हिटनो 39

याजकीय कपरा तैयार करनो

1मघ उनना नीलो बैजनी रंग अना लाल रंग रंगायो हुयो कपरा पवीतर जघा को काम को लाय, अना हारून को लाय भी पवीतर कपरा बनायो, जसो यहोवा ना मोसे ला हुकुम देयी होतिन।

2वोना बागा ला सोन्नो, अना नीलो, बैजनी अना लाल रंग को कपरा को, अना महीन मलमल को कपरा को बनवायो। 3अना उनना सोन्नो ला पीट-पीट के पतरा बनवाइन मघा पतरागिन ला काट-काट के तार बनाइन अना तारगिन ला नीलो, बैजनी अना लाल रंग को कपरा फीता मा, अना बारीक मलमल को कपरा मा कढाई करके मिलाय दियो। 4बागा को जोड़न लाय उनना वोका बखा मा को बन्धन बनवायो, अना वोला दूही कन लक जोडियो गयो। 5अना वोला बाधन लाई जो रंगियो हुयो पट्टा वोको पर बनायो। वा वोको संग बिना जोड़ को, वोकोच बनावट को अनुसार मजे सोन्नो अना नीलो, बैजनी अना लाल रंग को कपरा को अना महीन मलमल को कपरा को बनयो। जसो यहोवा ना मोसे लक आदेस दियो होतो। 6उनना सुलेमानी मनी काटके उनमा इसरायल को टुरागिन को नाव, जसो छाप खोदो जासे वासोच खोदिन अना सोन्नो को खादा मा देईन। 7अना वोना वोला बागा को बखा को कपरा को बन्धगिन मा लागायो, जेको लक इसराइल गिनको हेत करन को लाय मनी होहेत जसो परकार लक यहोवा ना मोसे ला आदेस दियो होतो।

सीनाबन्द बनाना

(हिटनो 28:15-30)

8वोना अंगरखा ला बागा को जसो सन्नो को, अना नीला, भटाई अना लाल रंग को कपरा को अना बारीक मलमल को कपरा मा बेल-बूटा को काम करो हुयो बनायो। 9अंगरखा चरखुटा बनियो, अना उनना वोला दोहरो बनायो अना ऊ दोहरो होय के एक बित्ता लम्बो अना एक बित्ता चवड़ो बनयो। 10अना उनना वोको मा चार लाइन मा किमती गोटा लगाइन, पहली लाइन मा मनी , पघराज, अना लालड़ी लगयो गयो। 11अना दूसरी लाइन मा किमती गोटा, मरकत, नीलमनी, अना हीरा; 12अना तीसरी लाइन मा लसम, सूरयाकान्त, अना नीलम; 13अना चोथी लाइन मा किमती गोटा, सुलेमानी मनी अना यसब जडे़; या सब अलग-अलग सुन्नो को खाचा मा जड़ो गयो। 14अना या मनी इसरायली को टूरागिन को गिनती को जसो बारा होतिन; बारा गोतर मा लक एक-एक को नाव जसो छाप खोदी जासे वसोच खोदयो गयो। 15अना उनना अंगरखा मा दोरीगिन को जसो आटयो हुयो चोखो सोन्नो को संकल बनायके लगाइन। 16मंग उनना सोन्नो को दो खन्दा अना सोन्नो का दूही कडिहुन ला बनावाय के दूही कडीहून ला अंगरखा को दूही छोर मा लगवाइन। 17तबा उनना सोन्नो कि दूही आटीयो हुयो सांकल ला अंगरखा को दूही छोर का कड़ीगिन मा लगवायो। 18वोयगिन ना सुन्नो की बेड़ी को दुसरो छोर ला पट्टी लक बान्धिन तबा वोयगिन ना एपोद का दुही खाचा गिन ला वोको सामुर फसाइन। 19वोयगिन ना सुन्नो का दुई छल्ला बनाइन अना छाती बान्धन को कपरा को पट्टा को खाल्या को हिस्सा मा लगाईन। 20ऊनना सामुर कन पट्टी को खाल्या हिस्सा मा दुही छल्लागिन ला लगाईन, वोय गुदाम जवर कपरा को पट्टी को वोरहया होतिन। 21तबा ऊनना नीली पट्टी ला वापरीन अना छाती फीता मा लगया छल्लागिन ला एपोद को छल्ला मा जोड़ीन, असो करन लक ऊ पेटी जवर लगयो रह्यो, काहेकी ऊ पड़न को नही असो यहोवा को आदेस लक करयो जोन मोसे ला दियो होतो।

