हिटनो 12

फसह को तिहार

1यहोवा परमेस्वर ना मिसर देस मा मोसे अना हारून लक कह्यो, 2यो महेना तुम्हरो लाय सुरूवाती महेना मन्जे साल को पहेलो महेना होहेत। 3तुम्हि सबरी इसरायली टोली लक असो सांगो का यो महेना को दसवो दिन ला आपरो-आपरो बाप-दादा को परिवार को जसो, मकान को पर एक-एक पाठी निवाड़ के बेगरो कर लेव। 4अना अदि एक परिवार पूरो पाठी को मांस खावन को लाय कमी से ता उ आपरो जवर को सेजारी ला हिस्सा दे देय। हरेक मानूस को हिसाब लक जानावर ला कापे जितरो वय खाय सका सेत। 5एक साल को मरद निरदोस पाठी होवनो पाहिजे। तुम्‍हि वोला मेढा या सेरी को करप लक लेवने।1 6लेकिन वोला योच महेना को चौदवा दिवस तकन वोको खास धियान राखने। मंग सप्पा इसरायली टोली मिलके दिन बुड़न को बेरा एला बली चघाने। 7वय जोन घर मा पाठी ला जेहेत वोना घर को किवाड़ को चवखट मा वरता अना अखा-पाखा पाठी को रकत लगाहेत। 8वय वोच रात पाठी को मांस स्तोमा भूजके बिना खमीर को भाकर अना कड़ु साग-भाजी को संग जेवे। 9यो मास कच्चो न पका के जेव पर एको डोस्का पाय अना अतड़ी इसतो मा भूज के जेवनो से। 10तुम्हि वोला सक्कारी तकन नोको सोड़ने, मंग सक्कारी तकन काहि बच जाय ता वोला स्तो मा पेटाय देने। 11एला जेवन करतो बेरा कम्मर बान्धके पायमा पनाही घाल के हातमा लठीया धर के तुम्हि लवकर-लवकर मास जेवने यो यहोवा परमेस्वर को फसह को तिहार से।23

12काहेका वोना राति मी मिसर देस मा लक होयके हिटिन अखिन मिसर देस को पहलोटा संतान, चाहे मानूस को होय चाहे जनावर को सबला मार देहिन मीच यहोवा परमेस्वर सेऊ अना मी सब देव गिनको भी न्याय करहीन। 13जोन घर मा तुम्ही रव्हासेव वोको किवाड़ को चौखट मा रकत को निसान होहेत, मी उ रकत को निसान ला चोहूँ वोना घर ला मी सोड़ देहिन। पर जबा मिसर देस को नास होहेत, ता तुमला नास करन को लाय तुम्हि पर कोनी आफत नही आहेत।4 14“हेत रहेत का यो दिवस तुम्हारो लाय एक हेत करन को दिवस होहेत।” यो दिवस यहोवा परमेस्वर को तिहार को रूपमा मनायो करने यो तुमरो पीढी-पीढी लक चलतो जाय।

बिना खमीर को भाकर को तिहार

15पहलो दिवस सब अपरो-अपरो घर लक खमीर हेड़ के फेंक देवने, अखिन सात दिवस तकन बिना खमीर को भाकर जेवने। अगर कोनी इन सात दिवस तकन मा खमीर वारो भाकर जेवेत ता वोला इसरायल गिनको बीच लक मार दियो जाहेत। 16पहलो अखिन सातवो दिवस पवीतर सभा होहेत। इन दुई दिवस मा कोनी काम करहेत जोनला हान्डी रान्धना से। 17“तुम्हारो बिनखमीरी भाकर को तिहार मनानो जरूरी से।” काहेका योच वा दिवस आय जोन दिवस मीना तुम्हिला मिसर देस लक बाहेर हेड़ी सेऊ। यो एक हेत करन को दिवस बनके इन सब गोस्टि हेत करत यो तिहार पीढी-पीढी लक मनायो जाय। 18पहले महेना को चवदा तारिख ला सन्जा को बेरा लक इक्कीस तारिख को सन्जा तकन बिना खमीर को भाकर जेवनो पड़हेत। 19इन सात दिवस मा तुमरो घरमा खमीर नोको राखने। अदि कोनी मानूस खमीर वालो जेवन करतो हुयो पायो जाहेत ता वोला इसरायली टोली लक मिटा दियो जाहेत, चाहे वा देसी होय या परदेसी। 20कोनी भी परकार लक खमीर वालो जेवन नोको करने, आपरो घरमा बिना खमीर को भाकर जेवने।

पहेलो फसह

21मोसे ना इसराइल गिनको सब बुजरूग गिनला हाकलिस अखिन उनलक सांगीस, जायके आपरो-आपरो घराना को लाय करप लक एक-एक पाठी निरदोस लेव, अखिन फसह मा पाठी को बली चघावनो से। 22जूफा नावको झाड़ी को एक गुच्छा लेयके वोला पाठी को रकत मा डुबाय के चवखट को दुई बाजू मा अना वरता मा लगावने। तुमरो मा लक कोनी भी सक्कारी तकन किवाड़ खोल कर नोको हिटेत। 23काहेका यहोवा परमेस्वर वोना बेरा मिसरी गिनला मारतो हिटत होहेत। जोन किवाड़ को चवखट मा दूई कना अना वरता पाठी को रकत दिसेत वोला सोड़त पूढा हीट जाहेत अना भितर आयके कोनीला नही मारहेत।5 24“मंग तुम्हि येना बिधी ला हरामेसा तुम्हि अना तुमरो सन्तान एला बिधि ला एक हेत को रूपमा मनायो करने।” 25जब तुम्हि वोना देसमा जाव, जोनला यहोवा परमेस्वर आपरो वादा को अनुसार तुम्हिला देहेत, वहान भी यो सेवा को सप्पा गोस्टी ला मानने। 26जब तुमरो सन्‍तान तुम्हि लक पूसेत “यो सेवा नेम को काजक मतलब से?” 27तबा तुम्ही कव्हने “ यो यहोवा परमेस्वर को लाय फसह को बली से, जोनना मिसरी गिनला मारतो हुयो अमी इसरायली गिनला सुरक्सित राखयो योच कारन लक यो तिहार मनावो जावासेत।” मंग लोक गिन ना नवके परनाम करीन अना परमेस्वर को सेवा अराधना करीन। 28तबा इसराइली गीन जायके जसो यहोवा परमेस्वर ना मोसे अखिन हारून ला सांगयो होतो वसोच करीन।

