हिटनो 38

होमवेदी का बनायो जानो

(हिटनो 27:1-8)

1मंघ वोना बंबूर की लकडी को होमवेदी भी बनवाईन वोकी लम्बाइ अना चवडाई पाँच-पाँच हात की होती, एना पिरकार लक वा चवकोर बनायो, अना ऊचाई तीन हाथ की होती। 2वोना वोका चारीकन वोका चार सींग बनायो वोय वोका संग बिना जोड़ का बनया, अना वोना वोला पीतल लक मठीन। 3अना वोना वेदी को सबरो समाइन, मतलब वोकी हंडियागिन फावडागिन, कटोरागिन, कांटागिन स्तो को बरतन अना करछागिन ला बनावायो। 4अना वेदी का चारीकन का एक झंझरी बनावायी, वा नीचे लक वेदी का ऊचाई का बीच तक पहूचीन। 5वोना पीतल का झंझरी का चारीकन को लाई चार कुन्दा ढालीन, जो डन्डागिन का खाना को काम देहे। 6मघ वोना डन्डागिन ला बंबूर की लकड़ी लक बनाय के पीतल मा मढ़ लेयीन। 7तबा वोना डन्डागिन ला वेदी को किनारागिन को कुन्दा मा कसायीन वेदी ला उठावन को लायी वेदी ला वोना तखता गिन लक पोली बनावायो।

कांसो को भान्डो ला बनायो जानो

(हिटनो 30:18)

8वोना होदी अना वोका पाया दुही पीतल का बनावाइन अना आंग खोरन को बरतन यो मिलापवाला तम्बू को बेसकुड़ मा सेवा करन वाली बायकागिन का पीतल का आरसा लक बनायो गयो।

पिरभु की हाजीर रव्हन वालो तम्बू को आंगन

(हिटनो 7:9-19)

9फिर वोना आँगन बनावायो; अना दक्सिन को कन लायी आँगन को परदा लायी बारीक मलमल को कपरा का होतिन, अना सब मिलायके सव हाथ का लम्बा होतिन। 10उनको लायी बीस खम्बा अना उनका पीतल का बीस कुरची बनवायीन, अना खम्बागिन का कुन्डी अना जोडन का छड़गिन खुरो का बनवायीन 11अना उत्तर को कन लायी भी सव हाथ लम्बा परदागिन बनावायीन अना उनको लायी बीस खम्बा, अना पीतल का बीस कुरची बनायीन, अना खम्बागिन का कुन्डीगिन अना जोडन का छड़गिन खुरो का होतिन। 12अना दिनबुड़़ती को कन लक मिलाय के सबच पडदा पच्चास हात का होतिन; उनको लायी दहा खम्बागिन अना दसच उनका कुरचीगिन होतिन अना खम्बागिन का कुन्डीगिन अना छड़गिन खुरो का होतिन। 13अना दिन उगती कन भी वोय पच्चास हाथ का होतिन। 14आँगन को दरवाजा को कन को लायी पंदरा हाथ का पडदा बनीन; अना उनको लायी तीन खम्बा अना तीन कुरची होतिन। 15अना आँगन को दूसरोकन भी वसोच बनायो होतो अना आँगन को दरवाजा को इता अना उता पंदरा-पंदरा हाथ का पडदा होतिन, अना उनको लायी तीन-तीन खम्बा अना तीन-तीन आधार भी होतिन। 16आँगन का चारीकन सबच पडदा बारीक मलमल का कपरा का बनया होतिन। 17अना खम्बा की कुरची पीतल का अना कुन्दा अना छड़गिन खुरो का बनाया, अना उनका छिन्दील खुरो लक मढिया गइन, अना आँगन का सबच खम्बागिन खुरो का छड़गिन लक जोडिया गई होतीन। 18आँगन का दरवाजा का पडदा मा बेल बूटा को कढ़ाई काम होती, अना ऊ नीलो,भटाई अना लाल रंग का कपरा को अना बारीक मलमल का कपरा को बनया होतिन अना वोकी लम्बाई बीस हाथ की होति अना वोकी ऊँचाई आँगन की किनात का चोडाई को जस्सो पाँच हाथ का होती। 19अना उनको लायी चार खम्बा, अना खम्बा की चार कुरचीगिन पीतल की बनीन उनका कुन्दा खुरो का बनीन अना उनका छिन्दील खुरो लक मढिया गयीन, अना उनका छड़गिन खुरो की बनीन। 20अना निवास अना आँगन का चारीकन का सबच खूटा पीतल का बनया होतिन।

पिरभु को हाजीर रव्हन वालो तम्बू मा काम को बरतन

21गवाही को पतर का राखन का जघा का सामायीन जो लेवीगिन को सेवा को काज लयी बनायो। अना वोकी गिनती हारून याजक का टूरा ईतामार लक मोसे कव्हनो से भयो होतो, वोकी लेखा यो से।

22जस्सो-जस्सो सामाइन बनवावनो को आदेस यहोवा ना मोसे लक देयी होती, वोला यहूदा का गोत बसलेल ना, वोय हूर का नाती अना ऊरी का टूरा होतो, बना दियो। 23अना वोको संगा दान का कुटम्बी गोत वारो, अहीसामाक को टूरा ओहोलीआब होतो। जोन कारीगर नक्कासी करनो अना काढ़न वाला अना नीला, भटाई अना लाल रंग का अना बारीक मलमल का कपरा मा कढाई करन वाला साजरो मिसतिरी होतो।

24पवीतर जघा को सबच काज मा जो भेट को सोन्नो लगयो ऊ पवितर जघा को तराजू मा एक हजार दो किलो को बराबर होतो। 25अना मन्डली को गीनयो हुयो लोक हुन को खुरो पवीतर जघा को तवल को अनुसार करीब तीन हजार पाँच सव बीस किलो होती।1 26मजे जितरो बीस साल को अखीन वोको लक जादा उमर को मानूस गिनयो गयो होतीन, वय छय लाख तीन हजार साढे पाँच सव मानूस होतीन। पवीतर जघा को तवल को अनुसार अरधो सिक्का मजे छय गिराम एक मानूस लक भेटयो होतो। 27करीब साढे तीन हजार किलो खुरो पवीतर जघा अना बीच वालो परदा दूई को खुरची बनान मा लग गयो। एक खुरची मा करीब पैतीस किलो खूरो लगयो, असो परकार साढे तीन हजार किलो खूरो लक सव खुरची बनयो होतो। 28बाकी तीस किलो लक मुन्डा को मुन्दरी बनायो गयो। अना खम्बा को मस्तक अना वोला जोडन को पट्टी बनायो गयो। 29जोन पीतर भेट चघायो गयो होतो वो करीब दोन हजार चार सव पच्चीस किलो होतो। 30एको लक मिलाप वालो तम्बू को बेसकुड़ को खुरची हुन, पीतर को वेदी, पीतर को झंझरी,अना वेदी को सप्पा समान, 31अना अँगना को अखापाखा को खुरची, अना वोको बेसकुड़ को खुरची, अना निवास को अना आखापाखा को खूटा बनायो गयो।