बेगरो याजकीय कपरा बनावनो

(हिटनो 28:31-43)

22तबा वोयगिन ना एपोद को खाल्या चोन्गा बनाइन, वोला नीलो कपरा लक बनाइन। यो काज चालबाज अदमी को होतो। 23चोन्गा को बीच मा एक छेद होतो, जेमा कपरा की गोट होती जोन वोला फटन लक बचाय सका। 24अना वोयगिन ना सनकाड़ी को सूत का फुन्दडा बनाइन, अना चोन्गा खाल्या बान्धिन जोन अनार घाइन लटकत होतिन। 25मंग चोखो सुन्नो की घंटी बनाइन, अना उनला छाती की पट्टी को चारही आँगन अनार को बीच मा लगाइन। 26चोन्गा को चारही छोर मा अनार अना घंटी होतिन। याजक वोना चोन्गा ला तबा पेहरत होतो, जबा यहोवा की सेवा करत होतो, जसो यहोवा ना मोसे ला आदेस दियो होतो।

27हारून अना वोका टूरागिन लाई चोंगा बनाइन। जोन सनकाड़ी को रेसा का होतिन। 28अना सूती को कपरा की फेटा, अना सूती को कपरा को खोबसूरत टोपी, कुरता, जांघीया भी वोनाच रेसा का बनाइन। 29सनकाड़ी को पतरो सूत लक बुनया नीला, लाल, भटा रंग को कपरा का कमरबन्द, जेमा बेल-बुटा कढ़ाई अना कसीदा करी होतिन। जसो मोसे ला यहोवा ना आदेस दियो होतो। 30तबा वोयगिन डोई पर बान्धन लाई चोखो सोन्नो को साफा बनाइन, अखिन वोको पर यहोवा लाई सुन्दर पवीतर सब्द खोदिन। 31अना साफा मा एक नीली फीता बान्धिन। अना पगड़ी ला यहोवा ना मोसे ला जसो हुकुम दियो होतो वसोच बान्धीन।

मिलापवालो तम्बू को तैयार होनो

(हिटनो 35:10-19)

32एना पिरकार लक तम्बू को काज पुरो भयो, इसरायल का परमेस्वर ना सबच चीज वोसोच बनाइन जसो यहोवा ना मोसे ला आदेस दियो होतो। 33तबा उनना मिलन वालो तम्बू मोसे ला चोवायो, वोना जघा की सबच चीज़ छल्ला, तख्ता, छड़, खम्बा चोवायो। 34वोयगिन ना तम्बू लाई, मेढा अना सूइसगिन की लाल खाल को बनयो पंघरन चोवायो। 35डन्डा समेत साक्छी चिठ्ठी को सन्दूक अना वोला लिजावन वाली बल्ली अना झक्कन चोवायो। 36वोय गिन ना कीमती भाकर अना वोकी टेबिल अना संग मा रव्हन वाली सबच चीज मोसे ला चोवायो। 37मोसे ला चोखो सोन्नो की दीवनी अना वोको पर मंड़यो टवरी जैतून को तेल भी चोवायो। 38सोन्नो की बेदी, छिडकाव को तेल अना खुसबो वाली धुप, तम्बू को दरवाजो को पड़दा चोवायो। 39पीतर की झंझरी, डंडा अना पूरो समायेन संग मा कासो की भानी अना हौज भी चोवायो। 40खम्बा अना कुरची संग मा दरवाजो को पड़दा, अना दोरी, खूटा अना मिलाप वालो तम्बू मा सेवकाई को पूरो समायेन जोन कीमती होतो। 41पवीतर जघा मा सेवा करन लाई बेल-बुटा वाला कपरा, हारून को अना वोका टूरागिन का पवीतर कपरा चोवायो जबा वोय याजक को रूप मा सेवा करत होतिन। 42अना जोन आदेस यहोवा ना मोसे ला दियो होतो, वोसोच इसरायली गिन ना सबच सेवा काज करीन। 43तबा मोसे ना सबच काज ला परख के चोयो, का वोयगिन यहोवा को आदेस जसो होतो, वोसो करीन का नही अना मूसा ना आसीरवाद दियो।