हिटनो 40

पवितर तम्बू को उभो कियो जावनो अना समरपन

1मंग यहोवा ना मोसे लक कह्यो, 2पहेलो महिना को पहलो दिवस मिलाप वालो तम्बू ला पिरभु को हाजिर को लाय उभो करो। 3साक्छी चिठ्ठी को संदूक ला मिलाप वालो तम्बू मा पड़दा को वोनागन राख देव। 4तबा टेबिल ला भीतर आनो जोन चीज वोमा सेत वोला उनकोच जघा मा राख देव, अना टवरी राखन को दियोदानी ला आनके टवरी गीनला पेटाय देव। 5सोन्नो को वेदी ला धूप लाय तम्बू मा राखो, वेदी ला साक्छी चिट्ठी को सन्दूक को समोर राखो। तबा पड़दा पवितर तम्बू को किवाड़ पर लगाय देव। 6तू इसतो को बली को वेदी को मिलाप तम्बू को रव्हन को जघा को बेसकुड को समोर राखने। 7तबा मिलाप तम्बू अना वेदी को बीच गंगार राख के वोमा पानी भरने। 8तू आखा-पाखा कनात उभो करके आंगन बनावजो अखीन आंगन को बेसकुड मा पड़दा लटकावजो।

9एको मघा अभिसेक को तेल धरके रव्हन को जघा अखीन वोको भीतर को सप्पा चीज हुन को अभिसेक करके वोला अना सप्पा समान ला पवितर करजो तबा वय पवीतर भयी जाहेत। 10तू इसतो बली को वेदी अना वोको सप्पा भान्डो ला अभिसेक करजोस। तू वेदी ला पवितर करजोस तबा वेदी परम पवीतर भयी ठयरेत। 11तू गंगार अखिन वोको पाय को भी अभिसेक करजोस अना हौज ला भी पवीतर करजोस।

12तू हारून अना वोको टुरा गिनला मिलाप तम्बू को बेसकुड मा आनजो अखीन उनला पानी लक आंग खोरावजोस, अना हारून ला पवितर कपरा पहेनाजो। 13तबा तू हारून को अभिसेक करजोस, वोला पवीतर करजोस का उ याजक को रूपमा मोरो सेवा करे। 14वोको टुरा गिनला भी आनके वसोच कपरा पहेनावजोस, 15जसो उनको अजी को अभिसेक करयो से वसोच उनको भी अभिसेक करजोस जोनलक वय याजक को रूपमा सेवा करहेत, उनको यो अभीसेक एक पीढी लक दूसरो पीढी तकन उनला इसथाई याजक को काम करतो रव्हेत।

16मोसे ना असोच करयो, जोन हुकुम पिरभू ना दियो होतो, वोकोच अनुसार सप्पा काम करयो। 17दूसरो साल को पहेलो महेना को पहेलो दिवस मा रव्हन को जघा उभो करयो। 18मोसे ना रव्हन को जघा उभो करयो अना वोको कुरसी राख के तखता लगाके उनमा छड़ डाक के वोको खम्मा ला उभो करयो। 19अना वोना रव्हन को जघा को वरता तम्बु तानयो, अना वोको पर पघरन फैलायो जसो परमेस्वर ना मोसे ला हुकुम दियो होतो। 20मोसे ना साक्छी पतर ला संदूक मा ठेय दियो। अना सन्दुक मा डन्डा लगाय के वोको वरता पस्तावा को झक्कन राख दियो। 21अना वोना संदूक ला रव्हन को जघा मा धाड़यो, अना बीच वालो पड़दा ला लटकाय के साक्छी पतर को सन्दुक ला वोको भितर करयो जसो का परमेस्वर ना मोसे ला हुकुम दियो होतो।

22अना वोना मिलाप वालो तम्बू मा रव्हन को उत्तर को अना बीच को पड़दा लक बाहेर टेबिल राख्यो। 23वोना वोको पर यहोवा को समोर भाकर सहि जघा मा राख्यो जसो मोसे ला पिरभु ना हुकुम दियो होतो।1 24मोसे ना मिलाप वालो तम्बू मा टेबिल को समोर मा रव्हन को दक्सिन को कन टवरी राखन को चीज ला राख्यो। 25अना वोना टवरी गिनला परमेस्वर को पुढा पेटाय दियो जसो का परमेस्वर ना मोसे ला हुकुम दियो होतो। 26अना वोना मिलाप वालो तम्बू को बीच को पड़दा को समोर सोन्नो को वेदी ला राख्यो। 27अखिन वोको मा खुसबू वालो धूप जलायो जसो का परमेस्वर ना मोसे ला हुकुम दियो होतो। 28मोसे ना रव्हन को जघा को धसन को जघा मा पड़दा लटकायो। 29अना मिलाप वालो तम्बू को रव्हन को बेसकुड़ मा होमवेदी राख के वोको मा होमन बली अना अनाज को बली चघायो। जसो परकार लक परमेस्वर ना मोसे ला हुकुम दियो होतो। 30मोसे ना मिलाप तम्बू अना वेदी को बीच मा गंगार राखयो अना वोमा आंगधोवन काजी पानी भरयो2। 31जोनलक पानी लेयके मोसे, हारून अना वोको टूरा गीन हात पाय धोहेत। 32जब वय मिलाप वालो तम्बू को भीतर आवत होतिन, या जब वय वेदी को जवर आवत होतीन तबा वय आंगखोरत होतीन जसो का मोसे ला पिरभू ना हुकुम दियो होतो। 33मोसे ना रव्हन को जघा अना वेदी को आखा-पाखा कनात उभो करके आंगन बनायो अना आंगन को धसन को बेसकुड़ मा पड़दा लटकायो। असो परकार लक मोसे ना काम पूरो करयो।

मिलाप तम्बू को वरता बदली

34तबा बदली ना मिलाप तम्बू ला झाक लियो अना पिरभू को महीमा लक रव्हन को जघा भर गयो। 3 35मोसे मिलाप वालो तम्बू मा नही धस सकयो, काहेका वोमा बदली होतो, अना पिरभू को महीमा रव्हन को जघा मा भर गयो होतो। 36आपरो सप्पा यातरा मा इसराइली लोक, जब बादली मिलाप वालो तम्बू लक वरता उठ जात होतो तबा च वय जावत होतीन।4 37अदि बादर वरता नही उठत होतो ता वय वोना बेरा तकन नही जावत होतीन जब तकन वा वरता नही उ जावत होतो। 5 38इसरायली घरानो को पूरो यातरा मा पिरभू को बादर दिवस को बेरा रव्हन को जघा को वरता रव्हत होतो। अना राति को बेरा इसराएल को घराना ला वोमा स्तो चोवत होती। 6