हिटनो 14

लाल सागर पार करनो

1यहोवा ना मोसे लक कह्यो , 2“इसरायली गिनला हुकूम देव का वय मुरक जाहेत। अखिन पी-हाहीरोथ को जवर जोन मिगदोल अना सागर को बीचमा से आपरो तंबू डाको, तंबू सागर को किनार मा बाल-जेफोन को उलटा मा ऊभो करने।” 3जोनलक फराओ असो समजेत का इसरायली देस को उलझन लक बारू को जघा मा हीन्ड रहयो सेत। 4तबा मी फराओ को मनला कर्रो कर देहिन अखीन उ इसरायली गिनको मंघा आहेत तबा मी फराओ अखिन वोको सेना लक मोरो महिमा कराहिन। जोन लक मिसर को रव्हनवारा गिनला मालूम भयी जाहेत का “मी च यहोवा परमेस्वर सेऊ”।

5जब मिसर को राजा ला यो गोस्टि मालूम भयो का वय लोक पराय गयो सेत। तबा फराओ अखिन वोको अधिन सेवक गिनको मन बदल गयो अखिन वय एकमेक लक कव्हन लगीन “अमीना यो काजक कर डाकयो अमीना इसरायल गीनला जावन दियो?” 6फराओ राजा ना आपरो रथ तैय्यार करवायो अखिन आपरो सेना ला आपरो संग लियो। 7फराओ ना छय सव साजरो रथ अपरो संग लियो अखिन मिसर देस को सप्पा रथगिन पर मुखिया ठैरायो, 8परमेस्वर ना मिसर देस को राजा फरओ को दिल ला हट्टी बना दियो होतो। एकोलाय इसरायली गिनको पिच्छु गयो जोन हिम्मत लक पूढा बढतो जावत होतिन।1 9सप्पा मिसर को रव्हनवालो अना फराओ को सब घोड़ो गिन, रथगिन, घुड़सवार गिन अखिन वोको सप्पा सेना उनको मंघा गयिन। अखिन बाल-जेफोन को समोर पी-हाहीरोथ को जवर, जहाँन इसरायली सागर को किनार मा पड़ाव डाको हुयो होतिन पहुँच गयिन।

10जब फराओ जवर आयो इसरायली गिनना आपरो डोरा उचलके चोवयो का सप्पा मिसरी उनको पिच्छू से ता वय लगत डर गयीन अना उन ना यहोवा परमेस्वर ला चिल्लायके, रोयेके हाकलन लगीन। 11इसरायली गीन मोसे लक कव्हन लगीन, का मिसर मा गडावन को जघा कम होतो जोन लक यो सूनसान मा मरन लाय आनयो सेव? तूना आमरो संग यो काजक करयो सेव? 12का अमीना मिसर देसमा यो नही कव्हयो होतो, आमरो कन लक चले जाव! अमीला मिसर को रव्हन वालो को गुलामी सेवा करन देव? आमरो लाय यो सजरो होतो, का अमी यहान मरनो लक, मिसर को गुलामी करत रव्हतो।2

13मोसे ना इसरायली गिनलक कव्हयो, भेव नोको खाव, बेखटका उभो रव्हो! अना यहोवा परमेस्वर को सूटकारा को काम चोवो, जोनला उ आज तुमरो लाय करहेत, जोन मिसर रहवासी गिनला तुम्ही आज चोवासो उनला मंग कदी नही चोवबिन। 14यहोवा पर मेस्वर तुमरो कन लक लड़ाई करहेत, तुम्हि उघोमुघो रव्हो।

15यहोवा परमेस्वर ना मोसे लक कव्हयो, तू मोला कायलाय हाकला से? इसरायली गिनला पूढा जावन को हुकुम देव, 16आपरो लठीया उठा। आपरो हात सागर कन फैला अना वोला दूई हिस्सा कर, जोन लक इसरायली सागर को सूक्को जमीन लक जाय सकेत। 17मी मिसर रहवासी गिनको दिल ला हट्टी कर देहिन। अखिन वय उनको मघा-मघा आहिन, तबा मी फराओ को सेना वोको रथ अना सवारी को विनास लक आपरो महिमा कराहिन। 18जब मी फराओ, वोको रथ गिन अखिन घुड़सवार गीन पर जीत हासील करके आपरी महिमा कराहूँ तबा मिसर को रव्हासी गिनला मालूम भयी जाहेत का मी च यहोवा परमेस्वर सेऊ।

19मंग परमेस्वर को सरगदूत, जोन अबा तकन इसरायली गिनको पूढा-पूढा जावत होतिन। उनको मघानी आय गयीन। अना बादली भी पूढा लक मघानी आय गयो। 20असो परकार लक दूत अखिन बदली इसरायली गिन अखीन मिसरी गिनको बीच मा आय गयो। बदली को कारन लक एक कन इंधार होतो पर रात मा उजाड़ मिलतो रव्हयो।

21मोसे ना सागर को वरता आपरो हात बढ़ायो अखिन यहोवा परमेस्वर ना रात भर तेज वारा चलायो, अखिन सागर को दुई हिस्सा करके पानी ला मघानी हटाय दियो। जोनलक बीच को जमीन सूक गयो। 22इसरायली सूक्को जमीन मा चलके दूसरो कन आय गयीन काहेका पानी उनको दूई कन भीत जसो उभो भयी गयी होती।3 23तबा मिसरी गिन भी इसरायली गिनको मघा-मघा आवन लगीन। फराओ को सप्पा घोड़ा रथ अखीन सारथी सागर को बीचमा आय गयीन। 24तबा भुन्सारे को बेरामा यहोवा परमेस्वर ना स्तो अखिन बदली लक मिसरी सेना ला चोयो, अना यहोवा ना उन पर हमला करयो अखिन उनला घबराय दियो 25अखिन उनको रथ को चक्का ला फंसा दियो जोनलक वय पूढा नही जाय सकीन तबा वय एकमेक लक सांगन लगीन, “चलो, अमी इसरायली गिनको मघानी जावनो सोड़के मीसर पराय जाबिन, काहेका यहोवा परमेस्वर खुद उनको कन लक आमरो लक लड़ा सेत।”

26मंग यहोवा परमेस्वर ना मोसे लक सांगीस, “सागर को वरता आपरो हात बढ़ाव, जोनलक पानी मिसरी गीन अखिन उनको रथ अखिन उनको घुड़सवार गिनको वरता लवट जाय।” 27तबा मोसे ना सागर मा आपरो हात बढ़ायो अखिन सागर पहले जसो बोहन लगयो। सप्पा मिसरी लोग उनको रथ अखीन घोड़ा सब परानो सोड़ सागर मा बोहाय गयीन। यहोवा परमेस्वर ना उनला सागर मा बुड़ा दियो। 28बोहतो सागर मा का रथ, का सारथी, का फराओ राजा को सप्पा सेना जितरो उनको मघा-मघा बीच सागर मा होतिन सब मर गयिन एक भी नही बचयो। 29पर इसरायली सागर को बीचमा लक सूक्को जघा पर रेगत-रेगत पार भयी गयीन। उनको उज्जो अना डाखुटिया कन पानी को भीत को जसो उभो होतो।

30यहोवा वोना दिवस इसरायली गिनला मिसरी गिन लक बचायो। इसरायली गिन मिसरी गिनको लास सागर को कगर मा चोयीन। 31जब इसरायली गिन ना वोना देस को ताकतवर काम पर धियान देयिन जोन परमेस्वर ना कियो होतो। ता वय भेव खायीन अना परमेस्वर को सेवक मोसे पर भरोसा करीन।