हिटनो 37

करार को सन्दूक बनायो जावनो

1मंग बसलेल ना बंबूर की काड़ी को एक संदूक बनायो, वोकी लम्बाई ढाई हात चौड़ाई देढ हात, ऊंचाई देढ हात को होती। 2सन्दुक की किनार अना बाहेर भीतर चोखो सोन्नो लगायो। 3अना वोका चारही पायगिन पर लगावन लाई सोन्नो का चार कड़ा घड़ीन। दुई एकागन अना दुई वोनागन । 4मंग बंबूर को डंडा बनायके, वोला सोन्नो लक मड़ दियो। 5अना संदूक को दुही कन लगाय दियो जोनमा सन्दुक ला असानी लक उठायो जाय। 6मंग वोना चोखो सोन्नो का ढाई हाथ लम्बो, देड़ हाथ चवड़ो दया को आसन बनायो। 7वोय गिनना सोन्नो ला घड़ाय के पंखा वालो जीव ला दया को आसन को दुही कन बनायो। 8एक पंखा वारो जीव करूब को डोस्का मा ,अखिन दुसरो पंखा वारो जीव करूब दुसरो डोस्का मा बनयो; ओना उनला पसतावा को झक्कन को संगा एकच टुकड़ाहुन ना दुय मा बनायो 9पंखा वालो जीव गिनका पंखा असा वरता लक बगरयो हुयो बनयो ,अखिन उन पंखाहुन लक पसतावा को झक्कन झकयो हुयो बनयो, अखिन ओको टोंड आमनो-सामनो अखिन पसतावा को झकना को कन करयो हुयो बनयो।

पवितर टेबिल ला घड़नो

10बंबूर की काड़ी को टेवील बनायो, जोन दुई हाथ लम्बी, एक हाथ चौड़ी, अना देड़ हाथ उच्ची होती। 11अना वोना वोला चोखो सोन्नो लक मढयो अना वोकी किनारी भी बनायो। 12अना चार बोट चौड़ी पट्टी बनायके वोना पट्टी पर किनारी सोन्नो को लगायो। 13टेवल लाय सोन्नो का चार कड़ा बनायो अना टेवल को चारही पाय पर लगायो। 14कड़ा गिनला पट्टी जवर लगायो काहेकी वोला उठावन लाय, कड़ा मा डाकन मा असानी होय। 15बंबूर की काड़ी को डन्डा बनायो होतो अना वोको आसपास सोन्नो लगायो होतिन। 16अखिन वोना टेवील मा राखन वालो समान, अना भानी, धूपदानी, कटोरा अना परसन को भान्डो जग सबच चोखो सोन्नो को बनायो।

सोन्नो को दियोदानी बनावनो

17वोना दियोदानी ला चोखो सोन्नो लक बनायो, वोको पाया अना डन्डा भी सोन्नो लक घड़ाय के बनायो, एको सजावट को फूल, डोन्डी अना पंखड़ी समेत एको संग एकच तुकड़ा बन गयो। 18अना दियोदानी लक हिटयो 6 डगाल बनयो, 3 डगाली वोको एक कन लक अना 3 डगाली वोको दूसरो कन लक हिटयो हुयो बनयो। 19एक-एक डगाल मा लक हरेक मा डोन्डी अना पंखड़ी को संग बदाम को फूल को जसो 3 सजावट को फूल होतीन। 20दियोदानी को डन्डी मा बदाम को फूल को जसो डोडी अना पंखडी वालो चार साजरो सोभा देवन वालो फूल बनयो होतो। 21अखिन दियोदानी वोको मा लक छय डगाली हिटयो अना दुई-दुई डगाल जोन एक च टुकड़ा बनयो होतिन। 22गठान अना डगाल भी एक च चोखो सोन्नो का बनयो होतिन, पुरो दियोदानी ला एकच खरो सोन्नो को घड़ाय के बनायो। 23वोना दियोदानी को लाय सात टवरी, अना चिमटा भानी चोखो सोन्नो को बनायो। 24दियोदानी अना वोको संग का सबच समायेन गिनला करिब चवतीस किलो चोखो सोन्नो लक बनायो।

धुप की बेदी ला बनावनो

25मंग बंबूर को काड़ी लक धूप की बेदी बनायो वा चवखट्टा होती, वोकी लम्बाई अना चौड़ाई एक, एक हात को होतो अना वा दोन हात उच्चो होतो अना बिना जोड़ को सींग वोमा जुड़या होतिन। 26पूरी धूप बेदी ला बाहेर-भीतर, खाल्या-वरता अना वोकी किनार ला भी चोखो सोन्नो लक बनायो। 27वोको किनारी को खाल्या कड़ा गिन ला आमोर-सामोर लगायो, का वोला डन्डा लक उठाय लियो जाय। 28वोना बंबूर की काड़ी का डन्डा बनाय के सोन्नो लक पालिस कर दियो।

धूप अना अभीसेक को तेल को बनायो जानो

(हिटनो 30:22-38)

29तबा वोना पवीतर छिड़काव को तेल अना खूसबु वाली भभुती खुसबू वालो रीती लक बनायो।