हिटनो 13

सीग लेकरू- बारू को अरपन

1मंग यहोवा ना मोसे लक कह्यो, 2“मानूस अखिन जनावर को पहेलो संतान मोरो लाय बेगरो करके पवीतर करो। सप्पा लेकरा जो इसरायल मा पहेलो से,चाहे मानूस होय चाहे जनावर को सप्पाच पर मोरो हिस्सा होहेत।” 1

बिना ख़मीरी रोटी को तिहार

3मोसे ना लोक गिनलक कह्यो “यो दिवस हेत करने, जोनमा तुम्ही आपरो गुलामी को घर मजे मिसर लक हेड़यो होतो, काहेका यहोवा परमेस्वर ना आपरो ताकतवर हात लक तुम्हिला वोना जघा लक बाहेर हेड़िस। यो कारन लक खमीर वालो काही जिनुस नोको जेवने।” 4अबीब को महेना मा अज को दिवस तुम्हि हिटयो सेव। 5जब यहोवा परमेस्वर तुम्हीला तुम्हारो आजा-बाबा लक कियो गयो करार को अनुसार कनानी, हित्ती, अमोरी, हिब्बी अखिन यबूसी लोग के देस मा पोहोचा देहेत, जहांन दूध अखीन सहेद को धार बोहासेत, तबा तुम्हि यो सेवा दिवस ला माननो जरूरी होहेत। 6सात दिवस बिना खमीर को भाकर जेवजोस, अखीन सातवो दिवस यहोवा परमेस्वर को तिहार होहेत। 7सातो दिवस बिना खमीर को भाकर च जेवने। अना तुम्हारो बीचमा खमीर को कोनी चीज नोको होय। अखिन पूरो देसमा खमीर की कोनी चीज नोको आनने। 8तू आपरो टूरा लक वोना दिवस असो कव्हजोस, “जब मी मिसर देस लक हिटयो होतो तबा यहोवा परमेस्वर ना जोन मोरो लाय करयो वोको हेतमा यो तिहार मनायो जावासेत।”

9वा तोरो हातमा एक निसान अखिन तोरो दुई डोरा को बीच एक टीका जसो होहेत, जोनलक यहोवा परमेस्वर को नेम तोरो तोन्ड मा हरामेसा बिराजत रहेत। काहेका यहोवा परमेस्वर ना आपरो ताकतवर हात लक तोला मिसर देस लक बाहेर हेड़ि सेत।2 10यो कारन तू यो नेम ला हर साल मानतो रव्हजोस।

पहिलोठा

11जब यहोवा परमेस्वर तोला कनानी गिन को देस मा आन लेवे, जोनको किरिया वोना तोरो अना तोरो आजा बाबा लक खायो होतो, अना जबा वा देस तोला देय, 12तबा तू सब पहेलोठा ला यहोवा परमेस्वर को लाय बेगरो करने। जनावर को सब पहेलोठा मरद बच्चा यहोवा परमेस्वर का होहेत।3 13तूम्हि गाढ़व को पहेलोठा बच्चा को बदला मा पाठी देयके वोला सूड़ा लेवने यदी तुम्हि वोला सोड़आनो नही चाव्हासेव ता वोको गरो तोड़ देवने। पर मानूस को हरेक पहेलोठा टूरा सोड़ायो जाहेत। 14जब आवनवारो बेरा मा तोरो टूरा तोरो लक पूसेत एको मन्जे काजक से? तबा तुम्हि वोको लक सांगने, “यहोवा परमेस्वर आपरो भूजा को ताकत लक अमीला मिसर देस को गुलामी को घर मा लक बाहेर हेड़यो होतो। 15जबा राजा फरओ ना हट करके अमीला नही जावन दियो तबा परमेस्वर ना मिसर देस को मानूस अना जनावर दूई को पहिलोठा ला मार डाकयो होतो। एकोलाय अबा मी हरेक मरद पहिलोठा ला परमेस्वर ला चघावा सू। पर मी आपरो पहिलोठा टूरा को बदला मोल लेयके सोड़ा लेवासू।” 16यो नेम तोरो हात मा एक निसान अना तोरी दूई डोरा को बीचमा टीका बनेत। काहेकी परमेस्वर ना आपरो ताकतवर भूज्जा लक अमीला मिसर देस लक बाहेर हेड़ो होतो।

बदली अना स्तो को खम्बा

17जब फराओ ना परजा ला वहांन लक जावन को लाय कव्हयो, तबा यहोवा परमेस्वर ना उनला पलिस्तीनि गिनको देस लक नही ले गयो, यो रस्ता लगत जवर होतो। लेकिन परमेस्वर को कव्हनो होतो, “कही लड़ाई चोवके लोक मिसर देस वापस चलो ना जाय।” 18यो काजी परमेस्वर ना उनला चक्कर खिलाके बारू को रस्ता लक लाल सागर को कन ले गयो। जोनलक इसरायली मिसर देस लक हीटके लड़ाई को लाय कतार लक तैय्यार होयके पूढा जाय।

19मोसे ना आपरो संग यूसूफ को हाड़ भी राखयो होतो। काहेका यूसूफ ना इसराइली गिनला कसम खवाय होतो का “पक्को मा परमेस्वर तुमरो दसा मा धियान देहेत सूध लेहेत, अखीन जबा यहान लक तुम्ही जावने ता मोरी हाड़ भी आपरो संग लेके जावने।”4

20इसराइली गिन ना सुक्कोथ सहेर लक चलनो सूरूवात कियो अना एथाम मा डेरा डाकिन। जोन बारू वालो जघा को किनार मा होतो। 21यहोवा परमेस्वर उनला रस्ता चोवा के उनको पूढा-पूढा चलयो। दिवस मा बदली अना राति मा स्तो को टेमा दिसाय के उनला चलायो। जोनलक दिवस मा अना रात मा उन चल सकेत। 22दिवस मा बदली अखिन रात मा स्तो को खंभा यहोवा परमेस्वर उन लोक हुन लक कभ्भू च दुहुर नही भयो।