पहलोठा गिनको मरनो

29करीब अरधो राति मा यहोवा मिसर देस को सप्पा पहेलोटा गिनला मार दियो, जोन राजगद्दी को बारिस होतो। फराओ राजा लक जोन जेल को तहखाना मा कैदीगिन को टुरा होतिन अना जनावर सबको पहेलोटा ला मार दियो। 30रात मा फराओ, वोको नौकर अना सब मिसर को रव्हन वालो जग गयीन काहेका पूरो मिसर मा रडन को अवाज आयकु आई। कोनी असो परिवार नही होतो जहान कोनि नही मरयो होतो। 31तबा फराओ ना रात मा च मोसे अना हारून ला बुलवायो अना उनलक कह्यो “यहान लक हीट जाव अखिन जसो तुम्हि चाव्हासेव इसरायली गिन समेत परमेस्वर को सेवा अरज करो। 32जसो तुम्हि कव्हासो आपरो जनावर अना मेढा-सेरी भी आपरो संग लिजाव अना मोला आसीरवाद देवतो जावने।”

33मिसर को रव्हन वालो इसरायली गिन पर दवाब डालन लगीन, जोनलक लवकर आपरो बीच लक धाड़नो चाव्हत होतो। काहेका उनला भेव होतो “कही वय नोको मर जाय”! 34एकोलक पहले का इसरायली गिनको गुथो कनीक खमीर बन जाय। उनना वोला परात मा राखके कपरा मा बान्ध के खन्दा मा उचल लेयिन। 35इसरायली वसोच करीन जसो कि मोसे ना सांगयो होतो। उन ना मिसरी लोक हुन लक सोन्नो खुरो जेवर अना कपरा मांग लेयिन। 36यहोवा परमेस्वर ना इसरायली लोक को लाय मिसरी गिनको भितर असो मनमा किरपा पैदा करयो का उनको हरेक माग ला मान लेयिन असो परकार लक इसरायली गिन पूरो मिसर ला लूट लियो।6

इसरायली गिन को मिसर देस लक हीटनो

37इसरायली गिन रामसेस नावको जघा लक रिंग के सुक्कोथ तकन पहुचिन। इनमा बायको लेकरा ला सोड़ छय लाख मरदमाना होतिन। 38इन इसरायिली गिनको संग लगत सो मिलयो लोक भी होतिन अना मेढा-सेरी गायी-बइल अना लगत सो जनावर होतिन। 39उन ना गूंथो हुयो कनीक को बगेर खमीर को भाकर बनायो काहेका मिसर देस लक लगत लहाकी लक हेड़ दियो गयो। उनला ना वहान रुकन को हिम्मत होतो ना उनला आपरो लाय जेवन बनान को बेरा होतो।

40मिसर देस मा इसरायली चार सव तीस साल तकन रहीन।7 41जोन दिवस चार सव तीस साल पूरो भयो वोच दिवस यहोवा परमेस्वर को सप्पा सेना मिसर देस लक हीट गयो। 42जोन रात वय सब मिसर लक हिटयो वा राति उनको लाय खास रात कहलायो। यो यहोवा को महिमा को रात होतो। जोनला इसराइल को सबा लोक हिन को लाय अना उनको पूरो पीढी ला वोना दिवस को महातम देवनो जरूरी होतो।

फसह तिहार को अखिन नेम

43यहोवा ना मोसे अखिन हारून ला फसह को नेम समजायो “ इसरायली गिनको सिवाय कोनी भी परदेसी यो जेवन ला नोको जेवे।” 44पर जोन मानूस ला दाम देयके लियो से अना उ दास को खतना भयी गयो सेत वा जेव सकासेत। 45कोनी भी परदेसी अना बनिहार योमा सामिल नोको होय। 46पाठी को मांस सिरप एकच घरमा जेवो जाय। अना मांस को काहि तुकड़ा भि बाहेर नोको लेजावने। तुम्हि बली जनावर को एक भि हाड़ नोको तोड़ने। 47पूरो इसरायली टोली यो तिहार ला मनाहेत। 48अदि कोनी परदेसी मिजवान फसह मा सामिल होवनो चाव्हासे ता पहले सप्पा मरद गिनको खतना करके यहोवा परमेस्वर को वोना तिहार मा सामिल कियो जाय सकासेत। काहेका उ वोना देस को लोक गिनको जसो भयी गयो सेत। लेकीन कोनी भी बिना खतना को सामिल नोको होय। 49यो नेम देसी अना परदेसी लोगगिन दुइ पर एक जसो होहेत।8

50इसरायली गिन ना असोच करीन जसो हुकुम परमेस्वर ना मोसे अना हारून ला दियो होतो। 51यो वोच दिवस सेत जबा यहोवा परमेस्वर ना इसरायली गिनला मिसर देस लक हेड़ो होतो।