहलो वालो मा पचास अना दूसरो वालो मा पचास फन्दा बनवायो जोन एकमेक को समोर होतीन। 13उनना सोन्नो को पचास आकड़ा बनायो जोनको लक दुई हिस्सा ला जोड़यो गयो तबा वा एक भयी गयो।

14तबा उनना सेरी को चुन्दि लक बनयो कपरा को अकरा तुकड़ा लक तम्बू ला झाकन लाय एक पाल बनायो। 15उनना सबला बराबूर बनायो एक-एक 30, 30 हात को लम्बो अना 4, 4 हात को चवड़ो होतीन। 16उनना उनमा लक 5 ला एक तुकड़ा मा बाकी 6 ला दूसरो तुकड़ा को संग सी दियो। 17उनना एक सट को आखरी टुकड़ा को किनार मा पचास फन्दा लगायो अना दूसरो सट को आखीर टुकड़ा मा भी पचास फंदा लगायो। 18उनना दुई सट ला जोड़न को लाय पीतर को पचास आकड़ा बनायो,जोन लक एक परदा बन गयो। 19उनना बाहेर को पड़दा को लाय दोन पाल बनायो, एक लाल रंगयो हुयो मेढा को चमड़ा को अना दूसरो खोबसूरत सूइसगिन को चमड़ा को।

20उनना तम्बू को लाय बंबूर को लकड़ी को सिध्दो तखता बनायो। 21एक-एक तखता को दहा-दहा हात लम्बो अना देड़-देड़ हात चवड़ो होतो। 22एक-एक तखता ला जोड़न काजी फसान को लाय लकड़ी को खोदरा अना सुज्जा वालो दोन-दोन अटकनी बनायो। 23वोना रव्हन को जघा को लाय असो परकार लक तखता ला बनायो का दक्सिन मा बीस तखता लगयो। 24अखीन इन बिसो तखता को खाल्या खुरो को चालीस खुरची, मजे एक-एक तखता को खलया वोको दोन अटकनी को लाय वोना दोन खुरची बनायो। 25अखीन रव्हन को जघा को दूसरो कन,मजे उत्तर कन लाय भी वोना बीस तखता बनवायो। 26अखीन इनको लाय भी वोना खुरो को चालीस खुरची मजे एक-एक तखता को खालया दोन-दोन खुरची बनवायो। 27अखीन दिनबुड़ती दिसा को रव्हन को जघा को लाय वोना छय तखता बनायो। 28अखीन मघा को हिस्सा को रव्हन को जघा को कोन्टा को लाय वोना दोन तखता बनवायो। 29वो खालया कन लक दोन-दोन हिस्सा को बनयो, अना दुई हिस्सा को वरता को सेन्डि तकन एक-एक कड़ा मा मिलायो गयो। वोना उन दुई तखता को बनावट वसोच बनायो। 30असो परकार लक आठ तखता भयो, अना उनको खुरो को सोला खुरची भयो मजे एक-एक तखता को लाय दोन-दोन खुरची भयो।

31मंग वोना बंबूर को लकड़ी को कड़ी बनवायो। रव्हन को जघा को एक कन को लाय पाँच मंग 32रव्हन को जघा को दूसरो कन को लाय पाँच, अना दिनबुड़ती कन, रव्हन को जघा को मंघा को हिस्सा का तखता कोलाय पाँच। 33वोना तखता गीनको बीचोबीच को छड़ी ला असो बनायो का वा रव्हन को जघा को एक छोर लक दूसरो छोर तकन चले गयो। 34वोना उन तखता ला सोन्नो लक मढवायो। वोना वोको कड़ा गीनला भी जोन छड़ गीनको जकड़ पट्टा होतीन सोन्नो को बनवायो, अना छड़ गीनला सोन्नो लक मढ़वायो।

35मंग उनना नीलो, बैजनी अना लाल रंग को ऊन बुनो हुयो, झीनो सूत लक बूनो हुयो कपरा लक बीच वालो परदा बनायो। वा कढाई को काम कियो हुयो पंखा वालो जीव को चितर बनायो। 36वोना वोको लाय बंबूर को चार मुन्डा बनवायो, अना वोको छोर अना जोड़न को छड़ ला सोन्नो लक मढयो, अना उनको घुन्डी गीनला सोन्नो लक बनवायो,अखीन वोको लाय खुरो को चार खुरची बनवायो 37वोना तम्बू को बेसकुड़ को लाय भी नीलो, बैजनी अना लाल रंग को कपरा लक, झीनो सूत को बुनयो हुयो कपरा लक, जोन मा बेल बूटा कढ़ाई कियो गयो होतो, एक परदा बनायो 38वोना उनको लाय पाँच खम्बा अना घुन्डी भी बनवायो,अना उनको छोर अना जोड़न को छड़ ला सोन्नो लक मढयो, अना उनको पाँच खुरची पीतर को बनायो।