हिटनो 15:2

मोसे अना इसरायल को जीत को गाना

1तबा मोसे अखिन इसरायली गिन यहोवा परमेस्वर को लाय यो गाना गायीन।1 उनना कहिन

“ मी यहोवा को लाय गाना गायीन,

काहेका वय लगत महान परमेस्वर से।

घोड़ागिन अखिन चालक गिनला

सागर मा डाक दियो।”

2“यहोवा मोरो ताकत अना मोरो गाना से।

वोच मोरो सूटकारा बनयो से।

योच आय मोरो परमेस्वर , मी वोको स्तुति करहीन;

मोरो अजी को परमेस्वर ,वोको मी परसंसा करहीन,2

3यहोवा बीर से,

अखिन वोको नाव यहोवा से।

4यहोवा ना फराओ को रथ गिनला अखिन वोको सेना ला

सागर मा फेक दियो,

वोको सबरी साजरो लक साजरो रथ मुखिया गिन

लाल सागर मा बुड़ गयिन,

5वय गोटा को जसो गहरो मा बुड़ गयीन,

अखिन गहरो पानी ना उनला बुढ़ाय देयीस।

6ओ यहोवा, तोरो उज्जो हात

ताकत लक भरयो से।

अखिन तोरो उज्जो हात

सतरू ला चूरा-चूरा कर देवासे।”

7“सतरू गिनला आपरो मोठो बीरता लक

तू हरा देवासेत।

जोन तोरो बिरोध करासेत, तू वोको पर आपरो गुस्सा परगट करासेत।

अना उनला भूसा को जसो पेटाय देवासेत।

8तोरो नाक को सांस लक सागर को पानी जमा भयी गयो

अखिन पानी बहनो बंद भयी जासेत।

बढ़तो पानी भीट को जसो उठ के उभो भयो,

सागर को दिलमा गहरो पानी जमा भयी गयो!”

9सतरू ना कह्यो होतो,

“मी मघानी जाहिन, मी उनला धर लेहिन

अखिन लूटके जिनुस को हिस्सा ला बांट लेहिन

तबा मोला तसल्ली मिलेत,

मी तरवार हेड़ीन,

अखिन आपरो हात लक उनला नास कर देहिन।

10तूना आपरो सांस फूकयो

तबा सागर ना उनला झाक लियो।

वय मोठा सागर मा

सीसा को जसा बूड़ गयीन।”

11“ओ यहोवा,

देवगीन मा तोरो जसो कवन सेत।

कवन से तोरो जसो, भेव काबील

पवीतरता मा सबमा वरता,

स्तुति को लायक

अखिन अनोखो काम करनवालो”?

12“तूना आपरो उज्जो हात बढ़ायो

अखिन धरती ना उनला लील लियो।

13तूना आपरो किरपा लक

सुड़ायो हुयो लोक गिनला चलायो,

तू आपरो ताकत लक

उनला आपरो पवीतरता को जघा मा ले गयो।

14देस-देस को लोक यो आयक के भेव खायेत,

पलिस्तीनि गिनमा भेव छाय जाहेत,

15एदोम को मुखिया निरास भयी जाहेत,

मोआब को ताकतवर कंपन लगेत,

कनान के रहवासी उदास भयी जाहेत।

16उन पर भेव अना दहसत छाय जावासे; तोरी भुज्जा की महानता के कारन, वय गोटा को जसो पक्को होय जासेत, जबकि तोरा लोगगिन, ओ पिरभू वहान लक चली ना जाय, जोनला तुना खरिद लियो से।

17तूच उनला लायके आपरो पहाड़ मा बसेरा कराहेत।

वोना जघा मा,

हे परमेस्वर जोन तूना आपरो लाय बेगरो करयो सेत।

वोच पवितर जघा, जोनला तूना आपरो हात लक बनायो से, वोला पक्को वारीस करयो से।”

18“यहोवा को राज

सदा-सदा को लाय बनयो रहेत।”

मिरियम को गीत

19जब फराओ को घोड़ा गिन ,वोको रथगिन अखि सारथी सब सागर मा बुड़ गयीन, अखिन यहोवा सागर को पानी ला वरता ले आयो, पर इसरायली सागर को बीचमा चलतो हुयो हीट गयीन। 20तबा हारून को बहीन मिरियम जोन भविस्यवक्तनी होती, खंजरी उठाइस अखिन वोको संग सप्पा आई माई आपरो हात मा खंजरी लेयके नाचन लगीन। 21मिरियम खुसी लक गावन लगीस,

“यहोवा को गाना गाव,

काहेका वो लगत महान से।

वोना ता घोड़ा गिन ला सवार गिन

उनको समेत सागर मा बुड़ा दियो।”

कड़ुवा पानी

22मंग मोसे इसरायली गिनला लाल सागर लक सूर को सूनसान इलाका मा ले गयो। वय तीन दिवस तकन पानी ढून्ढ़त रहयो, पर उनला कहीं च पानी को कोनी ठिकाना नही चोवयो। 23वय माराह नावको जघा मा पहुंचिन, पर माराह3 को पानी कड़ू होतो। यो कारन लक यो जघा को नाव माराह राखयो गयो होतो। 24एकोलाय लोक मोसे पर बड़बड़ान लगीन। अना वय कव्हन लगीन अमी काजक पीवबीन? 25मोसे ना यहोवा ला हाकलिस अना परमेस्वर ना वोला एक काड़ी को टुकडा दिसायो। जब मोसे ना वा झाड ला पानी मा डाकयो तबा पानी मीठ्ठो बन गयो।

वोच जघा यहोवा परमेस्वर ना उनको लाय एक नियम अखिन बिधी बनायो। अना वहान वोना यो कहे के उनको परिक्सा की 26तबा यहोवा परमेस्वर ना उनलक असो सांगीस, “यदि तुमी यहोवा परमेस्वर को बचन ला सच्चो मन लक मानने, अना जोन वोको नजर मा साजरो से वोच करो अखिन वोको गोस्टी मा धियान देयके साजरो काम करतो हुयो, सब नियम ला मानने। ता मिसरी गीन पर जोन घटना घटयो से उनमा लक कोनी आफद तुमरो पर नही आहेत। काहेका मी याहवेह राफा सेव, मजे चंगा करन वालो सेऊ।”

27तबा वय एलिम नामको जघा मा पहुचयो, जहांन बारा झरना अना सत्तर खजूर को झाड़ होतिन। इसरायली गिनना पानी को पिझरा को जवर च आपरो पड़ाव डाकीन।